صوت غريب في يوكن وما قدرت أحدد مكان المشكله .... أرجو المساعده

[ريان2002]

السلام عليكم ورحمة الله
الموضوع بإختصار
يوكن موديل 2002 سعودي فيه صوت من بعد سرعة 40 مثل تكرار حرف الواو هكذا وووووووووووووو
الكفرات مافيها تحبيل ومالها أربعه أشهر من ركبتها وهواها مافيه نقص
الأقمشه والهوبات الأربعه سليمه والأذرعه موزونه
الرمانات في كل الكفرات الأربع والفلنجات اللي قدام سليمه لأني فحصتها في ورشه
الطاره مافيها أي رجه بس الصوت موجود سواء في طريق طالع أو نازل بفرامل أو بدون وحتى مع الملفات موجود ومستوى صوته واحد يعني مايرتفع مع المشي ويقل مع التهدئه
من كان لديه تخمين لنوع المشكله فليتفضل بذكره مع الشكر الجزيل

[ابوانس1]

السلام عليكم مدري اذا مشكلتك زي مشكلتي تقريباً نفس الصوت غيرت فلنجات أمامي وغيرت قماش وكأن الصوت قدام في الخير طلع الصوت من الكرونة وغيرت كرونة وراح الصوت وصارت السيارة خفيفة في المشي
ونصيحة لاتغير زيت الدفرنس الخلفي لانه على طول يطلع صوت وسلامتك

[ريان2002]

سلمت يا أبو أنس وبيض الله وجهك دنيا وآخره
لكن وأنا أخوك الصوت ماهو حنة كرونه وحتى لو يكون مهرول وماني داعس له بنزين الصوت موجود بشرط إن السرعه فوق الأربعين والكرونه إن رفعت رجلك عن البنزين أختفى صوتها

[SGL]

إذا موترك فيه دبل أعرف إن الصوت منه

[سداااااح]

اقترح عليك انك تشوف لك احد تأخذ كفراته تجرب قبل أي خساير

[ريان2002]

بارك الله فيكم يا أخوان والموتر بدون دبل
والكفرات سليمه ونقلت اللي قدام للخلف واللي في الخلف لقدام ولازال الصوت موجود

[ابوانس1]

هلا اخي ريان برضو الصوت مو حنة الصوت مثل ووو لا يزيد ولا ينقص مع المشي الا شي بسيط حتى لو فرغت القير الصوت يبقى موجود وتحس انه في احدى الكفرات كنه مسمار او حجر عالق بالكفر

[نظره وترحال]

الصوت مع دوران الكفر .. انا مع راي الاخ سداااح جرب تاخذ كفرات ثانيه

[salih100]

انا عندي كامير غيرت زيت القير وطلعت ونه مثل الي تقول حتى ولو تفضي السياره الووووووونه تكون معك

على العموم اذا انت غيرت زيت دفرنس امامي او خلفي او زيت القير او شحمت عمدان
شف اخر شي سويته بالسياره وبعدها طلع الصوت خلك حوله وحوليه
وموفق خير

[ريان2002]

بارك الله فيكم جميع على تفاعلكم والكفر سليم يا جماعه
اليوكن ياصالح بدون دبل وزيت الدفرنس ماقد غيرته نهائي والجربوكس زيته مغيره من حوالي سنه والصوت موجود من حوالي عشره أيام
آخر شيء سويته شحمت الجوزات وعمود الدركسون وباقي الجلد ولكن ناسي هل التشحيم كان قبل مايطلع الصوت أو بعده
لكن الليله بإذن الله بأغسل السياره بستم وأبلغكم باللي يستجد
ومشكورين جميع على كل كلمه تفضلتم بها

[ابوراكان تبوك]

ياليتك تجرب السياره وهي مرفوعه حتى تختصر الطريق في البحث عن المشكله

[ريان2002]

ياهلا ومرحبا بأبو راكان
قبل أمس رفعت السياره من الخلف وحطيتها بنمره ووصلت سرعة الكفر ٤٠ ومارضيت السياره تسرع أكثر من كذا حتى وأنا داعس بنزين وما طلع الصوت
والبارح بعد التراويح غسلت السياره بستم ولاحظت إن الصوت يختفي إذا كنت ماشي في ملف يسار أما في طريق مستقيم أو لفه يمين فالصوت موجود

[abo aryam]

السلام عليكم
يمكن بداية رمان
عموما اذا انت متحسف تغيره مع الوقت بيزيد الصوت اذا كان رمان .

[ريان2002]

ماني متحسف يا أبو أريام جعل من جابك الجنه
بس عجزت ألاقي سبب الصوت علشان أصلحه

[باسل نجد]

أخوي فيه عندي توقع وهو:
الكفرات الأمامية مفتوحة زيادة ، يعني تبي وزن وسلامتك .

[اابو مياس]

اخوي ممكن الصوت عندك رمان الهوب ارفع الكفرات الاماميه ولفها بيدك وتاكد من مصدر الصوت واذا تاكدت ورجل تشتغل بيدك جهز مفتاح سداسي رقم10
مفك حبه رقم 36 لبرغي الهوب والفلنجه وفك القماشات وفك الهوب وراح يبين معك الرمان شحمه بشحم حراري من الي لونه غامق ولاتنسى. تنظفه قبل الشحم

[الوقيدي]

السبب محصور في امور ثلاثه صاجات داخليه تحك في الهوب او بدايه خراب رمان الفلنجه او تراب على الفحمات . ارفع الكفر وحركه بيدك هل تسمع صوت ولو قليلا .

[ريان2002]

تحديث
الأيام الخمسه الماضيه رحت فيها كذا ورشه وكل واحد برأي لأن الميكانيكيين الجيدين مزحومين وكل مارحت لواحد على قلتهم قال ماني فاضي وأنا حاليا في الباحه
الحاصل فيه واحد أكد لي إن الفلنجات خربانه ولكن ممكن يختفي الصوت وممكن لا وغيرتها الفلنجتين أصليه درجه أولى ب ١٨٠٠ والتركيب ب ٢٠٠ ولم يختفي الصوت
أمس واللي قبله أكد لي إثنين بأن الصوت من الرمان الخلفي الأيسر مع إن غيرهم أكد إنه سليم فقررت الليله بإذن الله أغير الرمانات الخلفيه وراح أرجع لكم وأبلغكم بالمستجدات
وكل الشكر لكل من كتب رأي أو تفضل بنصيحه

[قمة افرست]

المشلكه عندك بالكفرات
والله اعلم
جرب في طريق خشن اذا اختفى الصوت او خف هذا من نوعية الكفرات
او نسم بالكفرات الى 20 وجرب ب نفس السرعه 40
اذا لاحظت اختلاف اذا هذا من الكفراات
الاحتمالات الاخرى خلها اخر شي
الكرونه والفلنجات

والله اعلم

[ريان2002]

المشلكه عندك بالكفرات
والله اعلم
جرب في طريق خشن اذا اختفى الصوت او خف هذا من نوعية الكفرات
او نسم بالكفرات الى 20 وجرب ب نفس السرعه 40
اذا لاحظت اختلاف اذا هذا من الكفراات
الاحتمالات الاخرى خلها اخر شي
الكرونه والفلنجات

والله اعلم


ياهلا وغلا بدكتور الرابطه الغالي
القطع قد شريتها خلاص صوفتين ورمانين وزيت ومانع إحتكاك بحوالي 800 ريال
وبكره بيركب الميكانيكي القطع وبعد بكره يحط الزيت ونقول إن شاء الله يختفي الصوت
الكفرات جعلك سالم شيكت عليها حوالي ثلاث مرات وطلعت سليمه

[قمة افرست]

الله يحييك وكل عام وانت بخير
والله يوفقك وتزبط ان شاء الله

[ريان2002]

تحديث
الليله فك الميكانيكي الرمانات والعكوس الخلفيه طبعا ولقينا الرمان الأيسر خربان وأعدم العكس شيء بسيط
وقال الميكانيكي اودي العكس مخرطه جيده تضبطه وتضمن شغلها أفضل من شراء واحد من التشليح ولأن قطع الغيار ماعندهم أصلي
وديته المخرطه وبكره العصر بأستلمه إن شاء الله وفي الليل بيركبه الميكانيكي وبعد بكره يحط زيت الدفرنس
والله يسهلها

[ريان2002]

تحديث
من فضل الله سبحانه تم تركيب العكوس والرمانات والصوف أمس واليوم عبينا الدفرنس زيت وأستلمت السياره والحمد لله راح الصوت بحكم أني تأكدت إنه من الرمان والعكس الأيسر
وكنت خايف من حنة الكرونه بحكم إن زيت الدفرنس القديم مشيت عليه حوالي 300 ألف كيلو بدون ما أغيره أو أشيك عليه
ولكن الحمد لله رجعت السياره أحسن من أول ولكم كل الشكر والتقدير

[alwali]

الحمدلله الله يعطيك خيرها ويكفيك شرها