موضوع للاهميه تشاركوني فيه

[رماني زماني]

عندي طير ضاع مني قبل 5 شهور وكنت ادور فيه ماباقي واحد مابلغته بالاحساء كلمني رجال يقول طيرك عندي
قلت له انا متي لقيته قال قبل 5 شهور قال قنصت فيه صاد معي كراوين وحمام
قلت له ليه ماتصلت فيني قبل يقول توه قاري بالنت انه عندي طير ضايع
قلت له الحين تكلمني قال توي لاقي موضوعك رغم اني ماباقي حد من الصقاقير ماعلمته انه عندي طير ضايع باختصار شديد قلت شالمطلوب قال اخوي اللي لاقيه ويبغي قيمت العلف
حق 5شهور بدال مايقولي اخذ طيرك موجود عندي يطالبني حق 5 شهور اللي علف الطير
شرايكم ياصقاقير انا ضحكت مدري شقوله قلت له الطير من صوبك
شرايكم فيه ابيكم تشاركوني بالموضوع هل يستاهل انه يكون صقار

[فالكم الشحم]

يجب تتأكد إن طيرك بالفعل عنده.
فربما يريد أن يبتزك وهو ما عنده طير وما عنده شيء .

[رماني زماني]

هلا وغلا فيك بس الرجال يكلمني وعطاني وصف الطير يقول هذا طيرك قلت شلون طيري الموصفات اللي في طيرك اهي اللي موجوده في الاعلان عن مواصفات الطير
شكرا عل ردك

[اردني]

المال دخل في كل شئ حتى الكرامة صارت بالفلوس بارب عفوك

[دنيا بلا معنى]

المعروف في شي اسمه قضابه طير وتقدر من ١٥٠٠ الي ٣٠٠٠ هذا سلم عند الصقاقير وبعضهم طيب ما ياخذ شي ولكن قيمه ١٥٠٠ تكفيه علف لطير دام هذا طلبه ومافي داعي وانا اخوك تكبرون الموضوع ودامه قضب طيرك واجتهد يدور راعيه كثر خيره
انا لي ثلاث طيور ضاعت ولا في احد جاب خبرها
احمد ربك وانا اخوك والدعوه اخذ خواطر وكرامه ..

[ابوناشي511]

الرجل الي ياخذ قيمة جمالته فالرياجيل والله ان الشرهه فيه كثيره وعلى ما قال المثل لحيه كرمها ولحيه كرم نفسك عنها

[(هزاع)]

الرجل الي ياخذ قيمة جمالته فالرياجيل والله ان الشرهه فيه كثيره وعلى ما قال المثل لحيه كرمها ولحيه كرم نفسك عنها


:good2::good2::good2::good2::good2:

القضابه معروفه لكن بوقتها مهوب لاجات ربطة الطير ونتها مقناصه به
وشور عليك


عطه اللي يسد نفسه وخذ طيرك وحمد الله ان مثل ذا الادمي رجع لك طيرك

[محمد ابن سعود]

اعتقد مع احترامي ان هذا الرجال لا يصنف من ضمن الرجال للأسف الناس الحين صارت ذممهم وسيعه الله لا تبلانا لو انه رجال صاحي وعنده ذمه وعزة نفس كان اول ماقضبه اتصل عليك ولا انا عن نفسي بربطه على حسابي واذا حصلت راعيه عطيته طيره وحلفت من سعر ربطته ،،،

[فهد بن داموك]

من وجهة نظري عطه سلوم الرجال لي فيهم خير لأنك من اهل العرف والمعروف وخل الفلوس تنفعه وكسب عرف الصقاقير وسلومهم

[fdfd_2002]

هذا خسيس لحيه
ودامك قلتله ان الطير من صوبك خلاص انتهى النقاش وانا خوك
انت بيض الله وجهك وهو مانقول الا الله يهديه
بس ماقلتلنا هو من اي العرب من الشمال او الجنوب لان السلوم تختلف

[غريب الدار 22]

والله ي خوي هذي سلوم الصقاقير (حق القضابه)
هو غلط يومنه قنص فيه بس عاد انت خلك كريم واحسن لك لو تركب حجل لطيرك يكون فيه اسمك ورقمك
واحمد ربك انك لقيت طيرك انا ضاع طيري ورا كروان اول الموسم قدامي الخط السريع والشبوك ومن زود غلاته دمعت عيوني
وعليه حجل وعليه ريشه لاكن مالله كتب وبلغت قوانيص حائل وماحد عطاني علمه لومك هذا

[لبيه يمنادي]

من وجهة نظري عطه سلوم الرجال لي فيهم خير لأنك من اهل العرف والمعروف وخل الفلوس تنفعه وكسب عرف الصقاقير وسلومهم




كلاااااااام سليم وهذا الرأي الطيب

[ابومختار]

السؤال الاكثر اهميه
هل الطير عليه حجل برجله عندما فقدته
اذا كان به حجل ولا اتصل عليك وقنص بالطير ويوم جاء المقيض يتصل فيكون ذا ماعنده من علوم الشهامه شي
وكرم نفسك عنه وعطه وخذ طيرك وفلح يالنشمي
كل مالها الصقاره بنحدار

[حكمة الصمت]

والله وانا اخوك من ناحيتي اشوفه ضعيف نفس لاكن على ماقال الشاعر (بفلوسنا ي عبيد ماش معروفي) وعطه الي تعطيه واخذ طيرك واعتبره راتب العامل الي يعلف طيرك ومبروك العقلان ولو انه طاح في نشبان :)

[رماني زماني]

اشكركم لمشاركتكم معي بالموضوع وعلى تفاعلكم معي والموضوع انتهى بس اني حبيت اخذ رايكم وبيض وجيهكم كلكم واللي ضاع طيره يحصل طيره واللي ماحصله الله يعوضه بغيره.
وبيض الله وجيهكم

[سيرحوت]

اخوي عطه حق القضابه ودام قال انه بلغ الصقارين انه لقى طير ضايع وماشاف اعلانك الا هالوقت صدقه ويستاهل حق القضابه . اللي يبشرك انه لقى طيرك يستاهل حق البشاره

[ابوخالد--]

سمعنا منك و لا سمعنا منه
ولا نبي نظن فيه سوء لأنه الامر بينك وبينه وعلى كلامك انه بلغ ودور واجتهد وان طلب قيمة العلف فهو من حقه ولا يحس بحيا او حرج والسبب من بيئته اللي تربى فيها( اغلبنا بيستحي و مثلي كثار ما يبي الا دعوة طيبه بالغيب تكفيه)

[النداوي HZ2AF]

السلام عليكم ورحمة الله وبركاته
مادام أن صاحب الموضوع يقول أن الأمر منتهى أسمحوا لنا في إغلاق الموضوع