الباترول يطفي .... 2008

[ذيب سايه]

السلام عليكم



معي ربع 2008 بعض المرات يشتغل من اول نقره وبعض المرات من خامس نقره او عاشر نقره بعد ..

شكيت بالكتاوت لكن استبعدتها لانه يشتغل ، الزبده اليوم عبيت بنزين ومشيت مسافة 10 كيلو الا ويطفي علي والسياره ماشيه ، بعدين وقفت وشغلت واشتغل ، ومشيت شوي ويطفي مره ثانيه .. الحين خايف ادخل به زحمه ويطفي علي فالحر ذا ثم اشب فيه ..


ابي الحل بارك الله فيكم ، مايصير كذا كنت استخدم تويوتا ولاصار ذا الكلام فيه ، دلوني على حل يخلصني من ذا المشكله او اني ابيع السياره وافتك منها ..

[sgl2002]

اذا طفى ودقيت سلف تسمع صوت الطرمبة ورا ززززززز؟

[سفاري 95]

عليكم السلام ورحمه الله وبركاته

اخوي اول شي شيك على طرمبه البنزين اللي داخل التانكي
تدق السلف لين تشتغل لمبات الطبلون فقط بدون التشغيل اذا سمعت صوت زنننه في التانكي معناه ان الطرمبه كويسه
واذا مافي صوت معناه فيه مشكله منها .. احيانا مع الضرب او الدق القوي على فتحته التانكي اللي ورا تحت الفرشه الخلفيه تشتغل الطرمبه .. لكن هذا حل مؤقت فقط

موفق اخوي

[ذيب سايه]

مرات تشتغل ويطلع لها صوت بس بعد طلوع الروح ، ومرات ماتشتغل الا بعد ١٠ دقايق ادق سلف واصك وزي كذا لين اسمع صوتها وثم اشغل السياره وتشتغل وتتفتف وتطفي وبعدين مع النقره التاليه تشتغل

[سفاري 95]

معناه مشكلتك من الطرمبه يبيلها تغيير وافضل لك تغير طرمبه فتك والله يسهل امرك

[حمد808]

غير صفاية البانزين شكله منسده

[ذيب سايه]

صفاية البنزين مالي اسبوع مغيرها

[ذيب سايه]

مشاكل الباترول دايم من الطرمبه الزفت ذي ،
بغيرها ان شاء الله وباركب حقت لاندكروزر لأني ماقد سمعت احد يشتكي من طرمبة اللاند ..


وش رايكم ..

[sgl2002]

لا لا اخوي


انا موتري باترول زي اللي معك


اول شي غير الكتاوت بخمسين ريال

وان ماضبط غير الطرمبة بطرمبة فتك


سهلة التركيب ومناسبه للمكينه وعمليه جدا


انا مركبها من سنتين ما اشتكت ابشرك والعزم ماتغير هو هو

وفوق كذا دايم اصفر البنزين ولا قد خربت



نصيحه ثم نصيحه طرمبة الفتك مناسبه لموتر والكهرباء

[ذيب سايه]

^^

الله يسعدك ،

طيب البلا لو من الكتاوت تطفي السياره وهي ماشيه ؟

انا احس ان الطرمبه تبي تودع خلاص لأني اشم ريحة بنزين بعد واذا شغلتها تتفتف وتطفي وتستمر ع ذا الحال لين ييسرها ربي وتشتغل .



طرمبة الفتك تركب ع طول والا لازم توليفات وكذا ؟

[sgl2002]

توليف بسيط جدا

الفيش يختلف يغيره بفيش يركب عليها ويلحم الاسلاك صح ويحط عليها غلاف

ويربطها على القاعده


زي الحين لاركب مسجل مايغيرون الفيش لنفس الفيش المسجل ؟؟

هذا نفسه


ولاتخاف انا مغيرها من سنتين وجاها كرف الله لايوريك واستخدامي اكثره بر ومطبات وهبد ومع ذلك ماجاه شي

[ذيب سايه]

الله يعطيك العافيه ياخوي


لكن عندي استفسار بسيط عن الطرمبه اللي عندي ،

هي صوتها حلو وممتاز لكن ماتشتغل على طول يعني مااسمعها تشتغل مع السوتش الا بعد محاولات كثيره ، واذا اشتغلت صوتها قوي واحس دفعها ممتاز ولابه شي ، ؟؟ اللي يمخول راسي ليش ماتشتغل على طول !!؟

[ذيب سايه]

الحمد لله عرفت العله ، طلعت الكتاوت .

توني فصلتها ورجعتها وادق سلف واسمع صوت الطرمبه يون الحمد لله . بكره ان شاء الله باشتري طقم كتاوت واركبها .



بس اخر سؤال وانا داري اني طولتها .

الحين اذا الكتاوت حقت الطرمبه خربت والسياره ماشيه ، السياره تطفي والا لا ؟؟ بس ذا هو السؤال ..



وشكراً لكل من أدلى بدلوه وأفادتي .

[الشرقيه 03]

ايه يالغالي تطفي وانت ماشي غيرها وخل معك واحد اضافي للحيطة

[شاد الرحال]

الحمد لله عرفت العله ، طلعت الكتاوت .

توني فصلتها ورجعتها وادق سلف واسمع صوت الطرمبه يون الحمد لله . بكره ان شاء الله باشتري طقم كتاوت واركبها .



بس اخر سؤال وانا داري اني طولتها .

الحين اذا الكتاوت حقت الطرمبه خربت والسياره ماشيه ، السياره تطفي والا لا ؟؟ بس ذا هو السؤال ..



وشكراً لكل من أدلى بدلوه وأفادتي .

لا هنت

وين مكان هالكتاوت بالضبط ؟ اذا ممكن تضع صور لان عندي نفس مشكلتك

[رفلوا]

اكيد انها طرمبه البانزين لانها تعبي ولما تفضي يطفي وشف رقرب ورشه يفحص لك من الي لما يفتح الناريه اذا دفعها قوي تكون ممتازه واذا ضعيفه او ما يطلع البانزين وللعلم تري يصير عزم الموتر ضعيف ولا يسحب الله يعينك وبدلها والله يوفقك

[ذيب سايه]

ابشركم شريت كتاوت من النوع الجديد اللي يجي لونها أخضر ، ميزتها انها تجي مقفله من كل الجوانب بسلكون عشان مايدخلها تراب الله يعزكم ..


والموتر تغير وصار يشتغل على طول من اول نقره الحمد لله وراحت التفتفه اللي فيه وكل المشاكل اللي ذكرتها .

اللي يبي الكتاوت يروح لأقرب قطع غيار نيسان ويقله ابي كتاوت من الجديده وهذا رقمها : 25230vs50a


وجزاكم الله خير اللي شاركتوا معي وعطيتوني حلول وبالتوفيق للجميع .