وش افضل دربيل (نوع ومقاس ) للمسافات البعيده وراكد - تجاربكم

[ذيب النجيل]

السلام عليكم ورحمة الله وبركاته

ياشباب وش افضل دربيل للمسافات البعيده للصيد والوبر ووووو

ويكون راكد

انا جربت نوع بس عيبه انه ماهو راكد ويشوف مساحه صغيره

الي هو 42x10 كارل زايس hd

شوفه ممتاز
لكن عيبه ماهو راكد ويشوف مساحه صغيره
يعني اذا شفت شي اي حركه تخليك تضيعه

ولازم تثبت كأنك ودك ترمي ببندق


مع اني جربت نوع قديم استنر الالماني 6x30

شوفه راكد وتشوف مساحه كبيره واي شي يتحرك بهالمساحه تشوفه

لكن عيبه مايشوف البعيد


فماادري وش افضل نوع ومقاس يكون يشوف البعيد ويكون راكد

؟؟؟

[عبيد البواردي]

وعليكم السلام ورحمة الله وبركاته..من وجهة نظري انا اشوف افضل دربيل سوارفسكي يكون الزوم 10 ..جربه وماراح تندم ان شاء الله والله يعينك على الدراهم

[عطيه الدوسي]

وعليكم السلام ورحمة الله وبركاته
فيه قياسات تقدر من خلالها تختار الدربيل المناسب لك
مثال 8-42 الرقم 8 يعني التكبير ثمانية أضعاف
الرقم 42 يعني اتساع قطر العدسة (اتساع) الرؤية
كل مازاد الرقم الصغير زادت قوة التكبير وكل مازادالرقم الكبير زاد اتساع مجال الرؤية
والوضوح والصفاوة تتفاوت من ماركة إلى أخرى

[Lover Albatru]

افادوك الاخوان

[هداج تيما]

نصيحة عامة لكم يا اخوان:

والله اني حطيت يدي على ما لا يقل عن 100 دربيل من مختلف الشركات والانواع والمقاسات
واطلعت على عشرات المواضيع والدراسات ....

واقول وانا ناصح لكم... وهو حقكم علي

لا تعدا 7 او 8 بالتكبير . والحجم على حسب نوعية استخدامك

واذا انك محتاج لتكبير من 10 وفوق فالله يعين راسك وعيونك..او استخدم قنارة او قاعدة تثبيت...
او استخدم الدرابيل المانعة للاهتزاز مثل كانون وفوجينون وغيره
ولا شك ان الدرابيل الغالية دائماً افضل من الرخيصة.ولكن هذا ما يعني ان الدربيل يكون خالي من الاهتزاز
وإذا صملت على 10 او 12 فلابد انك ترخي المخباة


والله من وراء القصد




.

[راعي الزراف]

افضل مقاس دربيل جربته 7/50 ولاتخطيه راكد شوفه ولايهتز كل شوي واتساع في الرؤية عليك بالزايس الربل والا الستنر الكوماندر قيمتها متقاربه للجديد والمستعمل الجديد من كوماندر الازرق ابو بوصله ب٥٥٠٠ منها وفيها والزايس ب٦٠٠٠ او٦٥٠٠ غيرها اشكال وانواع عندك ايضا سوارفسكي 7/42 بطل الاخضر ربل قيمته عند الهدف حول ٤٠٠٠ تزيد او تنقص واذا كان دراهمك شوي فخذ الصقر الستنر 7/50العادي الجديد ب١٢٠٠ والله يرزقك مطلوبك

[متولع البر]

ماشاء الله تبارك الله افادوك الاخوان بارك الله فيهم
واكيد ان الاغلى افضل وسعره فيه

[تركي الناظر]

الله يعطيكم العافيه الاخوان ماقصرو كفو

[طير ابابيل]

Bushnell 10x42 legend of the HD تحصله في امازون ب 200 دولار

[راح الأمل]

عليك بقياس 56*8 من شركة زايس او لايكا او سوارفسكي الموديلات الحديثه

[slomi]

السلام عليكم ورحمة الله وبركاته
أخي العزيز حسب مافهمته منك انك تحتاج دربيل يكون اتساع قطر العدسة فيه كبير ,والسبب في هذا أنه كلما كبر اتساع العدسة وقل تكبيرالعدسة كلما كان الإهتزاز اقل بكثير
يعني الرقم الكبير لدربيل يفضل يكون اقل شي 42
والتكبير افضل شي لراعي الضلع والوبران يكون من 7-8
وعلى هذا أنصحك وبشدة بدربيل سوارفسكي المقاسات التالية
ٍSLC 8x42
أو EL 8.5x42
والأخير ممتاز جداً وسعره جديد لايقل عن 7500 عند الوكيل الهدف
لكن شفلك مستعمل نضيف قيمته من 4000-5500

هذا من خلال تجربة شخصية مع مجموعة من المقاسات والدرابيل
ملاحظة : هذا لايغي جودة بعض الماركات الشهيرة مثل لايكا وزايس و ليبولد اللإمريكي وكلها ممتازة

[منصور888]

وش نوع البندق ؟

[nwaf]

السلام عليكم ..
هل يوجد دربيل خاص للصيد فيه مانع للاهتزاز
و اللي جربة ياليت يفيدنا بنوعه و وين القاه
بارك الله فيه

[مخاوي دابذريع]

السلام عليكم ..
هل يوجد دربيل خاص للصيد فيه مانع للاهتزاز
و اللي جربة ياليت يفيدنا بنوعه و وين القاه
بارك الله فيه

دربيل كانون واذا بغيت رقم راعيه أبشر قيمته حول 3000 أو تزود