مكسف السيارة ما في دفع هواء عند تشغيله !!! :(

[laurel_200L]

السلام عليكم ورحمة الله وبركاته ,,,

يا اخوانصار لي مشكلة في السيارة ومدري وش السبب اليوم شغلت السيارة كالمعتاد احميها 3 دقايق لكن لاحظت اللمبة تبع المكيف اللي مكتوب عليها A\C والعة !! مع اللمبة تبع الضباااب لمبة اللي تخلي القزاز الخلفي حرارة !! والعة مع بعضها مدري ليش

جيت شغلت المكيف على رقم 1 و2 و3 و4 مافي هوا ولا اي شيء ؟؟؟؟ ليش ؟؟؟

مع انو دائم اذا جيت اشغل المكيف اوقف السيارة وقوف تام بعدين اشغله وهالحين مافي هوا ولا اي شيء وش السبب ؟؟؟؟

ملاحظة لاجيت اقفل مفتاح المكيف من 1 الى صفر لمبة البطارية عالطبلون تغمز وتطفي فكيت البطارية لقيت الصبع الموجب مكربن نظفته ورجعته لكن نفس المشكلة المكيف مافي دفع هواء عند تشغيله !!!! :( :( :(

ــــــــــــــــــــــــــــــــــــــــــــــــــ ـــــــــــــــــ

السيارة يارس 2009 قير عادي

[هم الشمالي]

الله هو العالم ان عندك التماس واذا كان الكمبرسر يشتغل اذا شغلت المكيف فعندك المروحه حقت المكيف خربانه او السويك حق المروحه خربان

[laurel_200L]

ساعدونا الله يخليكم :(

[اسدهم]

انت شغل المكيف والمس المواصير اذاهي باردة المروحة واذا مايشتغل المكيف نهايي اقرب محل تكييف يسنعه لك اول شي رح للتكييف وهو يشخص الحالة لك

[أصيل حجآ زي]

﷽
وعليكُم السلام
ورحمة الله وبركاته .

اخي الكريم :

فيه عندّك احتمالين او ثلاثّة :

١ - فتيل / مصهّر ( فيوز fuse )
المروحّة لاذّع / محروق ( فصّل )

تحصلُه في علّب الفتاىل
( فيوز بوكس fuse box )
اما اللي بالغمارّة تحت الطبلون يسار
او اللي بحوض المُحرّك / تحت الكبوت .

مكتوب عليه اما AC Fan
او فقط A/C .

٢ - الاحتمال الثاني وأقوى احتمال
ان رُزمّة المقاومّة ( اللي تتحكّم بسُرعات المروحّة ) محروقّة .
تجدها خلف دُرج الغماَرّة اللي امام الركّب الأمامي بعد ما
تنزّل ( تفُك الدُرج ) في نفس موقع صفايّة مُكيف الغماَرّة .

مشروحّة في
دروسي عن التكييف :
مشروحة بالتفصيل
المُمّل في درس لي '''
تحصلُه في رابط دروسي
المُثبّت بمُقدمة الخيمة بعنوان ؛
دروس لكيف !!! تـُـصـبـح مـُهـنـدس وكـهـربائي
سـيـآرآت ؟؟؟ بطريقة أعملها بنفسك ( DIY } .

٣ - الاحتمال الأخير والاضعّف ؛
خراب المروحّة نفسها / مروحّة المُكيّف .
نتيجّة نشوب شيء ماء ( قلم / وسخ / عود ... الّخ )
بين ريشها مما تسبب في احتراق قلبها الكهربي .

بعض مراوّح المُكيّف :
تصل لها من وراء الدُرج المذكور آنفاً ،
وبعضها راكبّة بين حاجب الريح ( القزاز )
والطبلون من الخارّج او من تحت الكبوت .

[حقائق]

السلام عليكم ورحمة الله وبركاته

-

اتوقع والله واعلم إن

الأهواز الصغيرة الخاصة بالهواء

الموصلة بين المكيف وبين المكينة

احدها قد إنفلت او لسبب ما قد فك من مكانه

والذي له دور في توزيع الهواء وفتح مجاريه

وتأكد من ان جميع هذه الأهواز موصلة

-

دمت والجميع بود

[laurel_200L]

مشكورين كلكم نفر نفر والله ماقصرتو عالردود الله يستر عليكم جميعا ويوفقكم حليت المشكلة الحمدلله

بعد الفحص وجدت فيوز محروق تحت الدركسون لونه ازرق الفيوز مو حق المكيف بس كان محروق غيرته وكل شيء رجع عال عال الحمدلله :) شكرن لكم الله يحفظكم