فلان صقار وفلان الصقاره مع درب وهو مع درب

[عاشق التوام]

السلام عليكم ورحمة الله وبركاته

صبحكم - مساكم الله بالخير

وشلونكم ياهل مكشات عساكم على ما نحب ؟

أنقطعنا شبه إنقطاع واكتفينا بالمتابعة لضيق الوقت اللي يسمح بالمشاركات :(




عاد اليوم وفي حروة سهيل واختلاف الليل ودي أطرح موضوع نغير به لهوب القيض :sونقضي به أوقات الفراغ على طريقة المواضيع اللي تدعو للنقاش وإبداء الآراء ليستفيد الكل ويشارك :type:

مالكم بالطويلة :)

تروح وتجي سالفة تدوالها البعض من باب الإتعاظ في هالمجال اللي هي سالفة فلان صقار وهو ما مضاله سنتين فالصقارة وفلان قضى عمره فالصقارة مثل اللي صام وأفطر على بصله راح عمره في الصقارة وللحين هو والطير في جهاد يعني الصقاره مع درب وهو مع درب

وبالفعل اليوم نشوف البعض من مبتدئين الصقاره يصقرون أفضل من البعض اللي لهم سنين في الصقارة
وأعتقد أهم أسباب هالموضوع
تطور آلية الصقارة
من ناحية
الأجهزة اللي دخلت عالم الصقارة من أجهزة تعقّب الطير وقياس الوزن وتعليم الطير على الإرتفاع بواسطة الطيارة وغيرها من الأجهزة



وناحية أخرى
صلابة رأي بعض الصقاقير المخضرمين في تعليم الطير ومتابعته بالطرق البدائية والإعتقاد بأنها أفضل من الطرق الحديثة بالأجهزة وغيرها

أتمنى إبداء آرائكم :director:

وتقبلوا تحياتي

[الصيخي22]

والله يخوي اخلافك الرأي الصقاقير القديمين افضل من التالين ومستحيل يتفوقون على الصقار القديم الاجهزة حلت بعض الامور مثل تعليم الارتفاع والوزن الصقاره مهي فقط تدريب وتدهيل طير الصقارة خبرة نفسية الطير التي ليس لها جهاز يقيسها تعتمد على خبرة الصقار مثال فيه طيور صايدة حبارى ويوم يشترى من صقار جديد ويهده على حبارى مايصيد وفيه صقاقير جدد تشري طيور عشان سبقها على الملواح وقت الهدد ماحولك احد والعكس صحيح على الملواح ماهنا سبق بس على الكروان والا الحبارى ما يمديك تتفرج الا وهو صايد كذلك الجره (الأثر) مايعرف يقص الا صقار قديم ويحدد هل هي ليليه ولا مع الصبح وكم يوم لها وهل هي هارب منه
اخيراً يبقى الصقار القديم صعب التفوق عليه هذا من وجهة نظري

[ابو وافي00]

السلام عليكم ورحمة الله وبركاته
حياك الله أخوي
عاشق التوام
موضوع جميل وتشكر عليه لكن أنا أخالفك الراي
بمجرد أنك تقول فلان قضاء عمره فالصقاره ولازال يجاهد الطير هذا الكلام غير صحيح
الصقار المبتدئ ماتعلم الصقاره الا عن طريق الصقارين القداما
أجهزة الطيور وغيرها
مستحيل أنها تجعل الصقار المبتدى يتفوق على الصقار القديم
الصقاره تحتاج خبره وفراسه وهذي لاتاتي في يوم وليله بل مع خبرة السنين التي قضاها الصقار في مزاولة هذه المهنه
كل يوم نتعلم شي فالصقاره ولازلنا نتعلم والصقاره أنا أعتبرها بحر
كثر ماتاخذ منه مستحيل ينتهي




تحياتي...

[عاشق التوام]

يا هلا والله وغلا بك يالصيخي أنت وأبو وافي
منورين بهالحضور يالغوالي

وأنا بعد ما أخالفكم الرأي

وللعلم أنا أقصد البعض من الصقاقير ما جمعت الأولين

وأقصد بعد أن هناك من الصقاقير القدامى يتصلبون برأي مثال:

صقّار من الأولين غير مقتنع بسالفة ريشة وجهاز المتابعة ويفضّل إنه لا غدى له طير يلوح له ويدعيه من مكان مرتفع في موقع ضياع الطير على حسب خبرته أن الطير ماهوب قاطع له مسافه ماتخليه يشوف الملواح من حين فقدانه

وصقّار من التاليين يلخّص كل هالعملية بالجهاز وريشته وين مايغدي الطير يتبعه لين يلقاه بإذن الله

فالمقصود من الكلام أن هناك من الصقاقير الأولين غير مقتنع بسالفة التطور والحداثة في الصقارة


تحياتي لكم ولآرائكم

[(هزاع)]

حياك الله اخوي عاشق التوام
ويامرحبا بكتاباتك وأرائك
المناقشات المحببه للنفس ذات الطابع المفيد مرغوبه جدا كموضوعك هذا
لاشك ان التطور في كل المجالات مطلب ولوجود هذه الاجهزه الحديثه وستخدام الصقار لها امر عقلاني
عرفت كثير من الصقاره الكبار بالسن الله يرحم من توفا منهم ويطول بعمر الاحياء واغلب اللي لحق على الاجهزه استخدمها
كالحجل والريشه وجهاز التتبع وجهاز المناداه وشريحة المستشفى وما الى ذلك
مع العلم انه فقد على شباب طيور بسبب عدم وضع الريشه او الحجل
واخر طير فقد على احد اخوياي وهو من الصقاره المحترفين كان العام اخر الوقت تنكر الطير وهو بدون ريشه ولاحجل وختفى عن الانظار وراح الى اليوم
ولي عوده باذن الله لموضوعك بارك الله بك

[عاشق التوام]

البقا والعمر الطويل على طاعة الله أخوي هزاع
والله يقبل منّا ومنك صالح الدعاء والأعمال

شاكر لك هالإطراء والإضافة
تحياتي لك ولحضورك يا بعدي

[وزاري]

من أجمل المواضيع للنقاشات عافاك الله



رحمه الله من مات من شيبان خاويتهم في المقناص ...توفي أحدهم قبل أسبوعين وصل الثمانين والصقارة أكثر 55سنة ولله أني أتذكر ضحكاتهم وتعليقهم على بعض رحمة الله عليهم ويحفظ الله لنا من بقي


ولله أن السمرة بالليل شئ والسواليف شئ ثاني



-----------------------------------------------






هذا واحد طاقه كعابي لو أنه عند أجدادنا كان أما يصيد أو الموت



لكنه الدلع والفسق يسوي كذا


http://im90.gulfup.com/cfGnFR.jpg (http://www.gulfup.com/?r12psu)


+
+



http://im71.gulfup.com/Gtc2xI.jpg (http://www.gulfup.com/?rKfgI7)

[عاشق التوام]

هههههههههههههههههههه

يا هلا وغلا بك يالوزاري
أضحك الله سنك أنت ومن يقرأ
إي والله الدلع ومايسوي

أسعدني إطرائك وحضورك لاعدمتك

[استاذ]

عرب وعادات العرب اختلاف الراي مافي شي جديد
لكن يتفقون على كلمة التوحيد والحمد لله على ذلك لونهم اختلفو بادىء الامر لكن بالنهايه اتفقو والحمد لله
لكن السؤال :هل ترى يالنشمي ان الصقاره بكثر الصيد او بتعليم الطير العلوم المحببه

[عاشق التوام]

أولاً
أرحب بإضافتك أخوي استاذ
ثانياً
الصيد وفقه ورزق من رب العالمين
أحياناً يكون هناك صقّار محترف ولكن لم يقسم له مقسوم
ويكون بنفس الوقت جاهل يقسم له رزق مجموعة محترفين

وأتمنى إفادتي بـ (العلوم المحببة) التي تقصدها؟

[أبو العنود1]

اخي وصاحبي الصقارين القدم اقل مافيهم متمسكين بالعادات والتقاليد التي تشرف كل صقار انهم مايزاحمون الناس على ارزاقهم انهم مابهم حسد ونيات طيبه ويعرف طيره ويغليه مثل غلا عياله وكان بالاساس مصدر قوتهم
ويصيدون لا اجهزه ولا هم يحزنون حاجتهم الان حط اصوات طيور وقضو على الصيد وابادوه لكن الريشه والتتبع انا معها اريح لك لكن خبرتهم ماتلقى زيها كنه بخن بالطير او بخن بالصيد


والصقارين الجديد تجد من تبع طريق الاولين وحذى حذيهم وبعضهم جنب بالحيل وماهو حول الخير شر وشريره لكن نقول ان خليت بليت والله يصلحنا جميع

[عاشق التوام]

اللهم آمين

أسعدني إبداء رأيك أخوي أبو العنود
شاكر لك هالحضور

[ابو سلطان898]

السلام عليكم ورحمة الله وبركاته
الله يلحقنا وياكم خير
ويبارك لنا في شعبان ويلحقنا رمضان ويجعلنا من صوامه وقوامه
او

[ابو سلطان898]

بالنسبه لموضوع صقارة الاولين والجيل الجديد
اذا هي في موضوع الاجهزه وقياس الوزن فالتالين تفوقوا وخدمتهم التقنيه لكن الصقار منهم يعني ماهو كلهم
لكن ليس هناك مجال للمقارنه مع الجيل القديم من ناحية فنون الصقاره والتعامل مع الطير وفن البحث عن الصيد والعادات والتقاليد
لو لاحظت الجيل الجديد لقيت اكثرهم يروح الموسم وهو ماصاد نفسية طيره والدليل مثل ماذكروا الاخوان شف سوق الطيور اكثر اللي جاي يبيع شباب وجدد على الصقاره

[راكان1000]

اشكرك على الموضوع والاجهزه المتطوره فى التتبع وفى لياقة الطير مطلوبه لاكن هل فيه جهاز يعطى الصقار خبره فى فنون القنص وطريقه تتبع امكان الصيد وعبورها وكيفيت التعامل مع أثر الحبارى وهل هى من اول الليل ولا مع وجه الصبح ولا هارب الحين واذا طارت وين وجهتها الاصليه والكثير الكثير ما يجهل الجيل الجديد ولا اعمم ولاكن اكثرهم يحتاج للجيل القديم لأخذ الخبره منهم وانا شخصيا استفدة الكثير ومن خاواهم( الجيل القديم) يعرف ذلك ومن حسنات الجيل القديم التى لاحظتها الحفاظ على البيئه والركاده فى المقناص وسوالفهم عن الماضى والعزيمه على المقناص ومعرفة الاماكن ومعرفه معالمها ومسمياتها بدون Germin وسوالف عن احداث وتاريخ اجدادنا ومعاناتهم فى القدم فى نفس منطقه المقناص ومن حسنات الجيل القديم رفع معنويه خوياه واخذ الاراء السديده منهم وتعليم الجيل الجديد التعامل من عادات وتقاليد وسنع المقناص .......الخ الله يخليهم لنا الخلاصه فى رأى الشخصى مافيه مقارنه بين الجيل القديم والجديد وما كل من نقل طير واجاد لياقته على الحمام اصبح صقار

[حجاب ودهيس]

خير الكلام ماقل ودل
تغيرت الطيور وتغيرت صقارت الأولين
ولا كل من نقل طير صقار

[المطيري99]

الاخ عاشق وجميع الاخوه/السلام عليكم / القضية ليس ان نقول فلان صقار وفلان...فالعز والفخربتقوى الله وبالنسبة للاجهزةواستخدام المبتدئين لها بدلا من الطرق البدائية فلم تقتصر تلك الطريقة على المبتدئن وحدهم وهم احرص الناس على المحافظه على طيورهم فلا نتفاخر على شيابنا الصقارين فهم الخير والبركه وعندمانراهم في المقناص نفرح بشوفتهم ونخدمهم فهم يقرأون مانكتب عنهم والذي بعضه يندى له الجبين وما تعلمنا وتولعنا بهذه الهوايه الا عندما جالسناهم وخالطناهم فهم بعيدين عن الحسد وعن الاسراف في الصيد وعن كل مايغضب الله ولكم مني كل الحب والتقدير

[جلاد الحباري]

بأختصار نقطة ضعف الصقار القديم انه ما كان يجرد الطير ويعطيه حقه بالملواح

[أبو العنود1]

وماكان يطلق طيره ورى حمام ههههههههههههههههههههه
كان على الحبارى ارنب بس
اما حمام بري مدري حمام سوادي الشغله هذي مايعيرونه اهتمام لانهم يخلون بذهن الطير الصيد الدسم

[عاشق التوام]

وعليكم السلام ورحمة الله وبركاته
ياهلا بأخوي أبو سلطان 898
الله يقبل منا ومنك صالح الدعاء والأعمال

أسعدني حضورك وإبداء رأيك يا بعدي

[عاشق التوام]

لاشكر على واجب أخوي راكان 1000

وأبداً مافي جهاز يعطي المبتدئين خبرة الأولين ولايقاسون الأولين بالتاليين نهائياً

منورني بهالمشاركة لاعدمتك

[عاشق التوام]

هلا بك أخوي حجاب ودهيس
ولكن موب مره تغيرت
صحيح حدث تغيير لكن في أصول ماطرا عليها التغيير ولا يمكن أنها تتغير أبداً وبتبقى على ماتبقى عليه هالهواية

تحياتي لك ولمرورك يابعدي

[عاشق التوام]

وعليكم السلام ورحمة الله وبركاته
هلا بك يالمطيري 99
مافي أدنى شك
العز والفخر بتقوى الله سبحانه

وشاكر لك إبداء الرأي والحضور يالأمير

[عاشق التوام]

كلن على قده يمد لحافه
منورني بهالحضور أخوي جلاد الحباري
تحياتي لك

[عاشق التوام]

وماكان يطلق طيره ورى حمام ههههههههههههههههههههه
كان على الحبارى ارنب بس
اما حمام بري مدري حمام سوادي الشغله هذي مايعيرونه اهتمام لانهم يخلون بذهن الطير الصيد الدسم



هههههههههههه
تطليق ميداني مافيه مزوح
ياصايب يا خايب

من الطفره موب منهم يابو العنود

[عاشق التوام]

أخواني الصقاقير
الله يعطيكم العافية على هالمشاركات وإبداء الآراء والتفاعل
الأولين هم معلمينا وهم هل الأوله ولا فيها مناقشه
ولكن
أنا قصدت أن في صقاقير من الأولين وليس كل الأولين
يُعتبر (صليب راي) أعني متمسك بمعرفته فقط ولا يتقبل من غيره
أن اللي يشوفها هو هي الصقارة واللي من غيره إن جات من واحد أقل منه عمر في هذي الهواية مايستمع منه وإن كانه على صواب

[ابو امجد 11]

الصقارين القدماء لايعلى عليهم ابد وهذا لاحظت ان الغالبيه متفقين عليه

وانا حاب اذكر تقطه وحده وهل فنهم الراقي بالتعامل مع بعض ومحبتهم

لبعض واذا حصلوا الحبارى كلاً يقدم خويه وبعضهم يحلف ان يهد فلان

اما حنا البعض منا واكاد اقول ان النسبة 50٪ منا يفتقر لنوعية التعامل

هذه فاحيان نهد على بعضنا ..

والنقطه الثانيه ماعاد فيه شخص يقال فلان مرجع سواء بعرف نوع الطير

او امراض الطيور يعني صار الكل يعرف ولو انه مايعرف يعطيك حل هههه

قداماء الصقارين اذا مايعرف السالفه يقول ماعرف وماتاخذه العزه بالأثم

على رأي معين .

لكن نقول الله يرحم الاموات اللي تركوا لنا كنز نقتدي به والله يهدينا ويهدي

شبابنا لكل خير

[نجم404]

السلام عليكم ورحمة الله وبرگاته

مرحبا ومسهـلا اخوي ابو وافي على مواضيعك الرائعة بالنسبة لي اتفق مع ابو امجد بالاضافة لصقارين
هاليومين ماعندهم شي اسمه صبر من ناحية تعليم الطير وتدهيله واطباعه نهـائياً الى من رحم الله وكذلك كثرة اجهزة الصيد كالصويا وغيره وقلة الصيد هالايام عن قبل . الله يجمعنا وياگم على الطاعة ويرحم موتى المسلمين

[ABO NeF]

وش الصقاره ياهل الولع والصقاره
ترا الصقاره ماهي تورات وانجيل
تبقى الصقاره بالفهــــــم والجداره
وخوة رجالٍ هم نشـــــاما حلاحيل
يقولهــــــــــا من صايبن في قراره
شخصنٍ يقّيم مستــــواه الرياجيل
مايعِرف الصقـــــار الا باشـــــاره
شف وش فعوله لانها اكبر ادِليـــل
امـــــــا يوّنس خاطــــــره بالدواره
والا خســــاير للعزب والدرابيـــــل
طيرن لصقــــــاره يجيب الصداره
وطيرن معود صــــــاحبه للبهاديل
بعض العرب صقـــــــارته للتجاره
والبعض الاخر ينقـــله حزه سهيل
ومنهم بعد من مــاخذه باستشاره
عشـــــــان لاشــــاله يجر المووايل
وترا الــــولع ياعاشقين الصقـــاره
ماهي سوالف ليــــل والا تعاليـــل
وترا الهدف من نقلتـــه بافتخـــاره
يومـــن تقفي شارداتــــــن مهابيل
يطــــربك لامنه كفخ باستـــــــداره
في وادي الشاضي والا وراء ليــل
وطلعه وكـــــاد ولارجع للغمـــــــاره
ولاراحت ايامــــــه حباري معازيل
وهده من الهــــــــدات باول نهاره
هاذي تساوي جلسه القال والقيل
ابو نايف الدهمشي

[وكّار مكّار]

السلام عليكم ورحمة الله و بركاته

الفرق بسيط

الاول في مقناص لكن مافيه صقاره او ماتتقارن بصقارة اليوم

واليوم في صقاره لكن يكاد ينعدم المقناص



الاول مايندعا الطير واجد .. لانه ممكن يصادف حباره بعد الدعو
واليوم لو تدعا من الصبح للعصر محد بيلومك ..


تقبلو تحياتي :)

[كايد]

الحين مع احترامي صقاقير هد حمام وتصوير ...استقرام <<<<ت
لدرجة صرت اكره شئ اسمه تصوير .
وللاسف اقول كثرو نقالة الطيور وندرو الصقاقير .