مشكلة في مكيف الباترول_(يشتغل الكمبرسر بس ماينفخ )

[N.m.a]

سلام عليكم
قبل امس شغلت المكيف واشتغل الكرمبروسر بس ما اشتغلت المراوح

فتحت الهواية وتركته نص ساعه و جربت اشغل المكيف واشتغل

يوم جاء قبل شوي سوا سواته (( الكرمبروسر يشتغل بس ما ينفخ المكيف داخل الغمارة ))

وش السوات ؟ في نظري ان المشكلة بسيطة
وش الحل ؟
الموتر باترول ربع 2003

[أحمد محمد1429]

المروحه عندك ماتشتغل اول شئ شيك على الفيوز اذا هي سليمه اضرب المروحه من تحت يمكن تكون معلقه فحماتها

[N.m.a]

المروحه عندك ماتشتغل اول شئ شيك على الفيوز اذا هي سليمه اضرب المروحه من تحت يمكن تكون معلقه فحماتها

هل ممكن يكون الفيوز خربان وهي تطفي وقت وتشتغل وقت ؟؟ ووين مكان فيوزها ؟
من اي مكان اطق ؟ من جهة طفاية الدخان ؟

[أحمد محمد1429]

نعم ممكن يكون من الفيوز .. الفيوز يكون سليم غير مقطوع من الداخل بس قد يكون مع المطبات والإهتزاز يتحرك فا راجع الفيوزات اول.. بالنسبه شف المروحه من الجانب الأيمن تحت الدرج قاعدتها دائريه والدائره فيها بروز دائري للأسفل اضرب البروز بشكل خفيف بزراديه أوبمقبض المفك والكومبروسر شغال.... وإذا اشتغلت معك بالضرب معناه الفحمات عندك منتهيه والأفضل تغيرها كامله من التشليح وتحصلهن بكثره

[4200]

افتح علبة الفيوزات وشيك عليها وحده وحده ومكان المروحه اعتقد انه تحت الدرج

[عميد آسيا]

هل الكمبروسر يشتغل و الدفع ضعيف لدرجة تقريبا ما فيه هواء؟
هل إذا شغلت المكيف بعض الأحيان تسمع صوت صفير؟

أتوقع شيئين 1-الكتاوت 2-المروحة
اثنينهم لي تجارب معهم الأول إذا دقيته بمفك أكثر من مرة تشتغل المروحة و يصير دفعها عادي زي أول و تشغل المكيف أكثر من مرة ما فيه شيء و فجأة يقف الهواء حتى لو كان شغال
أما المروحة الدفع ضعيف و صوت الصفير مع الوقت يكثر تسمع أول ما تشغل المكيف و يكون الصوت معك و إذا طفيته و شغلته يروح لكن مع الوقت يبقى على طول

و مكان الكتاوت تخت الدرج أتوفع(تخمين) زي سيارتي كابرس 93

[اسدهم]

مــــــــروحـــــــة

[روقي نجد...]

هذا الخراب حصل معي قبل شهرين تقريباً (وكلٍ عطاني كلام من عنده) وطلع بالأخير من الإلكترون وتم تصليحه عند كهربائي تركي فاهم في الشغله.

[N.m.a]

هذا الخراب حصل معي قبل شهرين تقريباً (وكلٍ عطاني كلام من عنده) وطلع بالأخير من الإلكترون وتم تصليحه عند كهربائي تركي فاهم في الشغله.


وشو الالكترون ؟

ووين مكان فيوز المروحة ؟

[N.m.a]

هل الكمبروسر يشتغل و الدفع ضعيف لدرجة تقريبا ما فيه هواء؟
هل إذا شغلت المكيف بعض الأحيان تسمع صوت صفير؟

أتوقع شيئين 1-الكتاوت 2-المروحة
اثنينهم لي تجارب معهم الأول إذا دقيته بمفك أكثر من مرة تشتغل المروحة و يصير دفعها عادي زي أول و تشغل المكيف أكثر من مرة ما فيه شيء و فجأة يقف الهواء حتى لو كان شغال
أما المروحة الدفع ضعيف و صوت الصفير مع الوقت يكثر تسمع أول ما تشغل المكيف و يكون الصوت معك و إذا طفيته و شغلته يروح لكن مع الوقت يبقى على طول

و مكان الكتاوت تخت الدرج أتوفع(تخمين) زي سيارتي كابرس 93


اخي العزيز المروحة ما تشتغل ابداً

[alwali]

المروحة خربانه بدلها
صارت معي طلعت المروحة اللي تحت الدرج وفحصتها طلعت ما تشتغل
وركبت وحده جديدة والان اللهم لك الحمد

[عميد آسيا]

اخي العزيز المروحة ما تشتغل ابداً

أسهل شيء تشوفه الكتاوت و أبدأ بالأسهل و لا تغير أي شيء إلا و أنت متأكد

[العطاوي a511]

فك الدرج تحصل فيش راكب في المقاوم ينفك له مسمارين واحد فوق والثاني تحت وده محل اكترونيات يصلحه ب20ريال اذا خرب مره ثانيه معناته المروحه ثقيله لازم تبدلها لانها بتحرق عليك المقاوم كل شوي

[أحمد محمد1429]

لك 3 ايام ولا بعد عطيتنا النتيجه

[موادع 1]

ننتظر النتيجة ياراعي الموتر
لتعم الفائدة للجميع
الله يسهل امورك ويصلح موترك

[laurel_200L]

حصلت معي هذي المشكلة الكمبروسر شغال والمواصير باردة لكن ماكو دفع هوا من الداخل وشيكت على الفيوزات ولكت وحدتن منهن محترقة وغيرتها شيك على الفيوزات اللي تحت الدركسون اشتري فاحص الفيوزات ب 10 ريال واشبك سلك الفاحص في مفصلة الباب الفاحص على الفيوزات وحدة وحدة

[N.m.a]

لك 3 ايام ولا بعد عطيتنا النتيجه

اهلا وسهلا

النتيجة طالع عمرك
طلع فيه فيوزين في العلبة تحت الدركسون اساميهم blower motor ما يوصل لهم كهرب !
ومهوب مقطوعات !!
وما ادري وش السبب او العله !

[روقي نجد...]

المشكلة مثل مت ذكر لك العطاوي في كلامه وحصلت لي نفس مشكلتك وكانوا العمالة يخترعون إصلاحات من كيسهم...وبالأخير طلعت المشكلة بقطعة الإلكترون (إصلاحها ما يكلف)والجديد منها بحدود (٥٠٠) إذا بغيت تتواصل معي على الخاص أعطيك رقم العامل التركي أو أدلك عليه إذا أنت من الرياض

[N.m.a]

المشكلة والحمد لله حُلت

الكتاوت حق المكيف طلع خربان وبدلته

[موادع 1]

المشكلة والحمد لله حُلت

الكتاوت حق المكيف طلع خربان وبدلته
:good2::good2::good2::good2:
احسنت بارك الله فيك
لتعم الفائدة للاخوان
ليت كلن مثلك يكتب الخلل وطريقة الاصلاح

[بايسن حار]

انا عندي الان نفس مشكلتك بالضبط
بس المكيف الخلفي والثلاجه شغاله
الامامي مايطلع هواء أبداً

[بايسن حار]

والموتر فتك

[Alvedrale]

يا شباب نصيحة لوجه الله اذا المروحة تسمع فيها خرفشه ولو بسيطه غيرها قبل تغير الكتاوت لانها راح تحرق الكتاوت عليك صارت معي كذا مره