ياراعين اللاندكروزر 2007 وتحت ابي مشورتكم لاهنتوا

[مفضخ الشري]

السلام عليكم


ياشباب و ياشيبان راعين اللاندكروزر 2007 وتحت ابي شوركم

معي لاندكروزر توني شاريه من الوالد مستخدمه قبلي مديله 2001 جكسار, الموتر من وكالته مانفك شيء في البطن ولا تغير شيء الا المساعدات فقط لا غير

الموتر فيه نفضه على ادنى شيء امشي عليه يعني لو امشي على عيون القطط كل شيء يرج حتى الدركسون و احس بطقطقه بالدركسون مع الحفر و الرساوه ماهنا رساوه خضخضه


وانا ودي انفض تحتي الموتر كامل من الى لأني بستخدم إلى ما يشاء الله ولا ودي اغير شيء مايستاهل التغيير فـ دامكم تبخصون بالموتر وش اللي دايم يحتاج تغيير معكم او اللي تغيره ويتغير عليك مطب الموتر و يصير متماسك و شاد ؟

و كم يكلف تقريباً نفض تحتي الموتر قطع بس لأني سألت حق محل قطع غيار قال لي عطني القطع اللي تبيها قلت كل قطع التحتيه قال مقدر اعطيك سعر محدد عطني كل قطعه بأسمها وانا ما في راسي شيء لكن على كلامه يقول بتكلف عليك القطع اذا بتغير كلش حول 4 الاف صحيح هالكلام؟

[بدوي جنوبي]

عليكم السلام
اترك المجال لحقين الجيوب يعطوك العلم الوكاد
في غيار القطع المفترض تغييرها بأقل التكاليف

[مفضخ الشري]

عليكم السلام
اترك المجال لحقين الجيوب يعطوك العلم الوكاد
في غيار القطع المفترض تغييرها بأقل التكاليف

حياك الله ولا نستغني عن مشورتك :good2:
وش تقصد بالقطع اللي تتغير بأقل التكاليف اذا قصدك جلد المشكله اغلب الجلد ماتجي لحالها يابعدي اقصد جلد الركب و المقصات الاماميه و المقصات الخلفيه لازم تشتري كل شيء كامل على كلام موزعين تويوتا يعني الجلده اللي تكلف 20 ريال لازم اشتري عشانها الركبه كامله مع المقص بمبلغ وقدره مهب هين

ياحليل الباثفندر توهقنا فيه هالجيب ههههه

[رياح الشرق1]

والله الجيوب هذي بلشه بس اسمع رح لمكانيكي فاهم وزين وخله ينفضه ويفحصه من الى وهو يحددلك وش يبي تغير يمكن كراسي البدي يمكن شدادات الدفرنس يمكن جلد العكس اذا هي تهرب لازم تغير وتجي صغير وكبير مع شحمها وبعدين لاتدقق با بسط الامور طنش الي ماله داعي لانك اذا تتبع من وين الصوت هذا وهذا تتعب

[الوقيدي]

السلام عليكم : لاتستعجل شيك ثم غير التالف المساعدات + مساعد الدركسون + شدادات الدفرنسات + الجوزات + رمانات العكوس الاماميه ( الفلنجات) + وكراسي الماكينه والقير + صليب الدركسون وهل الدوده التحتيه فيها فضاوه . حاول ان تخرج بأقل التكالف .

[قناص الوجه518]

انا كانت عندي نفس المشكلة بس يوم اشغله ينفض كامل الجيب وغيرت كراسي مكينة وزبط الحمدالله

[ابو رامي الجو]

وأريد أضيف لك تكمله كما قالو شباب مكشات الله يحفظنا ويحفظهم اهم شي هي البيضات وناس تسميها الكفه فوق وتحت يمين ويسار والاذرعه والأسعار ترها تفرق من محل الى محل رحت ابحث عن بيضات الجيب عند واحد موزع لقطع تايوتا الأصلية هندي والقا سعرها650 وكنت أخذ اول قطع من محل يعني عميل قالي السعر 750 يعني اسأل عن الأسعار قبل التركيب وتفرق معك اذا استغلونا كل قطعه تفرق 100ريال انت احق بها لان الأسعار كلن يعطيك سعر والشباب يفيدونك. عندك ماشاء الله أصيل الحجازي:l وبدوي جنوبي :lوكبسوله 2 :l اذا نصحوك بحاجه فتوكل على الله وسوها ولاهو قصور بالباقين من مشرفين وأعضاء وعن نفسي انني استفدت منهم الشي الكثير رغم دخولي للمنتدى الغالي على نفسي والله يوفق الجميع لما يحب ويرضا:lr

[ابوذيبان]

وعليكم السلام .

اول خطوة ولاتكلفك شي . فك عامود الدبل . وجرب السيارة بدونه

اذا انتهت المشكلة الحمدلله . معناها من العامود . وممكن يصلح ويرصص .

اما اذا استمرت المشكلة . تأكد من صليب عامود كردان الامامي والخلفي .

وتأكد من الكفرات . مشاكلها كثيرة وحساسة

مبروك السيارة .

وفقك الله

[مفضخ الشري]

والله الجيوب هذي بلشه بس اسمع رح لمكانيكي فاهم وزين وخله ينفضه ويفحصه من الى وهو يحددلك وش يبي تغير يمكن كراسي البدي يمكن شدادات الدفرنس يمكن جلد العكس اذا هي تهرب لازم تغير وتجي صغير وكبير مع شحمها وبعدين لاتدقق با بسط الامور طنش الي ماله داعي لانك اذا تتبع من وين الصوت هذا وهذا تتعب

الله يعطيك العافيه و الحمد لله مافيه تهريب من العكوس كلها سليمه لكن مشكلتي في المطبات والحفر وعيون القطط تنفض الموتر و الحمد لله مافيه اصوات لكن المشكله بالمطب ادنى شيء احس فيه وينفض الموتر بسبب قوطي ببسي


السلام عليكم : لاتستعجل شيك ثم غير التالف المساعدات + مساعد الدركسون + شدادات الدفرنسات + الجوزات + رمانات العكوس الاماميه ( الفلنجات) + وكراسي الماكينه والقير + صليب الدركسون وهل الدوده التحتيه فيها فضاوه . حاول ان تخرج بأقل التكالف .

الله يعطيك العافيه سجلت كل ماقلته عندي ماعدى مساعد الدركسون لاني كنت بغيره احسبه زي الباثفندر طلع بدون مساعد دركسون و جاري التشييك على ما تم ذكره

[مفضخ الشري]

انا كانت عندي نفس المشكلة بس يوم اشغله ينفض كامل الجيب وغيرت كراسي مكينة وزبط الحمدالله

يعطيك العافيه الكراسي سليمه توني مغير مكينه كامله و قبل لا اركبها شريت لها كراسي جدد


وأريد أضيف لك تكمله كما قالو شباب مكشات الله يحفظنا ويحفظهم اهم شي هي البيضات وناس تسميها الكفه فوق وتحت يمين ويسار والاذرعه والأسعار ترها تفرق من محل الى محل رحت ابحث عن بيضات الجيب عند واحد موزع لقطع تايوتا الأصلية هندي والقا سعرها650 وكنت أخذ اول قطع من محل يعني عميل قالي السعر 750 يعني اسأل عن الأسعار قبل التركيب وتفرق معك اذا استغلونا كل قطعه تفرق 100ريال انت احق بها لان الأسعار كلن يعطيك سعر والشباب يفيدونك. عندك ماشاء الله أصيل الحجازي:l وبدوي جنوبي :lوكبسوله 2 :l اذا نصحوك بحاجه فتوكل على الله وسوها ولاهو قصور بالباقين من مشرفين وأعضاء وعن نفسي انني استفدت منهم الشي الكثير رغم دخولي للمنتدى الغالي على نفسي والله يوفق الجميع لما يحب ويرضا:lr

الله يعطيك العافيه بس مافهمت قصدك بالبيضات اتوقع انك تقصد الركبه لان سعرها نفس ماقلت انت حوالي 700 للجهه الوحده تجي كامله مع المقص و المشكله انك ماتحتاجها احياناً تحتاج الجلده فقط لكنها ماتنباع لحالها لازم تشتري مقص مع ركبه بـ700 يعني جهتين 1400 ريال
بارك الله فيك


وعليكم السلام .

اول خطوة ولاتكلفك شي . فك عامود الدبل . وجرب السيارة بدونه

اذا انتهت المشكلة الحمدلله . معناها من العامود . وممكن يصلح ويرصص .

اما اذا استمرت المشكلة . تأكد من صليب عامود كردان الامامي والخلفي .

وتأكد من الكفرات . مشاكلها كثيرة وحساسة

مبروك السيارة .

وفقك الله

المشكله بالمطبات وانا مهدي يعني ما اتوقع العمود له علاقه لكن كما تفضلت العمود صحيح فيه رجه على سرعه 110 و بشيك على الصليب لعله يكون سبب الرجه لأن العمود جديد 1300 ريال في الضحيان

و الكفرات دانلوب جديده ان شاء الله مابها شيء

الله يبارك فيك و يجزاك خير

[ابوذيبان]

وفيك بارك يالغالي

تأكد من العامودين .وفك عامود الدبل . سهل جدا وجرب السيارة بدونه واذا كنت منت راعي بر وخصوصا الان قيض

لاتركبه حتى تتأكد من سلامة باقي اجزاء السيارة انا من ثلاث سنوات مرتاح منه

اما الكفرات وحتى لو كانت دنلوب وجديدة . بعضها يجي فيها مشاكل .

انا في العادة اغير الكفرات عند وكيلها بن زقر واخر مرة غيرتها صار عندي رجة مزعجة ومقلقة تشييك الوكالة على

الكفرات يعطي سليمة .مع الفني الفلبيني في شارع الضباب بالرياض .طلب مني ربط رمان الكفرات الامامية

ولم تنتهي المشكلة وضع ترصيص لزق ولم تنتهي المشكلة .طلب مني ارصص ارضي عند المجد او العضيب

ولم تنتهي المشكلة . اخيرا حولني لفرعهم نهاية طريق خريص .ومع الفحص الدقيق على الكفرات مباشرة

تم تغيير كفر علما انه جديد ولم امشي عليه 200كيلو فقط وانتهت المشكلة لله الحمد

وشيك ايضا على كرسي الدودة . مهم جدا قد يكون متأكل .

يسر الله امري وامرك وكل مسلم

0

[سقم المعادي 1]

الجلد تقدر تغيرها بس مافيه جلد اصليه وكاله فيه جلد ياباني درجه اولى و فيه ماليزي و التركيب بالمخرطه و المقصات الخلفيه حقات الـ97 يجي لها جلد اصليه لو تبي تغير ركب مقصات 97 لك و للزمن و متى ماتبي تغير جلدها غيرها

لكن لو تغير كلش وكاله اصلي تراها مهيب خساره الجيب وزنه مايستهان فيه و القطع هذي ركب ومقصات و غيره مافيها مساومه ياركب اصلي ولا لاتفكر لكن انا طرحت لك الحل وانت لك الخيار الحيل قيض وسموم منتب كاشت ولا تعصر عمرك تغير كلش دفعه وحده لو كل شهر تركب لك قطعه معك 5 شهور الى طلعه سهيل ان شاء الله
خذ اللسته هذي و احرص على التشييك عليها انا توني نافض موتري وهذا اللي طلع به :
- مسامير توازن اربعه
- جلد عمود توازن امامي
- شيال دفرنس خلفي وامامي
- كرسي قير
- جلد بدي
- ركبه فوق يمين ويسار

[رحال7]

كان الموتر عندي متهلهل اذا مشيت على مطب فغيرت مقصات وجلد توازن وملحقاتها والاعمده اللي في الجوانب ،،تشوفها من جوانب الموتر والحمد لله تمام
وربما أني غيرت كراسي القير كذلك ،،؟؟؟ لا اذكر لان هذا الكلام مبطي؟

[رحال7]

الجلد تقدر تغيرها بس مافيه جلد اصليه وكاله فيه جلد ياباني درجه اولى و فيه ماليزي و التركيب بالمخرطه و المقصات الخلفيه حقات الـ97 يجي لها جلد اصليه لو تبي تغير ركب مقصات 97 لك و للزمن و متى ماتبي تغير جلدها غيرها

لكن لو تغير كلش وكاله اصلي تراها مهيب خساره الجيب وزنه مايستهان فيه و القطع هذي ركب ومقصات و غيره مافيها مساومه ياركب اصلي ولا لاتفكر لكن انا طرحت لك الحل وانت لك الخيار الحيل قيض وسموم منتب كاشت ولا تعصر عمرك تغير كلش دفعه وحده لو كل شهر تركب لك قطعه معك 5 شهور الى طلعه سهيل ان شاء الله
خذ اللسته هذي و احرص على التشييك عليها انا توني نافض موتري وهذا اللي طلع به :
- مسامير توازن اربعه
- جلد عمود توازن امامي
- شيال دفرنس خلفي وامامي
- كرسي قير
- جلد بدي
- ركبه فوق يمين ويسار

مقصات 97 تركب على 2007?