سـالفة جير/شاهين ضيعته قبل أمس !!!!!!!

[المري]

السلام عليكم ..

أخواني الأعزاء ...

قبل أمس قانص انا واخوي لي غرب الخرسانية وبالتحديد .. غرب شركة الأسمنت اللي في الخرسانية

يوم جاء الضحى قلت لاأخوي : حول ادعى الجير الشاهين وانا بروح اهده عليك.. المهم رحت مسافة نص كيلو وهديته
الماخوذ في اطيار يطرب النفس , ويقند الرأس.

يوم جاءت في نص المسافة وتحول عليها ذيك الغرابين ( والغراب معروف يقلع الطير) المهم اقفت عليها شرق والطريق

السريع شرق منا (( طريق ابو حدرية )) المهم مشيت على حروتها وضيعتها .. رجعت لخوي وشلته .. ورحنا

على حروتها .. ندعي الى صلاة الظهر .. المهم مابان لنا شي .. وقـفـنا وتغدينا وطفينا الجولات واخذنا غفوه..

في شي مهم نسيت لاأقوله لكم , الجير الشاهين في حجل تلفون بجوال الشايب الله يحفظه..

في أثناء ماحن راقدين كلم واحد على جوال الشايب قال : لقيت طيرك مصدوم على السريع !!!

والشايب ماعنده خبر... المهم قال : اي طير . قال : جير الشاهين . قال: لحظة بكلم العيال وبرد عليك..

كلم جولاتنا بس مافيه فايدة .. مطفاه ولاهيب العادة الجوال مطفى .. المهم الشايب هوجس لايكون صار علينا

حادث الله يكفينا الشر !! كلم الرجال اللي ذكر له الطير انه مصدوم .. قال : ياولد الطير انت متأكد ماحولها حادث

لايكون العيال صار عليهم شي !!! قال : لا ماصار عليهم شي , بس حنا لقينا الطير موقع ودعينا باللملواح ولكنه

ماجاء على الملواح , وبعدين فكينا له بومه وصاده على الأسفلت.. وهذه السالفه..

قال: الحمد لله شي اهون من شي..

ياغافلين لك الله , ارقود ولا ندري عن السالفة. أول ماشغلت الجوال , واذا اتصالات الشايب , قال: انتو مضيعين

الشاهين.. قلت: الله الله . قال : أبشر بها بس ميته.. وعطاني السالفة..

والحمد لله على كل حال..

ذكرت هذه القصة لان فيها مثل العجب.

وسلامتكم

اخوكم / المري

[501]

الله يعوض عليهم انشاء با احسن منها

[راعي نواف]

يالله ياكريم تعوض اخو المري في هذا اليوم المبارك خيرا طيبا ان شاء الله.

[المحتطب]

الله يعوضكم بخير منه . :)

.

[الكريزي]

الله يعوض عليك يابومعيض والحمدلله على كل حال

[قلب شاهين]

أخوي المري ،،

الله يعوض عليك طير ازين منه ،،

بس حبيت اسأل سؤال وياليتك تجاوبني //

انت قلت ان الجير شاهين طرح الصيده بالسفلت طيب السؤال يقول هل بس الجيرة الي تطرح بالسفلت ولا الطيور الوحوش ..؟

ليتك فهمت سؤالي وترد علي ،،

[الروقي نت]

العوض على الله والحمد لله على السلامه

[هاوي مقناص]

السلام عليكم ورحمة الله وبركاته ............


اخي ابو معيض والله انها لقصه محزنه بعض الشئ .


وعسا الله يرزقكم با احسن منه . ولكن اخي المري مالاحظت علي الشاهين اي تغيرات طرت عليه ،


خلال هاليومين السابقه من رحلتكم .ومايصير يالغالي تلواح الطير او هدته في الظهر لان بعض الشواهين يالغالي

تحتر وتبي الارتفاع بمسافة 4 او 5 كيلو عن الارض ، واسأ ل مجرب لا ني كان عندي شاهين كان افعوله يطرب القناص واستمرت عندي ثلاث سنوات ،ولكن تصرفاته تغيرت 360 درجه . استوحش الشاهين اللي عندي .
لاني غبت عنه فتره ليست بطويله .

اما بنسبة للغربان ما اظن انها موجوده بالشرقيه ،كان يمكن عابرات الله اعلم .

[المري]

مرحبا بالجميع وجزاكم الله خير.. بخصوص سوال صقار القصيم .. عن كيف تطرح الصيده على الاسفلت ؟؟ اقو ل شي عادي الطير توقع صيدته على الأسفلت .. يحول ويصيدها عادها كأنها على الرمل.. هذا مافهمته من سوالك..

الاخ الخشف :

الجيره عادة ندعيها الصبح والعصر وذلك لكي تكسب لياقة طيبه.. والطيره نفسها ازين بالحيل ولا لاحظت عليها اي شي..

اما قولك الغربان من انها عاابره فاأنا استغرب من كلامك , لانها عندنا بالأجوال , يمكن تحصل 20 جميعا او 30 جميعا ..

وثانيا اكثر الغربان في القيض ماتروح بل تقيض عندنا وخاااصة غرب الدمام..

اخوكم / المري

[أبو شعلان]

معوض إنشاءلله يابومعيض .... والحمد الله ..
ومثل ماقال الشايب ( شي أهون من شي ) ... والله يعوضكم بأطيب منها يارب ....

مشكور على هالقصه ...

,,,,,,,,,,,,,,,,,,,,, تحياتي لك .

[المري]

تسلم يابو شعلان .. وماقصرت يالغالي.. والحمد لله الخير واجد...

عسى الله يديمها من نعمه ..

اخوك / المري

[ابرق العزاف]

اخونا الله يهديك تضيع طير وتقفل الجوال
كييف نوم0000
المهم انك ارتحت 00 لو كان ضايع كان
يمديك تدور عليه000 يعوضك الله خير منه

[المري]

تسلم ياباسل وماقصرت

تذكرت بيت شعر للشاعر - عبدالله ابن عون , عندما لقى طيره ميت..


ليت غدى ياسعود ماحسف الروح **** بس الحسوفه ميتته هالسويا

وليته غدى وارجيه مع كل طاروح *** في المقبله ياملا بها الله يديا

وسلامتكم

اخوك / المري

[عيناوي]

الله يبدلك خيرا منها يابومعيض
مكتوب يا اخوك

[راعي الجير]

الله يعوضك بحسن منه يابو معيض والحمدلله على كل حال

[المري]

عيناوي _ راعي الجير تسلمون وماقصرتوا

[عاشق البسيتين]

الله يعوضك اخير منه

[ابو عايد]

الله يعوض عليك طير ازين منه والحمد الله السلامه يابومعيض

[ابو السلق]

انشاءالله لامسكناة نعلمكم

[هبوب]

اهم شي سلامتكم وخوفتو شايبكم بس لاتطفون الجوالات ويمدحون خدمه موجود اذا مافيه شبكه تحياتي لكم والله يعوضكم

[الوهـ قحطان ـاج]

اخوي المري

الله يعوضك انشاء الله الي ازين منها واهم شي انكم سالمين غانمين

وتحياتي لك وللجميع