سؤال مختلف عليه

[الهدهد]

السلام عليكم ورحمة الله وبركاته

يا جماعه عندي سؤال اختلفو فيه بعض اهل الصقور.
الموضوع اذا طيرك (هد)على حباره وتداوس وياه في الارض ثما افلتت منه ولحقها مسافة تقريبا كيلو
وجاء راعي الطير ورماها امام الطير وماتت في السماء(يعني في مذبح)وعلقها الطير قبل ما توصل الارض ونزل فيها(ميته)ما ذبحها الطير.
السؤال :هل يعتبرا الطير صايد.....اويعتبرا هاد بس؟

واذا ببيع الطير يقول صايد؟
ملاحظه راعي الطير انجبر ان يرميها.

ولكم الف شكر....وجزاكم الله الف خير.

[ابو شهد]

ياصار مداوسته وهاد عليه وفارسة وانطلقت منه

هذا اجل وش يسمى

على حسب كلام اهل الصقارة (عبيد العرادي- فهد العرادي)

كلهم يقولون الطير صايد

وهذا شغل الناس من اول

[قصمنجي بحت]

هلا أخوي الهدد

الاحسن انك تقول الوصف للمشتري بالتفصيل علشان ما يدخل ذمتك شي....

بس غريبه ليش يرميها يمكن مو واثق من امكنيات طيره .

[آبو غلآ]

هلا وغلا ،،
يكفيك انه مطلبها ومتداوس معها وش معناها ؟ ان الطير يبيها وطارت ولحقها ؟
يمكن رماها خاف ان الطير يتعب وتروح عليه بس يعتبر صايد ،،

[المري]

كلام الربع كلهم صحيح,, وانا اعتبره صايد , وراعي الطير رماه لانه شاف الحبارى قامت تفك من الطير.. وشغله عدل..

اخوك / المري

[جرناس دبي]

السلام عليكم:
عندنا فرق في الأمارات.
صايدإذا صاد الطيربنفسه دون تدخل الصقارفي الأمر.
وإذا رماها صاحب الطير وقبل لا تصك الأرض علق تصبح مثل الكسير.حتى ولو متداوس معها من قبل.
مثلا:أنا رميت ظبي في رجله وهرب عني مسافه ثم قام أخي برميه و(صيده) هل يعتبر أني صايد.
نقول أنا صايد فولان صايد الطير صايد لأنه صاد الشي بنفسه دون تدخل طرف ثاني.
هذي طريقتنا في الأمارات.
جرناس دبي

[الرائد الأول]

إذا كان المنطقه المتوجهلها الطير وعره وراع الطير خايف طيره يروح يعتبر الطير صايد
وإذا كانت المنطقه خبت ولا خوف على ضياع الطير فيعتبر الطير غير صايد

[الضاحي]

انا في رأيي ان الطير هاد بس ما صاد لأن الطير بعدما جابها الارض وتداوس وياها فكت منه وطارت ولحقها مسافة كيـــــــــــــــــــلو وما قدرها الين صابها راعي الطير بالسلاح في مقتل وذبحها ولما هوت من السما علقها الطير

وهذا لا يعني ان الطير ما يصيد بس في الحالة هذي محل السؤال انا اشوف انه ما صاد .

هذا رأيي المتواضع .

مع كل احترامي .

[المري]

هو صحيح انه ماصاد بس لو جيت انا بشتري ,, اشتري صايد مافيه كلااام .

اخوكم / المري

[ghazyy]

مرحبا بالاخوان جميعا

مع تقديري لكل اراء اخواني في المنتدى

الطير ما يعتبر هداد الا اذا صاد وذبح الصيده بايده

واي تدخل من الغير ---- الطير ما يعتبر هداد ----مع الشكر للجميع

[مصيول]

طيب


الي يبي يشتريه يبيه هو يصيدها لحاله مهو بمعاونة راعية ... ولا يعلمة ويقوله أن الطير صايد ..... بمعاونة البندق :D