مشكلة بالسياره لها 3 سنوات مالقيت حل لها

[غلطة هواندي]

لسلام عليكم

معاي الانترا 2008 قير توماتيك

الحاصل معي

السيارة بعض الاحيان وبالخص اذا ماسك خط وجيت اوقف
بعض المرات تطفي و شغل تشتغل على طول
سويت عند اكثر من محل فحص كمبيوتر مانفع
غيرت بواجي وكويرات البواجي
سويت تنظيف لمنظم الهواء فلتر الهواء حساس الدعسه
ولازالت المشكله موجوده

للعلم وانا داخل الديره اروح واجي عليها ماتطفي كل امورها تمام
المشكله لامسكت خط او مسافه وامشي فوق 140 تطفي عند التوقف (بعض الاحيان ماتطفي)


رحت لكثر من كهربائي وميكانيكي محد عرف وش المشكله ..!
لو ماصلحت المشكله تضر بالسياره لان تعبت من الورشات اصفط الفلوس بالبوك احسن :D

[طحنون]

الله يعينك احتمال من حساس الحراره اللي هو مرتبط مع الكزوز يعطي اشاره
لكنبيوتر السياره غلط مما يؤدي الی انطفاء المحرك وهاذا معمول به بالسيارات
الجديده للحفاظ علی المكينه
شغلك كله كهرباء
تاكد من الظفيره بالكامل

[اسهيل]

تمشي خلاص لا طفت شغل خل داعس تری الي يتسمع للخرابات يطفش

[اسم قديم]

اصابع البطاريه نظفها وشدها

[غلطة هواندي]

الله يعينك احتمال من حساس الحراره اللي هو مرتبط مع الكزوز يعطي اشاره
لكنبيوتر السياره غلط مما يؤدي الی انطفاء المحرك وهاذا معمول به بالسيارات
الجديده للحفاظ علی المكينه
شغلك كله كهرباء
تاكد من الظفيره بالكامل

حساس الحرارة هو حساس الهواء الي جنب المكينة ولا غلطان ؟


تمشي خلاص لا طفت شغل خل داعس تری الي يتسمع للخرابات يطفش

انا اقدر اخليها ماتطفي هي تطفي اذا وقفت بريك جامد او فجئه
بس لو مسكت البريك خفيف لين تهداء احيان يرتفع عداد الضغط قليل وينزل وتظل السيارة شغاله وترج شي بسيط
بس ابي اسئل لو خليتها على كذا مافي ضرر على السيارة


اصابع البطاريه نظفها وشدها

مغير بطارية وشاد المسامير

[رفيع المقام]

وعليكم السلام ورحمة الله وبركاته

أخوي

نظف الثروتل بدي ، كذلك نظف حساس الدعسه والحساس اللي بالقربه ببخاخ الكترونيات ..

أما مسألة انك تغيير جميع الكويلات ، فمستحيل تخرب جميع الكويلات مرا وحده .،

لكن ما ألومك


من الورش اللي يتعلمون عسيارتنا ويسرقونا ..

[غلطة هواندي]

في كهربائي قال سو تصفيه للبخاخات شرايك ينفع

وابي اسئل رفيع المقام مشكلة الطفية ماتضر بالسيارة لو ماصلحته
ابيها مشاوير داخل المدينة بس

[ممتر البران]

سفط دراهمك في بوكك
غمض عين وفتح عين زال تغميضك لعين عنها اقل من كلفة اصلاحها!!!!

[رفيع المقام]

انصحك باصلاحها وان شا الله المشكله بسيطه مثل ما قلت لك نظف الثروتل وحساس الدعسه..

أما عدم اصلاحها فهذا شي راجع لك لكن المشكله اذا طفت عليك وانت تمشي بالخط ووراك سيارات .
بمعنى ممكن نخش بمشاكل لاتحمد عقباها

عالج المشكله دام انها بسيط ..
بالتوفيق

[غلطة هواندي]

هذا الي بسويه بنظف البوابة كامل وبغير حساس الهواء والدعسه وكاله
اذا تمام فضل من الله اذا مانفع خلاص ماعاد انا مسوي فيها شي

بس حاب اسئل فيه محلات اسمها بترومين عندهم جهاز ينظف البخاخات ماتوقع انه موجود بالحفر عندنا
لو انت بالرياض ولا الخرج دلني على واحد منهن احتمال لي روحه لشرق الرياض وجزاك الله خير

[اابو مياس]

اخوي فك الثروثل واعمل له تنظيف وهو مفكوك ولايفتح البوابه بيده ولايلعب فيه يكتفي بالبخ عليها لما ينظف
ثانيا
اشتر منظف الكترونيات ونظف حساس الدعسه منظم الهواء
ثالثا
نظف حساسات الاكسجين

[هيبتي بكلمتي]

تأكد وأنا أخوك من الباكم ولياته وبلفه لأنك تقول مع مسك الفرامل بقوه تطفي
المشكله كانت عندي بكابريس 86 كان إذا دعست على الفرامل بقوه يطفي أحيانا وطلعت المشكله من الباكم
أسأل الله لنا ولك التوفيق

[محرين باالخير]

شوف واناخوك دام السياره تشتغل صافيه ومافيها رجه باالمكينه ولادخان مكينتك وبخاخاتك ميه ميه .
مشكلتك هي ... فيه جهاز اسمه حافظ الظغط هذا دوره يحافظ علي ظغط البنزين داخل البخاخات ومتي ماتعطل يحصل في السياره مثل مايحصل معاك شيك عليه تلقاه علي شكل كره صغيره اخرمجري البخاخات .
ويسمونه باالصناعيه بلف الراجع .
اتمني اني افدتك .

[هاوي بلادي]

شيك على بلف الهواء الراجع

وتاكد من باكم

[صقر البحرين]

احتمال من الجوك (( اللي يرفع سرعة المكينه ))

[Aziz 2424]

شيك ع طرمبة البنزين

[غلطة هواندي]

المشكله مافي ورشات زينه بالحفر عندنا لو كل حاجه بسويها وفك وعدل بتكلف علي فوق قيمة السيارة
بدخلها الوكاله وسوي لها فحص مريت عليهم البارح قالو تكلفتها 650 ان ماعرفو لها الوكاله بسلامتها :(

[ابومحمد 88]

اتوقع القير به مشكله او سرعة المكينة منخفضة

[almo3jl]

الي يتسبب ان الموتر يطفي بعد المشي ولما توقف بالذات لما توقف فجاء يقطع او يقطع ويطفئ او يطفي هذي اعطال الصفايه

[Rapture]

اول شي تأكد انه السيارة مسوي لها تصفية ثانيا حاول تسوي بحث في جوجل بالإنجليزي على راحتك وجرب يوتيوب بعد ترا العرب ما تحصل كل شي عندهم

[الجبخان]

المشكله اما من لي البانزين يكون خفيف مره وينصفط من الحراره
او من خرطوش الهواء فيه تنسيم بسيط مستحيل يكون غير هالشيين لان الحساسات اكثرها اذا صار فيها شي يكون واضح وبكل وقت

[الصيادالمليح]

مشكلتك إن شاء الله بسيطة

سبب انطفاء السيارة هو إنك تكون مسرع و لما تهديء السرعة تنطفي السيارة

و السبب الرئيسي هو عند تقليل سرعة السيارة بشكل سريع مما يؤدي لتقليل كمية الوقود الداخلة بشكل مفاجيء و من ثم السيارة تنطفي و لا توجد مشكلة عند تشغيل السيارة مرة اخرى

و هناك اسباب كثيرة ومتداخلة و لكن العلة الرئيسية هي في نظام الوقود
- البخاخات
- طرمبة البنزين
- فلتر البنزين
- توصيلات الوقود

اولا عليك بعملية تصفية المكينة لمعرفة اداء البواجي و البخاخات و طرمبة البنزين
وربما تحتاج لتغيير صفاية البنزين اولا

أي ضعف في اداء البخاخات أو قلة في الضغط يؤدي لانطفاء السيارة و يعود السبب الرئيسي احيانا لضعف في اداء طرمبة البنزين او في سرعة انغلاق صمامات البخاخات

احيانا الوكالة لا تعرف السبب لان معظم معاينتها بالكمبيوتر و السيارة واقفة ولا يعطي الكمبيوتر اي اشارات او خلل و بهذا لا يعرفون مصدر الخلل

إذا كنت تعرف ورش معاينة السيارة عن طريق جهاز الداينو لمعرفة أداء السيارة فهو أفضل لمعرفة أداء مكينة سيارتك ومعرفة مكان الخلل بسهولة


و هناك اسئلة ينبغي معرفتها لأن سيارتك من موديل 2008
هل ركبت أي أجهزة كهربائية اضافية للسيارة؟؟ مثل مسجل - نظام صوتي - دي في دي - زينون تجاري - شاشة
لأن تركيب أي اجهزة كهربائية اضافية عشوائيا يؤدي لخلل في النظام الكهربائي للسيارة مما يؤدي لانطفاءها فجأة

هل صارت للسيارة أي حادث ولو كان بسيطا ؟؟
لأن السيارات الكورية مبنية على هيكل معدني سهل العطب عند أي حادث و الضرر الناتج عن اي حادث يؤثر في انظمة السيارة بسبب خلل في وزنية السيارة و الاجهزة الداخلية

هل أنت متبع للصيانة الدورية للسيارة ؟؟ أم مهمل لها ؟
لأن اهمال صيانة السيارة لمدة طويلة يؤدي لتراكم الاعطال ومن ثم ظهور اعطال متراكمة و من الصعب معرفة اسبابها و مسبباتها

و هناك أسباب مثل العين و الحسد و النفس السيئة .. و هذا حلها عند الشيوخ و الرقاة


و اتمنى اكون افدتك