كيف أعمل كبسة رز بالكاتم؟؟

[lexus470]

السلام عليكم

مساكم الله بالخير يالربع وشلونكم عساكم طيبين،،،،،،،،،،

انشاء الرحمن عندنا كشتة مع رجال مثلكم وشرواكم مثل مايقولون اصغر القوم خادمهم :( عاد نبي منكم اتعلمونا على طريقة الكبسة الحمراء النثرية بالكاتم باللحم والدجاج..........

والله لا يهينكم ويجزاكم كل خير.

[المهمة الصعبة]

كبسة رز بمقادير دقيقة ونتائج رائعة
الحقيقة ان هذه الطريقة مجربة ومضبوطه 100 % والنتائج رائعة جدا وحبيت اني اضع امامكم المقادير بدقه متناهية
حتى لايكون هناك اجتهادات ربما انها تفسد الطبخة

المقادير
دجاجه 900 غرام ( حبذا تكون مبردة )
3 أكواب رز مزه ( الوليمه )
3 أكواب ماء
ماجي مكعب واحد
ملعقة كبيره ملح ناعم
بهارات حسب الرغبة + ليمون اسود
بصل مقطع ناعم
3 بندوره مقطعه قطع صغيره جدا
ملعقه كبيره من زيت عافيه

الطريقه
تقطع الدجاجه وينزع منها الجلد وترص اسفل القدر ثم يرش فوقها البندوره والبصل والماجي والبهارات والملح و الليمون الاسود
والقرفه .
ثم يوضع الرز فوق الجميع وفوق الرز نرش ملعقة الزيت
ثم نصب الماء بهدوء على الرز
ملاحظه
الرز غير منقع ولكنه مغسول فقط
القدر ضغط نوع سب (seb) حجم 6 لتر

الوقت :
نضع القدر على النار على العين اللي حجمها اكبر من الصغيره ونار عاليه حتى يبدأ البخار يخرج من فتحة الامان وتبدأ تفر كأنها مروحه مباشرة
نقصر النار عليه ( نفر مفتاح الغاز الى الأخير ) لمدة 10 دقائق أخرى
ثم نطفي النار ونخليه مكتوم لمدة 15 دقيقة .

ثم ننكب الغدا وبالهناء والعافية
الطريقة السابقة مجربة وتصلح للي مايعرف يطبخ ابد لانها واضحه وسهله يعني مايبيلها عرف

[عمق]

وعليكم السلام ورحمة الله وبركاته
شرواك الطيب
انا عندي طريقه مجربها اذا تصلح معك زين واشير بها ولا الزم

/ حسب القدر الي معك :
قطع البصل والطماط وحط معها بهارات وملح حسب الي تبي وحط معها شويت زيت لاتكثر وقطع لحكمتكم قطع اصغار واخلطها جميع ووحطها في القدر واذا شبيت النار شلوطها لمدة خمس دقايق على النار واذا تبي الكبسه تصير حمراء اللون عليك بالصلصه بدل الطماط ثم جبلك مويه مغليه وصبها في القدر الين يتغطى اللحم في القدر ويزيد عليه اشوي ثم اكتم القدر وشد عليه وحطه على النار لمدة ثلث الى نصف ساعه طف النار او ابعد القدر عن النار واذا فرغ هواءه فك القدر وكب الرز بحيث يكون الماء على سطح القدر متساوي مع الرز وحط فص ثوم وليمون اسود ثم صك عليه وخله عشر دقايق
وفق الغطاء وبالعافيه على هالمكبوس .
/ الطريقه الثانيه تخلط كل شي جميع وتزود الماء شوي وتخليه اربعين دقيقه وبالعافيه
ملحوظه/ الدجيجات ترى تستوي بسرعه اكثر من اللحيمه اذا لحيمتكم دجاج خمسه وعشرين دقيقه يزين وكذلك النار هل هي حطب او غاز ويفضل حطب هذي الامور لازم تراعيها

هذي الطريقتين جربتها ونجحت معي وجربها واحد غيري مانجحت معه

والله يوفقكم في رحلتكم


انا عندي طريقه دايم اسويها للشباب وينبسطون منها
(مرق ولحم )
1-قطع البصل والطماط وحط معه الي تحبه من عيال عمها وخالها وحط ملح وبصل وليمون اسود وبهارات واخلطها مع بعض وقطع اللحمه او الدجاج قطع اصغار واخلطها جميع
2- احضر قصدير وضع ثلاث لفايف قصدير فوق بعض بحيث تكون متداخله مع بعض وشكلها بحيث تكون على حجم اللحم والبصل والطماط المخلوط
بعد ذلك كب (حط) الخلطه في القصدير وحط معه بيالتين ونصف ماء وشكل القصدير على شكل مربع او اي شكل اخر بس لازم يكون فيه مساحه شاغره من داخل القصدير ثم غط القصدير واحكم الاغلاق بحيث لاينفس الهواء من القصدير ولايخرج الماء من القصدير
3- شب النار على الرمل بحيث تكون النار كبر حجم القصدير مرتين واذا جمر( السمر ) او الحطب افهقه( ابعده ) شوي وحط القصدير مكان النار ثم الحق الجمر بالقصديرمع الرمل الحار وغط القصدير بالجمر بشكل كامل مع ملاحظة ان الجمر لازم يكون حار مو ميت ويكون كثير خله لمدة ساعه كامله وتبي تسمع له تشيش ( صوت) ثم اضهره ونظفه من الجمر والرمل وفك القصدير شوي شوي وكبه في التبسي ويوكل بالعافيه مع الخبز

وفيه طريقه ثالثه //

انا جربتها وحلوه وبقول هالقصه معها
كنت مع خوي عزيز على مرني وطلعنا نتمشى في وقت الربيع وقطعنا مسافه طويله وحان وقت الغداء فال خويي نبي نمر القريه الفلانيه ناخذ منها غداء واتذكر اكل المطاعم قلت في نفسي مابزتنا مطاعم الرياض يبزانا مطعم هالقريه
وقلت لخويي شف الموتر فيه عزبه خفيفه وماء بيعينا الله مير ونمر على محطة القريه وحصلنا فيها دجاج (مالقينا لحمه لاتفهمونها غلط)
شرينا ثلاث دجاجات ( الثالثه تحسبن لاي طاري اما طرقي والاظيف مثلكم خابرين) والله ونمر ذاك الشعيب
قال خويي مامعنا (زدر)قدر نطبخ فيه
قلت ماعليك انا ادبر الموضوع
وندخل شعيب كله فروش حصى ونشب النار من حطب الشعيب واركب مركاب حصى واجيب فرش حصى( حصاة مفلطحه غير سميكه ) ونحطها على المركاب والنار حدرها والله شوي نقطع الدجيجات ونحطها على الحصاة وتبداء تتشتش وخويي يقول هذا حنيذ قلت ايه حنيذ اجل وشوا مندي؟
والله وشوي نزبط الشاهي ويجونا اثني مسندين الشعيب ويجلسون معنا وتغدو على ها الدجاج مع الخبز والشاي

/ فيه طريق رابعه/

بس خطيره مره
1-حضر لك قدر ( حافظه ) حسب عددكم
2- نظفها زين
3- خذ معك فوطه او كمبل (لحاف)
4- مر لك محل مندي
5- عب الحافظه رز ولحم
6- لفها بالفوطه حتى لاتبرد وبسرعه على خوياك

شكرا لك هذا ماعندي واشير ولا الزم.

[lexus470]

الأخوان المهمة الصعبة & عمق الله لا يهينكم ويجزاكم خير أنا بس نسيت أذكر أن الكاتم من نوع السيف حجم 15 لتر والطبخ لأربعة رجاجيل ولي عنده من الأخوان وصفات لا يبخل علينا ومشكورين.

[سند123]

اخوني ان اقول ان البصـــــــــــل اول يحمــــــــــس حتي يكون لونه يميل الى اللون اصفر

[متألق دائما]

15لتر لــ 4 أشخاص ...؟؟؟

كبييييييييييييييييييييييييييييييييير

9لتر وواجد بعد .