شاركنا بـ قصتك في بداية قيادتك للسياره !

[سفير الحيا]

السلام عليكم ورحمة الله

كيف الحال ياشباب ؟



من ليس له ماضي فـ ليس له حاضر ! موضوعنا اليوم يتكلّم عن زمان أول والحياه الحلوه فيه


والمواقف الطريفه والمضحكه كثيره لكن نبي نحددها في موضوع معيّن ونبي نشوف حركاتكم


في البداية ( محد طلع عالم ! ) الشي بالشي يذكر والكلمه اللي تستحي منها بدّها :D


اليوم نبي نتكلّم عن أول موقف حصل لك بـ أول يوم تقود السياره فيه :)


العنوان واضح ( شاركنا بـ قصتك في بداية قيادتك للسياره :D ) والمطلوب منك المشاركه


بالموضوع أعلاه وكتابة ماحصل لك بالتفصيل ان رغبت في مشاركتنا هُنا


أتحفونا بمواقفكم :D


وانا راح أبدا أوّل واحد

[سفير الحيا]

قصتي

ببدا على طول..

تخبرون أول ماتتعلم قيادة السياره مايجيك النوم ماغير تفكر كيف تسوق السياره :D ويضربك بلا

على السياره ماتتحرك الاّ وانت عارف من اللي راح فيها ولو الود ودك تكون السواق حقهم:)

طبعاً ذي قصتي أول ماتعلمت على يد أخوي الكبير يقول ابيك تخدم الشايب وتخدمني يوم يكون

عندي مشوار مع الشباب :) عاد انا ماصدقت قلت ابشر ورحنا انا وياه وعلمني كيف اعشق

وعلى الفرامل والكلتش والمرايه وكيف ترويس ( ورا ) ..

المهم اني تعلمت الاساسيات وكل شوي وانا بغمارة الموتر اعشق والف واتخيل اني اسوق:D

ضربني الشايب المره الاولى والثانيه والثالثه وووو مالقى لي علاج ;)

وتخبرون الشيبان عقب صلاة المغرب يروحون لم السوق يقضون خبز ومقيضيات للعشاء والفطور

قال اخوي الكبير اليوم وانا خوك لا نطلع من صلاة المغرب الاّ وانت على طارة الموتر:eek:

الوكاد لزمة الوصاة وعقب سلّمنا من الصلاة وانا اشيل عمري الاّ وانا جالس بالسياره انتظر الشايب

عقب خمس دقايق الاّ اخوي الكبير والشايب طالعين من المسجد وأبوي يرسل اخوي لم البيت يشوفهم

وش يبغون من اغراض ! راح اخوي والشايب جاء لم الموتر الاّ السواق على الطاره:D

قم ماتعرف تسوق لا تقلبنا وانا اتحايله تكفى يبه الى الازفلت بس كان الخط بر مسافة 10 كيلو

واثناء الحديث الاّ وأخوي الكبير جاء قال لأبوي خله يسوق للإزفلت وعقب انا اسوق ؟

وافق الشايب ( الموتر ونيت غماره ) ركب اخوي بالوسط بيني وبين الشايب والشايب ع الباب

وانا ع الطاره وانا ادق سلف الموتر وهو يطفي :D وادق سلفه وهو يطفي:D الوكاد رابع مره اشتغل

وانا اعشق واسمي بالرحمن :) وامشي وامشي وامشي بالموتر على مهلي وابتعد عن الحصاء ( الحجر )

الوكاد قبل الإزفلت بـ 1 كيلو كان فيه ملعب كوره للشباب وكان ممهد ومستوي للتفحيط :D

لـ هالحين ماطرالي افحط ولا واحد في المئه ؟ قال اخوي الكبير بالله فحط بنا :p قلت لا خايف

من الشايب قال انا اكلمه طبعاً الكلام ( همس ) بيني وبينه ! قال اخوي الكبير يايبه هذا يبي يفحط

قال الشايب خله يفحط !! الشايب يوم قالها كان يهز رأسه يعني لو فيك خير فحط بس ؟

قال اخوي ابوي وافق يقول خله يفحط ؟ طبعاً استغربت من موافقة الشايب :eek:

قلت بتأكد بنفسي ! وانا اطالع بأبوي قلت يبه افحط ؟ وهو يهز راسه قال ايه ايه فحط !!

وانا على سرعتي وانا ادخل بالملعب لأنه كان ع الخط مباشره ممكن امشي 60 وانا اطق البريك:D

تخبرون اول مره تسوق واول مره تفحط ماتدري وش تسوّي ! والمشكله انه بالبر والموتر

في البر دام رجلك ع البنزين وانت في وضع دوران مستحيل تمسكه يقعد يلعب لعب :D

وانا اخذ خمستين ومع الغبار ماعاد اشوف صرت من الخوف داعس ع البنزين وقافل الطاره

وانا اصدم بالشجره وان الكبوت والإديتر والشبك والأنوار رايحتن فيها:eek:

ولا دريت غير الكف يمشي 200 ويشهد الله ياجاني مغط بالعقال لو بعير ليبرك:D

عاد واحد من الجماعه كان ورانا قبل نفحط وشافنا يوم فحطنا وجاء كان يبي يضربنا يحسبنا

أنا واخوي اللي بالموتر ويوم وقف عندنا الاّ يشوف الشايب

قال ماشاء الله هذا انت وعيالك أنتم بعقولكم ؟ والله انكم مجنن ؟ قال الشايب الورع دخل بالمراغه

وقعد يفحط وانا كنت نعسان ؟ قلت لا والله ابوي قال فحط :D عاد وقتها ركب اخوي والشايب

مع جارنا اللي كان يمشي ورانا وقال ابوي انت رح للبيت كعابي:(

والى هاليوم كل ماذكرت القصه للشايب يضحك

انتهى الفيلم:D

[قوافي ( أم نهار )]

اشكرك سفير على طرح موضوعك
القصه سبق وان طرحتها بسالفه والافضل ان يكون لكل عضو سالفته المستقله