استفسار بخصوص ديكور وعسيب بس الوزغ كيف يتم طرده

[الربذي]

السلام عليكم اخواني ودي ان شاء الله تعالى اسوي مشب تراثي طين بس محتار بالسقف فيه جريد وعمدان يكلف السقف فقط 4000 وفيه ديكور جبسي يكلف 2400 اجمل اﻻول بس خوفي انه يصير احلكم الله مجمع للوزغ وانا ممكن افجر المجلس عشانه
تسالي كيف اطرده مايجي المجلس وش رايكم
كيف اضمن عدم دخوله هناك من قال البيض

[الربذي]

77 فردا مرو وﻻ احد يعرف وين الطيبين شكلهم كاشتين عودا حميدا

[bin.obaid]

السلام عليكم

حياك الله اخوي وبالنسبة للي ماردو يمكن ماعندهم هالنوع من المجالس ولا الشباب فيهم الخير والبركة

بالنسبة لي عندي مشب سقفه جريد سعف نخل وما أخفيك معاناة مع الضواطير ( الوزغ ) ومافي شي ماجربته معهم كل شي تتخيله سويته مافقدهم الا بالشتاء ومن يطب الصيف الا والربع مسيرين هههههههههه

نصيحة لك أخوي في جبسيات أشكالها روعه وتراثيه وحتى الجدران لاتتكلف بالطين عندي المشب تقريبا ٨ او ١٠ سم الطين صح جميل بالشتاء دافي وبالصيف بارد لكن لو يخر السقف او بغيت تخرم بالدريل بيضايقك هالشي اولا مكلف وثاني منت بحاجه مميزات الطين المكيفات أختصرت بالصيف وبالشتاء الله يخلي الارطا والسمر

هذا رأيي يحتمل الصواب والخطأ
بالتوفيق لك أخوي

[الربذي]

بيض الله وجهك ماقصرت والله هذا بلاي

[نوخذة الصحراء]

مثل ماقال ابو عبيد فيه اجباس كانها خشب اهم شي تقول للي يسوي الجبس يقربهم من بعض يعني بين كل خشبه وخشبه 35 سم وعند الانتهاء يدهنهم الدهان بلون بني ويطلع قمة الروعه ارخص واجمل من الخشب وبامكانك تبحث باليوتيوب وكذلك الصور عن الاشكال التراثيه المعموله بالجبس