مشكلة في باترول 95 .. عاجل

[hail_ksa]

السلام عليكم ورحمة الله وبركاته
اسعد الله مسائكم بكل خير


عندي باترول 95 وأنا واقف وهو يشتغل فجأة طفى بدون سابق انذار
اخبر المواتر تبدأ تقطع أو تنبهك بوجود مشكله

جبت له بنزين مع انه كان فيه بنزين مانفع معاه .. قلت يمكن الكبليتر مشرق وفكيت الغطى وسويت له كل شيء مانفع.. حرارة الموتر كانت طبيعية والرديتر فكيته مافيه شيء غير طبيعي .

اذا دقيت سلف يطلع ريحة بنزين .. تاركه له يومين على هالحال واليوم جيته وشغلته نفس الحكايه مايشتغل ويطلع ريح بنزين.

[adel-2014]

وعليكم السلام

يمكن مشرق بانزين او الصفايه فيها وسخ
شيك ع أسلاك البواجي بعد ونظفهم لا يكون فيه تهريب كهرب أنت كنت تعبيه بانزين أخطر ولا أحمر ؟

[adel-2014]

حتى فلتر الهوا اذا فيه غبار ومايوصل هوا الكافي يقطع نظف الفلتر أو.بدله اذا هو قديم. وان شاء الله يظبط معاك
ونصيحتي لك اذا انت تعبيه احمر 95 لا تغيره للأخضر يعملك مشكله ويقطع ويخنق ويطفي بعض الأحيان

[ابوشاهه]

ابدأ بالاسهل فك الفلتر الهواء ونظفه زين ثم فك الصفايه ونظفها بالهواء (لاتغيرها)وفك البواجي وصنفرهن ... وافصل لي الطرمبه ودق سلف وشف البنزين يطلع أو لا ؟..

[كهرووب]

وعليكم السلام ورحمة الله وبركاته

حط بنزين في الكلبريتر وشوف يشتغل والا لا ؟ اذا اشتغل مشكلتك من الطرمبه حقت البنزين واذا ما اشتغل المشكله من الكهربه ممكن يكون من البلاتين او الموبينه او الكويل

[ابو فهد ألعزي]

تئكد من البليتين ممكن ضرب
او الشاكوش
او الكويل وممكن سلكه انفصل
وسلك الكهرب الموصل في الكربريتر
وطرمبة البنزين
شيكهم كلهم اسباب

[salih100]

افصل اي سلك بوجي وحطه على راس المكينه او اي مكان وخل واحد يدق سلف وشف يطلع كهرباء او لا

اذا يطلع كهرباء زين واذا ما يطلع فشيك على الديلكو والشاكوش والبليتين اذا قافل اول فاتح

[صياد جنوبي]

اذا طفي فجأه فهذا يدل على ان عندك التماس والعطل كهربائي وما للكربريتر اي علاقه

تأكد ان لمبات الطبلون تولع مع السويتش الكبير

تأكد من فيوز الكويل وتلاقيه من ضمن الفيوزات اللى عند ارجول الراكب

خذ لمبة اختبار وشيك الكهرب في ناحيتين الكويل يعني اختبر وصول الكهرب والسويتش مفتوح في المسامير اللي امام الكويل واذا ماهي واصله فيه عظمه بيضاء حول الكويل اسمها الاستنص شيك الكهرباء في الجهتين اذا واصل من جهه وجهه غير واصل هذا يدل على ان السسته مقطوعه استبدلها وتشتغل سيارتك

للمعلوميه مشكلتك ان الشراره مقطوعه يعني لو تتبعت الكهرب وصارت واصله في كل النقاط اللي قلت لك

فك غطاء الديلكو وتاكد من الشاكوش او البليتين

وتتبع كل نقاط الكهرباء اللي تخص الشراره ولا تتعب نفسك في الكربريتر