رايكم يهمني:جوال الثريا او جهاز مراسله

[صخب]

السلام عليكم ورحمة الله وبركاته
يا اخوان ابي استشيركم انا راعي طلعات بالاسبوع مرة او مرتين والمشوار اغلبه حول 20 كم خارج تغطية الشبكه واحيان في مواسم الربيع توصل فوق 90 كم وانا لا املك جهاز مراسله او ثريا وعلى قولة الاولين بالنسبه لحمل السلاح وينطبق على اجهزة الاتصال "نقله سنه وعازته ساعه" وانا متحير بين جوال الثريا او جهاز المراسله وجمعهن الثنين افضل لكن القدره واحد فقط :D
وماخاب من استشار

[الضيق]

كلهن واحد احسن من الثاني

لكن اذا صرت في خطر لاقدر الله وانت خارج التغطية

مالك الا الثريا

يعني بالعربي

اللاسلكي للسوالف والثريا للفزعات

وشف انت وش الهدف عندك....

[ابو صالح 871]

ثريا وقارمن

[عاشق القصيد]

شف وانا اخوك اذا كنت راعي روحات كثيره
وارسال الجوال ماهو متوفر
اشتر الاثنين الثرياء و الايكوم
وتراك غالي عند اهلك وعندنا
طالبك خذ احتياطاتك في روحاتك
العام فقدنا مجموعه من الكشاته جعل ربي يرحمهم ويغفرلهم
ويصبر اهلهم
وربي يستر عليك ويستر على المسلمين

[صخب]

بارك الله فيكم يا اخوان والله يستر علينا وعليكم ولا يرينا مكروه في غالي

شكلي رسيت على الثريا

لكن مريت بعض المحلات وحصلت القديم سكوم مستعمل والجديد XT بكرتونه

الغريب ان السعر متقارب وقالي صاحب المحل ان الاغلب يفضل القديم على الجديد لانه سويسري والجديد كوري

هل فيه يااخوان فروقات اخرى والا ناخذ الجديد؟

[bin.obaid]

انا عندي xt-dual هو نفس xt بس يفرق ان اللي عندي يشبك على الجوال بشبكه عاديه واقدر اشبك على الاقمار الصناعية على العموم الجهاز مجربه ومافيه خلاف ابد له معي كم شهر بطاريته الحمدلله تطول واستقباله زين وبالنسبة لللقديم اللي هو سكوم بالماريه لونه كحلي وواعلاه ٣ ازرار لاصقه ببعض جيد ومافيه خلاف ومجرب بس انا بالنسبة لي اشتري جديد ولا اشتري مستعمل الا كانك تعرف راعيه

[صخب]

بارك الله فيك اخوي بن عبيد اذا بطاريته تطول والتقاطه قوي اجل نتوكل على الله وناخذه
وفيه سؤال طال عمرك
Xt العادي يلقط شبكة الجوال ؟؟؟والا فقط فضائي
اللي حصلته سعره مع الشريحه 3250 لكن ما اعلم هو dual والا عادي

[bin.obaid]

هلا اخوي صخب والمعذرة على التأخير

بالنسبة للـ xt فضائي فقط

وبالنسبة للسعر على ما أعتقد سعره في الامارات بحدود ٢٣٠٠ بدون الشريحة وبالرياض بالمرسلات يبيعونه بـ٣٠٠٠ مع الشريحة طبعا كلها بدون ضمان اما بالنسبة للوكيل فماعندي خبر عنه وخبري فيه رافع الاسعار لان كان سعر اللي معي بـ٤٢٠٠ والحين صار عنده بـ٤٤٥٠ بدون شريحة وبالمرسلات ٤٠٠٠ مع الشريحة

بالنسبة للشريحة فسعرها ١٧٠ ريال فيها ١٠ دولار

هالمعلومات قبل شهرين تقريبا او اقل

[bin.obaid]

وفيه واحد هنا عارضها ضمان بضمان الوكيل مع الشريحة هذا الرابط

http://www.mekshat.com/vb/showthread.php?t=623781

[صخب]

بارك الله فيك اخوي بن عبيد
تم التواصل مع الاخ ريااان وسعره صراحه ممتاز جدا مقارنه بغيره