اقتراح

[و بعدين]

يا شباب عندي اقتراح مفيد و دقيق

وهو باختصار:

كل واح يحط في سطح بيته او اي مكن مفتوح وعاء

و في نهاية اليوم او الاسبوع نشوف كم كمية الامطار إلي هطلت

وبكذا نعرف قوة المطر بشكل دقيق .

وانتم عارفين ان الوعاء لازم يكون مساحة فتحته من فوق نفس مساحة قاعدته.

امطار حي الروضة يوم الاثنين إلي فات 20 ملم

[GL2006]

خخخخخ
فكرة حلوة
بس راح يتبخر الماء

[و بعدين]

خخخخخ
فكرة حلوة
بس راح يتبخر الماء

مهو شرط انك تعرف حق اسبوع كامل

وبالنسبة للتبخر فيه حل سهل .

وهو انك تشوف بعد كل مطرة كم ملم وتسجله عندك

ثم تكب (تفرغ) الوعاء وتشوف كم جاه من ملم وهكذا ...

للعلم هذي الطريقة اسويها من اكثر من عشر سنين ولله الحمد

واذكر اقوى مطرة يوم البرد عام 1417 او 1416 ما اتذكر كان وصل في مطرة واحدة قريب 60 ملم في نص ساعة تقريبا

[عاشق الضلعان]

فكره حلوه

لكن فيه مشكله

وهي إنه يمكن ينزل رش على سطح البيت

والحي اللي جنبك يسيل !!!!

مثل ماحصل معي بحايل

جاي على مدخل حايل من جهة القصيم أيام المطر على حايل

وماقدرت أمشي من قوة المطر ووقفت على جنب

وضربت بجنبي صاعقه قويه الظهر

ويوم هجيت عن المنطقه هذي ودخلت حايل لقيتها ممطوره لكم بشكل أخف

وخذ هذي بعد ...

أمطار القصيم الأخيره انا ماحضرتها كلها

لكن قالوا لي بأحد المطرات جاء برد على دوار المحاكم وجنوب

وفي نفس الوقت جت أمطار طيبه ومتوسطه على الفايزيه وماحولها جهة شرق بريده

وجاء رش على الأسكان جهة شمال بريده

والراشديات يقولون ماجاها شي أبد ذاك اليوم !!!!!!!!!!!

يعني في بريده وفي يوم واحد اختلفت كمية المطر

كيف بأسبوع ؟؟؟؟؟؟؟؟؟؟؟؟؟؟



على كلن مشكور أخوي على الموضوع والاقتراح الجيد

[و بعدين]

اشكرك عاشق الضلعان على مداخلتك ..

اولاً : طبعاً هذا اقتراح و مهيب اختراع . يعني ماجبت شيئ من راسي ، والقياسات الدولية كلها بالمليمتر واذا سمعت بالأخبار ان كمية الامطار كذا وكذا يفهم منه ان هناك اداة لقياسه وهذه الاداة لها مواصفات محددة ـ واحنا مانبي منك إلا طشت تثبته بحصاتين ويكفي وإذا جاء المطر غط اصبعك فيه وعطه قياس تقريبي ..

ثانيا : لوفعاها اعضاء مكشات كان يصير مصدر قوي ومحدد وشامل لكثير من الاماكن .

ثالثا : تقدر تقيس امطار لمدة سنة كاملة بعد كل يوم ممطر تسجل كمية المطر ثم تفرغ الوعاء وتبدا من جديد

وبهذا تقدر تقول جانا في الاسبوع هذا كمية كذا و في الشهر هذا كمية كذا .

وبعد كل منطرة إن شاء الله بكتب كمية المطر النازل على سطح بيتها هههههه

[أبو سهيل]

كلام منطقي وجميل ..

يالربع ما فيه مشكلة ..

طشت .. أو صحن ستيل ..

ومسطرة ..

وحدد كمية المطر بدقة ..

بدلاً من التهويل والتضخيم من البعض ..

وخدع التصوير كتقريب العدسة من تلعة صغيرة .. حتى تبدوا للمشاهد كأنها وادي الرمة ..

الهدف من الخبر الصدق والموضوعية ..

وليس التفاخر بكمية المطر التي نزلت على منطقة معينة ..

لأن الله هو المنعم المتفضل ..

فمن وهب السيل لهذا البلد ..

قادراً على أن يحبسه غدأً

ويهبه لبلد آخر ..

أنا مؤيد "الآن" لبعدين ..

وأهيب بالأخوة من هواة تقارير الأمطار ..

تدعيم تقاريرهم بهذه الطريقة السهلة لتحديد كمية الأمطار النازلة ..

[و بعدين]

كمية المطر التي سقطت على حي الروضة تقريبا 3 ملم

هاه عطونا كميات طشوطكم هههههه

[أبو سهيل]

أنا في الروضة "الحي"

وليست روضة الأطفال ..

فلذلك أكيد طشتي من طشتكم 3 ملم ..