هل الفريون التجاري للمكيف له تأثير

[ابوخلف..]

السلام عليكم ورحمة الله وبركاتة
مثل ماهو واضح بالعنوان يا اخوان
الفريون التجاري له تــاثير على التكييف ..
من ناحية الكمبرسور او الليات

[جني صغير]

أكيد ١- تبريد يضعف
٢- تسدد المواصير
٣- تسدد بلف المكيف
٤- تسدد الثلاجة
وغير هذا كله
الكمبورسر يضعف وبالغالب يكون فيه انسداد

[أبوسعد111]

نعم
يابوخلف
خلك على الاصلي ولو زاد سعره
وعلشان لاتخسر مره ثانيه
بشراء كمبرسر جديد وتعبئة فريون مره ثانيه وتنظيف مواصير
كل هذا بسبب فريون تجاري

موفق

[ابوخلف..]

بارك الله فيكم على سرعة
التجاوب ..
ونصيحتكم محل اهتمام
ولا يقربني ان شاءالله التجاري

[صياد جنوبي]

معلوماتكم حلوه مررره جدا ولكن فيها نقص كثير جدا

الفريون الاصلي تلاقونه في الوكالات فقط للمعلوميه

جميع انواع الفريون صناعة صينيه بدرجات ومواصفات عالميه لان المصنع الوحيد في العالم لغاز الفريون المسال موجود في الصين فقط

طبعا ياباني او اسباني او امريكي مصنعينه في الصين باسماء دول على حسب مواصفاتهم

فيه انواع صيني ولكن بجوده عاليه جدا مثل 412 بي او 134 اي اوتو فاين نفس جودة الامريكي الدرجه الأولى

لتعبئة اي فريون في اي سياره جديده او قديمه يجب مراعاة ما يلي :

1- نسبة الزيت تكون ممتازه وملحوظه في الفريون في حالة تفريغه ونسبتها تكون 100 ملي لكل كيلو وستجدون كل سياره موجود نسبة الفريون في الكبوت او في الكتالوج وعلى اساس نسبة الفريون بالكيلو تحط نسبة الزيت انت

2- نظافة الفلتر يجب قبل تعبئة الفريون تتاكد من نظافة الفلتر طبعا في السيارات الامريكيه فلترين والكثير ما يعرفها وطبعا الفلتر الاولي هو اللي فيه شبك ويركب داخل ماصورة الظغط ويعتبر البلف ايضا والفلتر الثاني هو الاسطوانه الكبيره اللي في الكبوت ومنها يرجع الفريون الى الكمبروسر وفائدتها تصفية الغبار والاوساخ واعطاء الزيت على شكل بخار ليتم مروره عبر صمامات الكمبروسر وتزييته وطبعا هذا الفلتر يجب تغييره كل ميه وخمسين الف الى ميتين الف في المناطق الحاره مثل جده والرياض ........

بالنسبه للسيارات اليابانيه والالمانيه لايوجد لها الا فلتر واحد وهو الاسطوانه ويجب تغييرها في السيارات الالمانيه كل خمسين الف كيلو لأنهم حاطينها في الظغط وليس السحب مثل الامريكيه

السيارات اليابانيه لا يتم تغيير الفلتر الا اذا كان الزيت لونه اسود او بني او يكون فيه انسداد لان مساماته واسعه بعض الشي ومن الصعب انه يتعبى وسخ بسرعه

3- نظافة المواسير يعني اذا شفت لون المواسير اسود من الداخل والزيت لونه بني او اسود فهذا يعني انه لازم تنظف دائرة الفريون كامله

4- شبك الثلاجه الداخليه مثل ثلاجة مكيفات البيوت تجمع اتربه وغبار ويصير دفع الهواء ضعيف ويصير فيها روائح ولابد من فك الثلاجه وغسلها من الخارج مثل ما يغسل مكيف البيت

معلومه اغلب السيارات الجديده يوجد لها فلتر هواء خلف الدرج اللي عند الراكب في الامام وهذا يحافظ على الثلاجه نظيفه من الغبار ويتم تنظيف الفلتر فقط او استبداله

5- الثرموستات اللي يخلي المكيف يفصل ويشبك على حسب البروده مهم جدا عشان المكيف ما يجمع ثلج وبرضو يريح الكمبروسر

6- التوسط في شد السير يعني ما يكون مرتخي ولا يوكون مشدود مثل السيخ


تحذير

انتبهو تشغلون المكيف والسياره ماشيه وظغط المكينه اكثر من 1500
و بعض السيارات يكون فيها الظغط واحد ونص

للمحافظه على المكيف لا تشغله الا والسياره واقفه او ماشيه ببطء يعني على سرعة 60 او يكون الظغط للمكينه للسيارات اللي فيها ظغط مثل ما ذكرت سابقا

لا تصدقون اللي يقولون ما يضر وانا اقسم بالله ان بعض الكومبروسرات تنفجر من شدة الظغط يوم تشغله وانت مسرع لأن تسارع الكوميروسر من صفر الى الف وخمسميه في الدقيقه يعتبر فوق العادي ولكن لو كان ضغط المكينه اكثر من الف وخمسميه راح يكون تسارع الكومبروسر من صفر الى مقدار الظغط اللي مكينة السياره عليه ممكن يفجره انتبهو للمعلومه هذي

طبعا اللي ينصحك يبيك كل يوم تغير كومبروسر هو المستفيد وانت الخسران وانتبهو من الميكانيكيين والكهربائيين ولا تثقو فيهم يعني روح بسيارتك لعدة كهربائيين او ميكانيكيين واسمع انواع الافتاءات وكل واحد يصعبها اكثر من الثاني وامش مع راي الاغلبيه

تحذير في تحذير

انتبهو من الكهربائيين تراهم يشترون فريون صيني سيء في المواصفات ويعبونه في اسطوانات امريكي ويبيعونه عليكم بسعر غالي وهو يضر سياراتكم وانتم ولا دارين عنهم

نصيحه

اللي يبي يضمن فريون اصلي لسيارته يروح يشتري اسطوانه ذات جوده عاليه من محلات بيع الفريون وقطع غيار المكيفات والثلاجات العاديه ويوم يروح للكهربائي يعطيه الاسطوانه يعبي له منها ويروح بالباقي لبيته او يتقاسمه مع زميله اهم شي يضمن نوع الفريون اللي في مكيفه


تقبلو التحيه واسف لو نسيت شي

[ابوخلف..]

صياد جنوبي
إضافة جميلة ومعلومات قيمة ومفيدة
بارك الله فيك وكثر الله من أمثالك