فزعتكم ياهل الابل سؤال لاهل الخبره

[راعي المنيفه]

السلام عليكم
يالربع عندي ناقه طيبه وحليبها طيب ولله الحمد وتحتها حوار عمره 3 شهور ودي اودي الناقه يضربها الفحل دام عاد الجو براد شوي وقبل يدخل الصيف وودي اصبر الى شهر اكتوبر لاني سمعت انه افضل وقت للضراب ومنها مايتغير حليب الناقه
شوركم اضرب الناقه قبل يدخل الصيف ولا انتظر الى اكتوبر وهل صحيح ان اكتوبر افضل وقت للضراب
ولو خليت الناقه من الحين لاكتوبر ست شهور قدام متى ببنقطع حليبها


وجزاكم الله خير

[سعيد بن عياش]

سلمك الله لو ضربتها ذلحين فولادها بيكون في الصيف القادم والصيف متعب ولاده وربما يموت فيع بعض مواليده . واما قطع الحليب فالابل ما هي بسوا بعضها تحلب إلى ثمانية اشهر من لقاحها وبعضها ينكفت حليبها في ثلاثة وحليب اللقحة ينعاف.هذا رايي وعفاك واهل الخبرة من المشاركين اصوب مني كلام

[راعي المنيفه]

مشكور ياسعيد ولاهنت
انت تقول الحليب يجلس ٨ شهور من لقاحها او اقل
وحليب الخلفه مثل ماقلت ينعاف ويضر الناقه واللي في بطنها
بس السؤال اذا ماضربها الفحل وحوارها ذلحين عمره ٣ شهور متى ينقطع حليبها
يعني لو ماوديتها للفحل الا بعد ست شهور بينقطع حليبها ولا لا
ونستفيد منكم ومشكور مره ثانيه واستفدت منك ياسعيد

[مريقب العيفار]

انا مع تكسيب الخلفة

لكن الوقت متاخر

والولاد بيكون بالصيف

الحليب العام عندي خلفة نحلبها وبكرتها ام ستة شهور

لكن حلب الكسوب ماهو طيب

لانك تحلبها وحوارها يرضعها ويش يبقى للي في بطنها

[راعي المنيفه]

شكرا يامريقيب

تم تاجيل الضراب للناقه الى اكتوبر
والله يكتب اللي فيه خير لنا ولكم..

[كايد]

بتخرب طبع البيعير

البعير اذا اضرب الخلفة يعاف المياسير من عشرا ولا عجوم ولا حيل

نصيحة لك.ولباقي الاخوان باخبار صاحب البعير بأن ناقتك خلفة .

[مريقب العيفار]

بتخرب طبع البيعير

البعير اذا اضرب الخلفة يعاف المياسير من عشرا ولا عجوم ولا حيل

نصيحة لك.ولباقي الاخوان باخبار صاحب البعير بأن ناقتك خلفة .

مالك لوا

انا فاك البعير مع النياق ومخليه يضرب اللي يبي من خلفه والا بكرة

ولا خرب طبعه ولا شي

يضرب الميسر سواءا كانت خلفه والا بكرة

وهو معروف ان البعير يحب ضراب الخلفة

لكن هذا ما يخرب طبع البعير

و

[راعي سهوه]

الضراب الحين مهوب زين احسن شي فالضراب ﻻهب البراد في شهر 12