بسافر بس خايف

[اوبرس]

سلام

شباب بسافر بسيارة وابي اسافر بسياره انا بس خايف اتعطل في الطريق وماحد لك ولا اعرف اتصرف

بروح من الدمام الى دبي 800 كيلو تقريبا

هل الاعطال كثير ام مايصير شي وكيف لو اتعطل

بتوكل على الله وبروح بس مشكلتي خايف نصايحكم ؟؟؟

سيارتي كيا اوبيروس 2005

[رفيع المقام]

وعليكم السلام ورحمة الله وبركاته

أخي الكريم

لابد تسوي بعض التشييكات على السياره .
من الكشف على الإطارات وفحصها .
وتغيير زيت المكينه مع الفلتر أو بدون .
أيضاً إذا كاانت أقمشة الفرمله تحتاج تغيير فغيرها .
كذلك فحص سائل التبريد وهل هناك نقص بالماء أم لا ..


هذه بعض الأشياء التي تحضرني الآن .

[hail_ksa]

شيك على الموتر (واستعمله أسبوع على الأقل داخل المدينه) عشان تتأكد خلوه من الأعطال
بعد كذا تقدر تقرر تسافر عليه وألا يخون فيك

[اوبرس]

هو معي من زمان من سنتين تقريبا

يعني هل اسافر وماراح يصير شي ان شاء الله ؟؟

[sgl2002]

يارجال امش وتوكل على الله الطريق مليان ناس

[جيبي جايزلي]

توكل على الله وسافر وانت مرتاح بس لا تسرع وشيك على الاشياء الضروريه مثل هواء الكفرات وخاصه هواء الستبنه عايره شيك على العفريته وعاير الزيت او غيره ولا تنسى انك في مسؤليه امن الطرق في الطرق السريعه بس اعرف رقمهم هههه

ملاحظه مهمه جدا لا تنسى دعاء السفر وبالتوفيق ان شاء الله

[Abu-U-Sef]

سلام

شباب بسافر بسيارة وابي اسافر بسياره انا بس خايف اتعطل في الطريق وماحد لك ولا اعرف اتصرف

بروح من الدمام الى دبي 800 كيلو تقريبا

هل الاعطال كثير ام مايصير شي وكيف لو اتعطل

بتوكل على الله وبروح بس مشكلتي خايف نصايحكم ؟؟؟

سيارتي كيا اوبيروس 2005


الشباب أفادوك ما شاء الله عليهم وأحب أضيف لا تنسى تشيك على السيور حق السيارة

ومن الدمام الى دبي طريق نظيف و مدعوس وما عليك خوف. المهم انتبه من السرعة الزايدة و تروح و ترجع بالسلامة

[اوبرس]

ان شاء الله والله يسلمكم

بس مانا عارف ازيل الخوف من الاعطال الي براسي :(

[الوسم]

مرتاع إلى هالدرجه ؟؟

[hail_ksa]

ان شاء الله والله يسلمكم

بس مانا عارف ازيل الخوف من الاعطال الي براسي :(


أكرر لك كلامي يا أخي ..
شيك على الموتر واستعمله أسبوع بعد التشييك علشان تتطمن


ولا تنسى تتوكل على الله وتدعي دعاء السفر (فالله خير حافظاً)

[الا سير]

الله ييسر امرك
اهم شي الكفرات
ونظام تبريد المحرك يعني الرديتر والمراوح
واصلاح تهريبات الزيت ان وجدت

[اسدهم]

شيك علا الموتر من المكينة وزيوت والقير ووزن الهواء الكفرات وتكل الله سبحانة واذا وصلت الدمام شيك ع الزيوت والموية الرديتر وسيور هل يبيلها تغيير او تشد السيور همن القرب محل وكالة اشترلك سير مكينة فقط لضرورة اجدعه في شنطة وخل ممشاك عند برودة الشمس يعني مسيان قبل المغرب يكون الجو برد شوي ع الموتر وكل مااخذت كم كيلو وقف وتفقد الموتر من الموية الرديتر

وتوكل علا رب العبادة ولاتنسي دعاء السفر

الله يرجعك لهاك سالم يارب العالمين

[صدى الاطلال]

والله ياخوي انت ادرى بموترك
اذا كان لايوجد به اعطال كبيرة قم بالتشييك عليه كما ذكر الاخوان وتوكل على الله
اما اذا كان الغير فلا تغامر وبالاخص اذا كان معك عائلة اما عزوبي فلا يوجد مشكلة بتصرف حالك
موفق خير

[صياد الاحساء]

انا في البدايه كنت مثلك انا من الاحساء بروح مكه وكنت متخوف قال لي الوالد الله يحفضه غير سير المكينه وحط القديم اسبير وغير زيت المكينه مع السفون وشيك على الفرامل اذ يحتاج تغير وشيك زيت القير وزيت الفرامل وشيك على الأديتر اذ يحتاج تصيخ وعبه ماء اخضر اصلى وشيك غطا الأديتر اذ عند راعي الاديترات وشيك على المراوح وشيك على الكفرات اذ تحتاج تغير اذ نضاف شيك الهوا وشيك الاسبير والعفريته ومفتاح العجل وخذ معك دبه مويه ام ٦ ريال احتياط وكل ٢٠٠ كيلو اذ شفت محطه عب بنزين وخل ممشاك المغرب على البراد بالتوفيق

[كسير الحظ]

ما يصير الا المكتوب
اذا موترك نظيف شيك على الاشياء الي ذكروها الشباب
والكفرات لا تكون قديمه ولا السيور
والسبير لابد يكون جاهز

اذا تبي شوري صل الفجر واتكل على الله ممشى النهار افضل للعوائل
لكن خل ممشاك مبكر حيل
يعني ان حصل تصلي الفجر على طريق بقيق افضل

تاصل لدبي بأذن الله قريب الظهر او الضحى
وضبط الحجز حقك عن طريق موقع بوكنق

حتى لا تلف على الفنادق وانت تعبان وجاي من خط
مباشرة للفندق

وجوالك ضروري مركب عليه خرايط الامارات و السعودية
حتى يساعدك بالتنقل وما تحتاج للسؤال

و الخط حي والناس رايحه جايه اهم شئ خل ممشاك نهار بما انك اول مره تروح عن طريق البر


والله يستر عليك ويحفظك من كل شر
لا تنسى دعاء السفر و الاذكار والحافظ ربك سبحانه