أسباب الطعم الغريب في تانكي الوطني ؟ [الأرشيف]

بدران الدوسري

01/03/2014, 10:00 PM

السلام عليكم

حياكم الله ياجماعه

اخواني موجود عندي خزان الوطني وغسلته بملح على راي أحد الاخوان

وتم تركيب بزبوز بلاستيك أيضا بنصيحه البايع في الخزانات نفسها

ولي غاز أيطالي عشان أسلم من الطعم الغريب

في البدايه كان هناك طعم غريب قووي وموثر بشكل كبير غيرت البزبوز لبزبوز اخر ايطالي

ومازالت المشكله موجوده رغم أني بعد ماغيرت البزبوز خف الطعم بشكل ملحوظ

سؤالي : أسباب الطعم الغريب المؤثر بصراحه على الشاهي وغيره وشو ؟

هل هو من اللي ؟ أو البزبوز ؟ أو التانكي بكبره ؟

شاكر ومقدر لكم

مفكّر

01/03/2014, 10:14 PM

ركب اللي يقولك عليه البائع
واذا فيه طعم او ريحه ألزمه بتغييره أو رد الدراهم اذا كان غيره مثله

واذا بتتأكد هل الطعم من التانكي نفسه او لا، ذق طعم الموية من فتحة التعبأة مباشرة
الله يسهل امرك

ابو البر

01/03/2014, 10:34 PM

انا استخدم خزانات الوطني
في البدايه اتعب منه شوي / لازم غسيل بوسط الحوش او السطح بواسطه صابون تايد ثم غسيل متكرر بالماء.

Mohammed5d

01/03/2014, 10:35 PM

غير اللي واستخدم لي مكيف صحراوي عريض تلقاه عند برق الحيا او استخدم ليات العايد وتشوف الفرق
انا شريته واول يوم وديته المغسله ونظفه باللي والحين غيرته بالالمنيوم مهب عشانه شين بس الطبق ماركب الا يوم غيرته

صب لي فنجال

01/03/2014, 10:45 PM

وعليكم السلام

ياليت تغير لي الغاز لأن الخامه المصنوع منها ما تناسب الماء المخصص للشرب والطبخ
يطلع في الماء مراره ورائحة ربل.
واهم شي مصدر تعبئة الماء للخزان نفسه تأكد منه.
يمكن ( لي ) التعبئه يطلع منه طعم

وبالتوفيق ان شاء الله.

محبوب جده

01/03/2014, 11:09 PM

اخوي انا مركب لي غاز ايطالي ومحسبس ستانستيل في مخرج التانكي ومحبس اخر في طرف اللي نحاس له عندي الان 3 سنوات وما شفت منه الا العافيه لا ريحة ولا طعم اخبر واحد من الشباب مركب لي سخان وعنده ريحة وطعم في المويه واهم شي حاول انك تبعد اللي عن أي حراره واذا كنت حاطه في مكان فيه حراره خله يصب شوي قـبل لا تستخدم الماء تحياتي اخوي

بدران الدوسري

01/03/2014, 11:33 PM

بيض الله وجيهكم جميعا

شي ماهوب غريب عليكم

أخوي محبوب جده اللي الي تستخدمه الاحمر وألا الاسود ؟

الانواع الجديده كلها حمرا

مسامر القمرا

02/03/2014, 12:11 AM

نفس المشكله صارت لي وكلها من لي الغاز الاسود طعم غريب وريحة تحوم الكبد

ركبت ليات مكيف صحراوي من برق الحياء ممتازى جدا وراح الطعم لي سنه الحين ماشكيت منه الحمد لله

واغسل التانكي بماء وملح خشن كم مرة وشوف الفرق

المتلولس

02/03/2014, 12:55 AM

عب نص التانكي جب علبة خل ام ثلاثه ريال وصبها بالتانكي وطلع بالسيارة خل الماء يتحرك وبعد كم ساعه فرغه وعبه وجرب صارت معي

web

02/03/2014, 02:08 AM

انا عندي الوطني طلعت الطعم او الرائحه من الهوز

عشان تتاكد اول شي فك الهوز وبعدين اغسل التانكي وعبه ماء ولا تركب الهوز ( الي) ومن بكره ميل التانكي واشرب مع نفس المكان الي عبيته منه ان شاء الله لاطعم ولا رائحه معناته لازم تغير الهوز اذا كانت الرائحه والطعم موجود رجعه للوكيل بس اغلب الظن الهوز

XRAY MAN

02/03/2014, 06:35 AM

والله خزانات سيئه بصراحه عندي ريحه لها سنه عيت تروح عبيت وغيرت ولا فيه فايده

وترد في الماء والطبخ ومن تالي صرت أخليه غسيل بس ماصرت أستفيد منه

ما أنسى تانكي ستانستيل أو ألمونيوم ماني متأكد شريته من المحل إلي في الروابي حق أبو صالح العثيم ما أعرف إسم المحل

الزبده لا طعم ولا ريحه ومصمم لموتري سنه كامله ممتاز جدا

sfr

02/03/2014, 08:05 AM

ترى اللي الي تعبيبه الخزان له دور كبير في تغيير طعم الموية

علي الشهري

02/03/2014, 01:58 PM

100% المشكلة من اللي

غيره باللي الأسود اللي يجي فيه خط أحمر وأظنه إيطالي

وتروح المشكلة

سقم المعادي 1

03/03/2014, 04:29 AM

افتح غطاء خزان البيت و طل شف الماء
ياعزيزي طبيعي اي تانكي ماء تعبيه من الخزان بيطلع فيه طعم
بسألك في البيت انت تشرب من ماء الحنفيه ؟
الحل طال عمرك تاخذ لك دبه ام خمسه ريال تصير للشاهي فقط لأن الشاهي هو الوحيد اللي يتأثر طعمه بسبب الماء
و التانكي غسيل - طبخ - قهوة و كثر الله خيره

او الحل الثاني اذا والله تبي التانكي كله يصير ماء حلو صالح للشرب و للشاهي تدور لك ويّت المويه حقت العتش اللي بالحواري يعبون الدبات الكبار بريال و تعبي تانكيك منه بس انه مهب تكانه لان الوايت منتب لاقيه دايم في مكانه

محبوب جده

03/03/2014, 05:05 AM

بيض الله وجيهكم جميعا

شي ماهوب غريب عليكم

أخوي محبوب جده اللي الي تستخدمه الاحمر وألا الاسود ؟

الانواع الجديده كلها حمرا
أسود اخوي اذا انت في بريدة تلقاه في محل سباكه قدام عروق الشمال ووطني في الجهة المقابلة

الهمرH2

04/03/2014, 10:37 AM

أنت ركبت لي
حق غاز:f

حق الغاز للغاز:director:

ركب لي
حق الماء الشفاف:lr
حق الفريون الصحراوي:good:
حق عوامة ماء الطيور:good2:
حق التوانك وليس الغاز:f

صصعفق

04/03/2014, 11:41 AM

الســــــــــلام عليـــــــــــكم

شف ونا خوك

تبي تريح دماغك وتشرب شاهي كايف

مر محل سمنان وخذ عدد واحد تحليه واشبكه وادعيلي

شهي وقهوه والي تبي

تحيــــــــــاتي للجميــــــــــــع

بدران الدوسري

04/03/2014, 04:16 PM

أشكر جميع من شارك

والله يعطيكم العافيه

للاسف تم فصل اللي ( الهوز ) والشرب مباشره من البزبوز ولازال الطعم الكريهه موجود والريحه ايضا

لدرجه أني قعدت ساعه كامله ومازالت الرائحه في يدي

بغسل التانكي مره ثانيه بملح والله يصنعه

بدران الدوسري

02/04/2014, 04:02 AM

خف الطعم والا زال موجود

أتوقع ان المساله في هالتانكي مسالة توافيق

ناس تضبط معهم وناس لا ,

* ابو باسل *

03/04/2014, 03:32 AM

فرغ التانكي من الماء شكلك تخلي الماء في التانكي فتره طويله وهو الي يسبب هالمشكه بعد كل استعمال فرغ التانكي وخله ينشف واذا جيت تستعمله عبه وبعدها فرغه لا تخزنه وفيه ماء هذا ماء راكد وغير متجدد وهنا سبب الريحه مع الوقت .

النسيم العليل

03/04/2014, 11:13 AM

شف أخوي
أولا فرغ الماء الموجود في الخزان
ثانيا ركب سدة كروم في الجهة الثانية
ثالثا ركب نبل أو بزبوز ( نحاس أو كروم ) بالبداية وركب عليه لي شطاف أصلي وبنهاية اللي ( بزبوز كروم أو نحاس )
وإن شاء الله تنحل المشكلة لأني مسوي كذا ولا واجهت أي مشكلة .
وبالتوفيق .

بدران الدوسري

04/04/2014, 01:00 AM

شاكر لكم أضافتكم

اخوي النسيم العليل السده حاطها بلاستيك والبزبوز بلاستيك بعد

واللي لي (العايد) والطرف حاط بزبوز كروم وجربت من التانكي مباشره واتضح انه منه

وتوقعي الشخصي انه مع الاستعمال المستمر بيضبط > بيتهي الضمان وانا احتريه يضبط ههه

اسدهم

04/04/2014, 02:33 PM

يالحبيب شف انا كنت امر في هذي كان عندي تانكي استيل المهم اعبية من البيت وفية طعم صار من الي البيت ولي التانكي المهم الان اعبي من الوايتات غسيل وشرب وطبخ
العتش مايصلح للكل وشاهي والقهوة يطلع طعم

بدران الدوسري

09/04/2014, 02:55 AM

والله ( الي ) المستخدم في البيت نوعيته ممتازة

لكن والله أعلم مع كثرة الاستعمال والغسيل المستمر يضبط

عادل adil

09/04/2014, 03:45 AM

الحل عندي . عب التانكي مويه واضف عليه كوب كلوركس وانقعه مدة يوم كامل همن فك السدة اللي في زاوية التانكي تحت واغسله زين وبعد كيذا ركب السده وعبه وفضه مع اللي ثلاث اربع مرات ليما تروح ريحة الكلوركس وراح يروح الطعم . من واقع خبرة 4 سنوات خزان وطني

محمد بن حمد

09/04/2014, 08:28 AM

حط اللي ماء المشكلة من اللي الغاز لا يصلح لستخدام فيه الماء وموفق

بن مانع التميمي

09/04/2014, 11:27 AM

انا مركبه لي سنه و6 شهور لاحضت بالفترة الاخيرة ان اللي من بداية التانكي قلب لونه بني فاتح وعلى شوي شوي يغمق ! مدري تراب او ايش ! لكن طعمه كويس .. مدري كاني ما احس عاد الله اعلم ههههههههه

والوطني والله جيد من ان فيه ناس تسبه

قطب 999

09/04/2014, 01:50 PM

البلاستيكات لازم تطعم في الماء مافيه مثل الحديد والاستيل

بدران الدوسري

13/04/2014, 09:04 PM

يعطيكم العافية

شاكر لكم مروركم

حطينا شي أعظم من الكلوركس خخخ ان شاء الله يضبط

مرابع الربيع

13/04/2014, 09:31 PM

وفق الله الجميع ..انا لدي تانكي فايبر من المختار .مركب على القلص ومعه تانكي من الكروم ..المعروف ان الفايبر اذا طول فاضي او مليان بسبب راحة لاكن بسيطة ..ومن تجربتي اكثر من ثمان سنوات معي افرغه وافتح جميع المحابس وانفخه بالهواء حتى يجف تماما وعند التعبئة كاس صغير كلوركس تعقيم وشطفه حتى يختفي رائحة الكلور وبعدها عب الماء النظيف ومن افضل مايكون شرب وطبخ ...يعني اهم شي طريقة التخزين

مفضخ الشري

14/04/2014, 01:58 AM

جرب تفك غطاء التانكي و يصير فاضي طبعاً وتحطه كم يوم في مكان تهويته جيده لأني عارف وش علتك انت تحس بطعم بلاستيك اقرب الى الكلور في التانكي هذا سلمك الله شفت غرشه الماء ام 1 ريال لا خليته في السيارة الظهر و رجعت لقيت اطرافها عليها زي الندى من جواء الغرشه ولو تشرب منها بيجيك طعم بلاستيك او طعم مايستساغ بالضبط هذا الحاصل في التانكي الماء يندي على جدران التانكي من الداخل ولا فيه تنفيس للتانكي فيجيك هالطعم صرت افك الغطاء كم يوم اذا صرت منب كاشت ولا طالع منا ولا منا و يبخر الماء احيانا تركب الموتر يصير فيه رطوبه لذلك انت حاول انك تخلي التانكي بدون غطاء في مكان فيه تهويه جيده في السطح مثلاً يصفقه الهواء مزبوط و عبه من وايت حفر العتش و جرب

عساس سهيل

26/04/2014, 05:42 PM

من واقع تجربه ، المشكله كل المشكله في التانكي نفسه
الماده اللي تم تصنيع التانكي منها تتفاعل مع الحراره و تطلع طعم موب زين . و لاحظ انها تزيد في فصل الصيف و تقل ايام البرد الكايد
افضل حاجه إنك تحيله للتقاعد و تاخذ لك أي تانكي معدن و خلاص ـ ألمنيوم / إستيل / او مثل حديد التانكي القديم
لان المسأله ماهي طعم و بس ، الصحة أهم من هذا كله
و شكرا

خالد الخطير

26/04/2014, 07:02 PM

الشئ الاكيد بتغير الطعم هو تفاعل اجزاءه مع الحراره وبالتالي وجود تغير بالطعم

مع اني اعتقد ان اغلب التوانك لابد من طعم فيها

لانها تتعرض لحراره و كتم الماء داخلها

فاقول وهذا رأيي الشخصي

ان التوانك تستخدم فقط للغسيل

وهذا من باب الحفاظ على الصحة والبعد عن الامراض

لانكم لو تلاحظون ان كميات الماء الي نشربها قليله

مقارنة بالي نستخدمه للغسيل

بدران الدوسري

27/04/2014, 04:23 AM

المسيعيد

27/04/2014, 02:32 PM

فعلا والله العالم أن الستيل والالمنيوم هم الدوا ولو غليت أثمانهم

وبالنسبة لاخونا خالد الغسيل مهم لكن هل يعقل أنه مثبت في الصندوق وماخذ شكل على شان غسيل بس

ودك بغسيل وشرب ولو يحصل تروش مافيه مانع :) عشان فعلا يستاهل المكان الي مضيق فيه

تبي نصيحتي لاتاخذ الا الفيبر الوطني

انا عانيت قبل كذا وبعد اتباع هذه الطريقه اشرب واطبخ واغسل منه

اولا غسله بفيري وكلوركس الفيري تحط قدر فنجال قهوة والكلوركس تحط 3 اغطيه قارورة مويه صحه ابو نص

وحطها بقارورة مويه صحه ابو نص وخلطه ورجها مع بعض جيدا

وقوم بتفريغها بالخزان وعبي الخزان الي النص وقلب الخزان فوق تحت او خله بالموتر يخضخض براحته يومين وفرغ الماء وعيد عليه بتعبئه بالماء فبقط الين تشوف الفيري والكلور راحت بالمره

وهذا يحتاج انك تعبي الخزان من 5 الي 7 مرات تعبيه فل وتفرغ

وبعد التفريغ تبخره بمستكه وليس بخور

وبخر مع فتحت الخزان التي مخصصه للتعبئهتبخير فل افل واكتمه واغلق الغطا

ثاني يوم عبيه فل راح تدعيلي

والسلام عليكم