وزن الماء حتى تتهنى بالرز النثري

[حبل الوريد]

السلام عليكم ورحمة الله
اول مشاركه لي في هذا القسم
كثير مننا ما يجي وزن الما معه وبحكم اني بلشن مع واحد من الربع رزه قبل جريش
ولا يقتنع والشله كلهم يعد رزهم حب قلت لعله يوم يتوه ويقرى هالموضوع ما اطيل عليكم ههههه

بحكم تجارب بسيطه بالطبخ قدرت احدد وزن الماء

اولاً اذا كان قدر عادي :
$ اذا كان الرز تم تنقيعه لمده لاتقل عن اربعين دقيقه بماء فاتر يكون الماء عن الرز بقدر اصبعين ونصف الى ثلاث اصابع تقريباً ثلاثه سنتي او اقل شوي

$ اذا كان الرز مغسول فقط بدون تنقيع يكون الماء بمقدار اربع اصابع تقريباً

* ملاحظة/ بعد ما يتشرب الرز الماء وقبل تحط البزار ارفع علوب الحبحر على غطا القدر و اقلبه بالملاس تقليب راكد حتى يتداخل ولا يتحاسد الرز بحيث الي فوق ينزل تحت والي تحت يطلع لفوق

ثانياً اذا كان قدر كاتم :

$ اذا كان منقوع يكون يغطي الرز ولا يزيد عنه وسكره سريع


$ اذا كان مغسول فقط يكون الماء عن الرز اصبع واحد فقط

$ طريقه اسويها غالباً بالكاتم يكون مغسول فقط يكون الماء عن الرز اصبعين ونصف ارفع للنار لحد ما يشرب الماء واطبقه لمدة ربع الى ثلث ساعه على نار هاديه يتشرب الرز الماء وتزين حبته



نصايح على قد التجارب البسيطه

# احرص على تكشين الدجاج بذممممممه واخلاااااااص وشل جلده حتى تروح زفرته

# اللحم لا تطيل عليه بالتكشين واذا كنت مضطر يكون معه طماط حتى يتسبك مع البهارات والملح ولا تصب عليه مويه بارده تجزز اللحمه " تقسى" وتفقد نص لذتها

# النصف الاخر من طعم اللحم يزول عند غسل عشان كذا شل من الكيس واهبد بالقدر

# نثره سريعيه زيت زيتون فوق الرز قبل نضجه تعطيك طعم خارق


بالاخير الطبخ ماله قواعد على نفس من يطبخ وهواه

وان شاء الله اكون قدمت مشاركه مفيده:D

[سامي الششريف]

جميل ما قصرت استفدت كثير

[مجازف2010]

الله يعطيك العافية .. ولكن مثل ما قلت بالاخير تعتمد على الخبرة لان انواع الرز تختلف الرز العادي يختلف عن الرز البشاور وعن الرز الامريكي ( ابو بنت ) وانواع القدور تختلف بعد فيه منها العميق وفيها منها العريض

اما من ناحية زيت الزيتون الناس اذواق ولكن عن نفسي احس طعمه غير مستساغ لان طعمة قوي ولكن كشنة مكسرات وزبيب وبهارات قبل ما تخلص الكبسة مع سمن او زبدة تكون احسن بالطعم

تقبل راي ودمت

[ابوسليم111]

مشكور على الافاده

[بدوي ممطور]

مشكور بارك الله فيك
الطريقه الي يكون الرز كل حبه لحالها مايكون على بعضه هل هذا من نوع الرز او من عمليت الطهي اوالطيخ

[حبل الوريد]

شكراً لكل من مر واضاف للموضوع



مشكور بارك الله فيك
الطريقه الي يكون الرز كل حبه لحالها مايكون على بعضه هل هذا من نوع الرز او من عمليت الطهي اوالطيخ

هذي طال عمرك يكون الرز مستوي صح ومويته موزونه لاحب ولا منهطي
ايضاً يكون الدسم فيه معقول لانه اذا قل يتلبك على بعضه زيت زيتون او شحم او سمن

[طحنون]

الطبخ اذا كنت مجتهد ومستعد مايطلع زين واذا كنت حايس ولايس يطلع طبخ مميز مع شهاده تقدير

[حبل الوريد]

ههههههههههههه انشهد عز الله صدقت بذي يا طحنون

[بن مانع التميمي]

والله ياخوك انا طبخي واحد لكن مرات تكون جيدة مرات لك عليها لكن الغالب تكون طيبه هههههه


وبالنسبه لك انت تقول اللحم علطول اهبده بالقدر .. انا اهبده بقدر واخليه يغلي دقيقتين او 4 دقايق وبعدين اطلعه واشخله واغسله بماء وبعدين احطه بقدر الطبخ .. لان اللحم فيه صنقه تخرب الطعم خاصه التيس


ويعطيك العافيه

[تميم2222]

والله ياخيي نصايحكً حلو وومتازه

[كامري ابيض]

جزاك الله خير
افدتنا بالموضوع

شكرا لك

[المزاول]

يعطيك العافيه
كفيت ووفيت

[تساهيل1]

موضوع ممتاز

بس اللحم لازم تغسله وتنظفه من ألدم
مضبوط وبذمه مدبله

[MANSOR QATAR]

شكرا لك على الموضوع



تحياتي لك

[alhinay]

والله انا مشكلتي مشكله مع الرز
ما عرفت اوزن الماي ابدا

يا ما يطلع ني ما كافنه الماء او انه ينعصد تقول تاكل هريس

طبعا اغلب طبخي بقدر الضغط

[تساهيل1]

والله انا مشكلتي مشكله مع الرز
ما عرفت اوزن الماي ابدا

يا ما يطلع ني ما كافنه الماء او انه ينعصد تقول تاكل هريس

طبعا اغلب طبخي بقدر الضغط



افضل طريقه اذا كنت مبتدئ او ملخبط

ادحا نضج اللحم او الدجاج وجيت تكبس الرز

طلع الدجاج او اللحم في غطاء القدر ثم اوزن الماء فوق الرز
مقدار سانتي او نص سانتي
اذا كان الرز الو كاس او الشعلان لابد يكون منقوع اقل شئ 20 دقيقه او 30 كافيه ثم رجع اللحم واكبس
وشب عليه النار حتى يبدا ينسم بعدهآ اقصر النار على للتنميل
وربع ساعه وشف النتيجه

بعدهآ راح تتقن وزنة الماء بدون ماتطلع شي من ثاني او.ثالث
طبخه وبالتةفيق

[فتك 11]

ولابد اذا استوى الطبخ والرز رطب افتح غطاء القدر خفيف وعطه من ربع ساعه الى نص ساعه عشان يتبخر الماء ويطلع نثري ولا بد الزيت يكون كافي ضرور بالموضوع

بالصحه والعافيه

[ع العمرو]

مثل مفيه سواقين محترفين الطبخ له ناسه !! وخاصة النثريات.

[ابوياسرالبلوي]

الله يعطيك العافيه

[SHEGARDY]

كثير من الناس يغفل عن امر مهم بطبخ الرز وهو ( الأهم بنظري من مستوى الماء ) ..

هو : توزيع الحرارهـ

فيه فرق لما تطبخ الرز على عين صغيرهـ وبين الطبخ على عين كبيرهـ

فأكبر غلط تطبخ قدر كبير على دافور

يعطيك العافية

[تربة الشمال]

جزاك الله خير موضوع شيق ومفيد

[الشامخ50]

احنى وين والعالم وين
العالم صنعوا اشياء تفيد البشر وحنى مشغولين بوزن الرز

[ذري1000]

احنى وين والعالم وين
العالم صنعوا اشياء تفيد البشر وحنى مشغولين بوزن الرز

انت لا طلعت القمر ولا أكلت رز نثري

طعني خلك على الاقل معنا :)

[خليل909]

انت لا طلعت القمر ولا أكلت رز نثري

طعني خلك على الاقل معنا :)

هههههههههههههههههههههههههه اضحك الله سنك

[حبل الوريد]

احنى وين والعالم وين
العالم صنعوا اشياء تفيد البشر وحنى مشغولين بوزن الرز

كل رواد الفضا ما يروحون الا ومعهم لحيمة حاشي وكيس الوليمه ههههههههههه
مقابل العيش ولا مقابل الجيش هههههههه

[.سجّار.]

الله يعطيك الصحه والعافيه وماقصرت على الموضوع المهم لعل كثير على قولك يجهلون مسألت وزن الرز

الا على طاري جريش هههههههه عندنا وعندك خيررر الشباب الي عندي كبستهم كييييكه هههههه طقه وحده

لاكن لعلك ماتطرقت لمسألت اذا كان بيكب الرز على اللحم والخضار يكون الماء مرتفع شوي مع اللحم والخضره
وايضا نوعية الرز هل هو مزه ولا بشاور تختلف وزنية الماء له

واشكرك على الموضوع ولاهنت يالغالي

[خليل909]

$ طريقه اسويها غالباً بالكاتم يكون مغسول فقط يكون الماء عن الرز اصبعين ونصف ارفع للنار لحد ما يشرب الماء واطبقه لمدة ربع الى ثلث ساعه على نار هاديه يتشرب الرز الماء وتزين حبته
ودي اسئلك عن هالنقطه هذي يعني تخلي القدر مفتوح لحد مايشرب الماء ولاتسكره من غير ماتكتمه

[حبل الوريد]

الله يعطيك الصحه والعافيه وماقصرت على الموضوع المهم لعل كثير على قولك يجهلون مسألت وزن الرز

الا على طاري جريش هههههههه عندنا وعندك خيررر الشباب الي عندي كبستهم كييييكه هههههه طقه وحده

لاكن لعلك ماتطرقت لمسألت اذا كان بيكب الرز على اللحم والخضار يكون الماء مرتفع شوي مع اللحم والخضره
وايضا نوعية الرز هل هو مزه ولا بشاور تختلف وزنية الماء له

واشكرك على الموضوع ولاهنت يالغالي

والله يالغالي الغالب الخضره اذا كانت " ثوم ، كوسة ابذح اطرافها ، قرغ مقطع ارباع واذا كان قاسي ابذح اطرافه . او بطاطس اربع ومبذح" اكبه فوق الرز بعد ما اوزن الما والرز
واذا كان البطاطس على عدله اخطه مع اللحم ولا جيت احط الرز طلعته عشان اتاكد من وزن الما

[حبل الوريد]

$ طريقه اسويها غالباً بالكاتم يكون مغسول فقط يكون الماء عن الرز اصبعين ونصف ارفع للنار لحد ما يشرب الماء واطبقه لمدة ربع الى ثلث ساعه على نار هاديه يتشرب الرز الماء وتزين حبته
ودي اسئلك عن هالنقطه هذي يعني تخلي القدر مفتوح لحد مايشرب الماء ولاتسكره من غير ماتكتمه

مالك لوا يا طويل العمر اطبقه بس ما اكتمه وافتشه عقب اربع دقايق تقريباً اذا شفته شرب مويته كتمته ونملللللت على النار ربع الى ثلث ساعه ولا علي منه يتس بلفه ولا ما يتس العمد على تشرب الرز باقي المويه والبخار