هالطير ضيّق صدري ..

[طارق الحربي]

السلام عليكم ورحمة الله وبركاته

اخواني الكرام

عندي طير وكري ثنو شريته من محل بالرياض الطير سليم ما فيه اي شي بس المشكله انه يكوش ( يحجر او يكوبر ) على الصيده ...

بصراحه ضيّق صدري جربت جميع الحلول عجزت

علفته على يدي واكرمته بالعلف على يدي عشان يتطمن ولا فيه فايده

اذا شبع يضم جنحانه عن الصيده بس لا صار جايع مايخليني اقرب منه ويحاول ينسر يدي او ينقل الصيده

والمشكله الثانيه مايجي على الملواح

علفته عليه وللحين مايعرفه

وش الحلول يالربع ؟؟

شكرا لكم مقدما

[solo_909]

الحل انك يوم يصيد تجيب له علف في ايدك غير الي معه
و تغطي العلف الي تحته و تناوله الي في ايدك لين يخلي الي تحته و ينقز للدس
خلال ثلاث ايام يبطل من هالحركه
و على فكره هذي العاده جاته بسبب سحب العلف منه قبل لا ينسر منه

[*الـزيـن*]

ياشين الي يخرب طبع الطير ياخي الواحد اذا مو صقار ليه يخرب طبع الطير وهاذي مشكله تكويش على العلف او انه يطير وبعض الاحيان يهجم ومالك غير الصبر على الطير

ونبي نشوف حلول ياشباب الي عنده حل يقول

طارق اذا هديتله حمامه وصادهاا خله لين يرتاح وبعدين هات الوكر ياطويل العمر واقرب شوي شوي وامسك سبق واحد واربطه وخل الوكر جنبه واتركه لين يعلف ويجلس على الوكر وكرر الطريقه هاذي اكثر من مره وفي البيت اذا تبي تعشيه حاول تعطيه على يدك وحاول وين ماتروح والطير بيدك مفكوك البرقع والاحسن تسويله مرجيحه لين يطيح الي براسه وهاذي طريقه يمكن البعض مايعرفلها او انك تخلي برقعه مفكوك في البيت وخل البزران يروحون ويجون من عنده لين يطيح الي براسه ويصير راكد ويخفف شوي من التكويش والله اعلم

[المري]

الاخوان كفو ووفو وماخلو شي .. بس اذكر من الاسباب اللي تخلي الطير يكوش هو كثر الهدد ؟ كيف؟ اذا هديته على حمامه وصاده تعطيه نسر وتبرقع وتهده على حمامه اخرى وكذلك ماتعطيه شي اما انك تقول يمكن تروح حمامه منا ولا منا علشان تهد مره اخرى وهكذا..

والطيور اللي يكوووش اعتقد ماله طب يعنى خلااااص مايخلي الكوشه..

بس على ماقالوا الاخوان خل معك علف ثاني غير العلف اللي تحت وعلى طول بيحاول ينقز على يدك..

اخوك = المري

[الوهـ قحطان ـاج]

اخوي طارق

اذا انت متضايق منه بعه يخوي وفتك
خذلك شيهانه فرخ وجرب وشوف مافي ازين من الشواهين
وقلت هذا الموضوع خمسين مره للمبتدئين بس سبحان الله اكثر الصقاره ينصحون بالوكري وانا والله مائنصح بالوكري
عشان ترتاح جرب الشيهانه الفرخ وبس علشان تدهل الطير بكيفك لاتاخذ شي معلمه ابد وهذي نصيحه كمان
واهم شي تكون وافيه الشيهانه ارض وبوز ومقاسه الطول 13 في عرض 14 هذا الي بطيب خاطرك وتونسك

وتحياتي لك

[شعلان]

السلام عليكم ورحمة الله وبركاته
اخوي طارق والله الاخوان ما قصروا كفو...
والطير اللي يكوش ويضرب راعيه صج يضيق الصدر وما ألومك بس أنا عندي كم من حل وانشا الله أفيدك ..
أولاً بالنسبة بأن الطير يكوش ويضرب أخوي حاول بأنك دايماً تنزل من السيارة والمخلاة معاك ولازم تكون حذر حتى الطير يأمن عليك وتجيه شوي شوي وتخليه ينسر من الحمامة وبعدين تجيب المخلاة وحاول انك تغطي الحمامة وتمصع له العلف اللي ما أكله من تحت وتنقزه على يدك وتعلفه وان شاء الله مع كثرة الدعو بينسى ...
أما بالنسبة انه ما يجيك على الملواح اربط في الملواح حمامة حية وادعاه من (( قريب )) ولا تشيل من الحمامة شي لمدة اسبوع او عشرة ايام وخله ياكل على (( الملواح )) واذا جيت بتعزله بالمخلاة وبعد المدة المذكورة حمامة مذبوحة في الملواح وبعد لا تشيل منها شي وعطه بعد دعو خمسة ايام وبعدين الملواح خالي وان شاء الله بجيك مخباط على الملواح واسمح على القصور ...

[عربي نت 1]

يا إخوان

أنا عندي نفس المشكلة تقريباً وهي:

عندي طيرة وكرية

على يدي ولا أركد منها ... وعلى التكية ولا أركد منها

المشكلة إذا جيت أمسح على بوزها وصدرها تكوش وتعض

وإذا قربت منها على الوكر تطير .... ( مع العلم إن الموسة ما أكتملت للحين ,, يبيلها 15 يوم بالضبط )

عطوني حل الله لا يحرمنا وإياكم ووالدينا من الجنة

[قرناس هواء]

اولا:

يالغالي اذا كان الطير يكوش فمالك الى انك يالغالي تعطيه العلف كامل واذا رحت للطير تعاله بهدو وبلحالك



ثانيا:

اربط الطير بالمركاب وخل الطير ياكل لين يشبع ويرجع على مركابه



ثالثا:

وهذه طريقه مجربه اذا اكل وقبل لايشبع اربط الطير بالمركاب وادفن الصيده وطلع علف جديد وخله يطلع على يدك وكرر هذه المحاوله عدة مرات كل يوم مره واحده



رابعا:

الطير اذا كان ينحاش بصيدته اول ماينزل خذلك ثلاث فرات بالموتر عليه واربع فرات وخله لين ياكل بعض العلف ورح يم الطير بهدوء وادع الطير باسمه وخل معك حمامه علشان مايطير



خامسا:

الي يقول اذا مسحت على بوزها تعض اخي الكريم حاول انك ترش ماء على وجه الطير وامسح عليه بالبرقع وخله يومين يعضعض البرقع وامسح عليه دائما بالبرقع على صدره وحط البرقع قدام وجه خله يلعب فيه





اتمنى لكم التوفيق ولكن هناك اكيد من اخبر مني

تحياتي لكم

[طارق الحربي]

شكرا لكم جميعا بدون استثناء وجزاكم الله كل خير

اخواني

بالنسبه لعزل الطير اذا جيت اعزله يطلع على يدي وياكل من العلف اللي معي وفي الوقت نفسه يتمسك بالصيده يعني يبي ياكل من الثنتين

شكرا لكم وسأحاول واعلمكم بالنتيجه

[البحارى]

والله الجماعه ماخلو شى اقوله مشكووور

[طارق الحربي]

مشكرو انت على مرورك الذي شرفني

[ابو شهد]

وهذا طبع وشئ عادي

والطير من صقارة

[طارق الحربي]

شكرا على مرورك يابو شهد

كل واحد على قد امكانياته والتعلم مهو عيب

[جرناس دبي]

مشاءالله على الربع ماقصرو أعطوك كل الحلول بارك الله فيهم.
نفس مقال (*الزين*).

[طارق الحربي]

شكرا لك اخي جرناس دبي

تحياتي لك