الرديترات ( موضوع عام )

[GMC89]

السلام عليكم ورحمة الله وبركاته

الغرض من الموضوع نبي نتكلم عن افضل الرديترات الموجوده بالصناعيه
ومثل ما حنا عارفين السوق مافيه الا نحاس و المنيوم
ولكن الاختلاف في عدد الرصات وانا عندي بعض الاستفسارات

وش الافضل النحاس او الالمنيوم؟
وش الافضل 4 رصات ولا رصتين كبيره ؟

ونبي تفاعل من الناس اللي جربت انواع الرديترات
وان شاء الله ماحد سبقني بالموضوع وسلامتكم …

[الصيادالمليح]

بالنسبة للراديتر على حسب توفر المكان في سيارتك و احتياجك لها
و النحاس و الالمنيوم ما تفرق فرق كبير في التبادل الحراري
و الاهم بعد التركيب هو مراوح التبريد و عددها و حجمها ونوعها
فمروحتين صغار احيانا تكون افضل من مروحة واحدة كبيرة حتى اذا اخترب واحد يكون موجود مروحة اخرى
و نوعية المراوح و المواد المصنوعه منها وجودتها بتعطيك قدرة افضل و اعتمادية و في نفس الوقت مدة تشغيلية اطول
ولا ننسى الفني اللي بيركب هذه الاشياء هل هو متخصص او عليمي لان العليمي ممكن يركب هذه الاشياء و لكن بطريقة تخرب اللي تعبت عليه و دفعت فيه فلوسك

وشكرا على طرحك الموضوع

و جزاك الله خيرا

[مسير عليكم]

موضوع جميل الراديتر يختلف جودته علي حسب صناعته وشركته
انا كان معي فكتوريا غيرت الاديتر بواحد اردني ٤ شهورونكسر
وركبت لعدها كندي له ٤ سنوات ماشاء الله مافكيته
مه العلم سعرهن واحد
اخيرا الامنيوم افضل من النحاس من ناحيه التبريد لانه بسرعه يبرد عيبه اذا خرب اجدعه مايلحم و النحاس يمسك حراره والنحاس افضل من ناحيه المكده يعني تسيخه مره ومرتين وعشر عادي ويتلحم

[GMC89]

بيض الله وجيهكم وكفيتوا و افدتوا

انا افضل الالمنيوم لانه يبرد بسرعه بالذات اذا مسكت خط

[مسير عليكم]

كلامك سليم الامنيوم يبرد بسرعه بس احرص علي الامريكي لسيارات الامريكيه لاتاخذ اردني بحكم تجربه فاااشل وكلهن نفس القيمه

[GMC79]

الالمنيوم بلا نقاش .. انا مستغرب فيه احد الى الان يركب نحاس ؟

[ابوشاهه]

الاديترات محتكره عندنا ..يعني ممنوع يدخل صناعات اخرى غير (الاردني الخايس) ركبت حوالي ثلاثه وكلها تتشقق .. كان سابقا قبل عده سنوات يجي اديترات فلبينيه الحبه 150 ريال فقط .. وتكد لها سنوات .. ثم منع توريدها بحجه انها تنافس الوطني (مصنع السلامه) ..ً وأرى ان الالمنيوم افضل من النحاس بالنسبه لي ..

[GMC89]

فيه الالمنيوم الصيني وش رايكم فيه

[راع الهيل]

اخوي انا معي هلي وصار عليه حادث وانعدم الرديتر ورحت ابشتري رديتر اصلي من الوكاله ولقيته حول 1500 ريال انصدمت من السعر وقلت تدري ابروح ادور بالمحلات يمكن القى سعر اقل وادخل على ذاك اليماني الاجودي طبعا يعرف شكلي من كثر القطع اللي اخذتها منه سألته عن الرديتر الاصلي قالي لاتاخذه غالي انصحك بالرديتر الصيني المنيوم وقيمته200ريال وعلى الشرط بعد وماشاء الله الى يومك تمام التمام طبعا م2007
واسف على الاطاله

[GMC89]

شكرا على افادتكم
نتمنى مشاركةالاخوان