المساعد الشخصي الرقمي

مشاهدة النسخة كاملة : افضل ورشة ترهيم مكينة LS 1 على باترول


الديسي 1984
16/07/2014, 03:07 PM
السلام عليكم ورحمة الله وبركاته
مساكم / صبحكم الله بالخير
يا جماعة عندي باترول ربع 2007
وخبركم السلقة وردا العزم فقررت اغير المكينة
ب LS1 او ls2 او LS7 فحبيت استشيركم
وش الافضل ولو فيه حل افضل من هذي المكاين افيدونا
اللكزس مالي نظر فيها نهائياً
فإيش رايكم هل بيكون مظبوط ودق سلف وتوكل على الله
وهل القير والدبل والدفرنسات تبي تتحمل ؟؟
و من ناحية الخرابات لأن بعضهم خوفني الصدق وبعضهم
قال امور بسيطة ويسلك وبعضهم قال على حسب شغلك
فالصراحة احترت،
والامر الاخر :
افضل الورش من ناحية التجليس والكهرب والمكيف ونظافة الشغل بشكل عام
و الانجاز ؟؟؟؟؟
ومكينة البلد لو ابي ابيعها كم تسوى ؟؟
وتكاليف الترهيم كم تكلف تقريباً؟؟؟؟
ولو حصل ورش في الرياض افضل شي بحكم اني في الرياض
وشكراً لكم مقدماً وارجوا ارجوا ما يتكلم عن الخرابات الا
من قد جرب مهب يقولون.
وصلى الله وسلم على نبينا محمد وعلى آله وصحبه وسلم
سقم المعادي 1
16/07/2014, 04:27 PM
اخوي اعذرني ولو ردي في غير مسار الموضوع لكن انا ناصح لك من تجربه 2 من عيال عمي بالجيوب المرهمه و دايم نكشت سوا
انصحك خل موترك شد بلد يقضي لزومك ولا يشغلك بالاعطال
لا تحسب ان هالعزم بيجيك ببلاش لكل شيء ضريبه
و ضريبه الترهيم كثره الاعطال
و لازم يكون عندك خلفيه و تعرف كيف تتعامل مع الاعطال خصوصاً الكهربائيه
لأن احتمال ان الموتر يقطع بك في الخلا احتمال كبير على عكس شد المصنع امش وانت متطمن
و كم مره حصلت لنا و قطعت مواترهم في الخلا و اخرتها واحد منهم موتره عليه مكينه دينالي 6.2
ساحبينه من نقا فجحان إلى الحفنه و نكد علينا طلعتنا و راعيه خسران فيه الى الدفنه من تسقيط و اصلاحات اخر شيء باعه بخساره

سو له تصفيه و احفظ قريشاتك ما ضر اللي معهم شيصان وجيوب ديزل وقنصو عليهن بالرمله
الفهيد بدر
16/07/2014, 06:12 PM
نصيحة محب ركب مكينة فتك مكينه نشيطه وتركب على نفس القير وتكون مثل شد البلد وعطها مراوح وهدرز واسلاك وفلتر وبرمج وابشر بالعزم الخورافي وقلة المشاكل
سموو الروح
16/07/2014, 06:25 PM
يااااخوان الرجال مقرر ع نوع الماكينه
يبي افضل ورشه بس
انا والله اسمع بدر الحمد بالزلفي
هو الي شهرته واصله اخر العالم
لكن الي مجرب اتمنى يفيدك انا لاجربت
ولا شي تحياتي لك
سموو الروح
16/07/2014, 06:29 PM
سقم المعادي كلامك صحيح عطلات
وقلة سنع الترهيم كله وماخش راسي اصلا
والي قال فتك الفتك كم سعرها اللهم
ياكافي الشرر
وماتتحمل حراره ابدا
الديسي 1984
16/07/2014, 07:43 PM
الله يجزاكم خير واحد واحد
لكن كم واحد اعرف معهم نفس موتري ومركبين عليه
هدرز وفلتر وحسافة الداهم اللي حطوها فيه ذا مكينه
خسارة مافيها اي عزم وشرب بنزين على قل دبرة
واعتقد ان الترهيم اذا جا الشغل مظبوط ان شاء الله بتتلافا كثير من
هالمشاكل خاصة الكهربائية.

يالفهيد بدر : الفتك والله واجد مدحوها لكن تكلفتها شي مهول
وفي الاخير 6 سلندر مهما وصلت ما تجي زي 8سلندر
صح انها نشيطة لكن بعد ماتخلا من المشاكل وقطعها نار


اخوي سمو الريح : بدر الحمد اسمع به وشغله لاكن ماحولكم رقم له؟؟
ولا فيه غيره طيب في الرياض ؟
وكم تكلف تقريباً ؟

وجزاكم الله كل خير.
سموو الروح
17/07/2014, 10:49 AM
ماكينة 4500 للباترول فاشله من وجهة نظري.
بكل الموصفات لهف بانزين وعزم كانه ماكينة يارس 1300 ولايمكن
اليارس اقوا عزم بالنسبه لرقم بدر الحمد ببحث لك عنه
اما التكلفه اعرف واحد ركب عند بدر الحمد لكزس ع باترول
96 كلفته كامله 17الف ع كلامه
سموو الروح
17/07/2014, 10:52 AM
وافضل شي سووه نيسان
من 2011وقفوها خلاص ال 4500.
الفتك ابسط شي البواجي تخيل الحبه
ب 55 ريال سلامات شصاير علي مرسيدس
ع غفله ولا عسا يكملون 70 الف ويلعب
فيهن البانزين الاخضرر
.. PATROL ..
21/07/2014, 02:09 PM
انصحك في الصمعاني ببريده شغل نظيف
الكدن1
24/07/2014, 06:02 PM
السلام عليكم
مايمدح السوق الا اللي ربح فيه
اللي ماواجه خرابات يمدح الامريكي
واللي حصله خرابات يسب هالمكاين
مايصلح مع الترهيم الا الشغل الزين لكن يكلف ماديا
ركبت فتك مرتين لكن موديلات جديدة في وقتها 2009 ما واجهت اعطال وقنصت بها وسافرت عليها اكثر من مرة والتكلفة 28 الف دقت سلف جاهز
الامريكي ركبت 6 لتر مع كميوتر هولي وتحويلة القفاري واديتر تويوتا اصلي مع هدرز العتيبي كلفت المكينة 38 الف لكن شغل متعوب عليه
وموديل المكينة 2008
هذه تجربتي لعلها تفيد
الديسي 1984
25/07/2014, 06:21 AM
الله يجزاكم خير
الحمدلله جزمت على فتك وعسى الله يعيين ويوفق
ومثل ما ذكرت اخوي تكلف تقريبا 28 حولها
bad boy
26/07/2014, 01:23 AM
أخوي ابي اشور عليك بشور وانت فكر فيه
حاول تبيع موترك بسعر حليل مع قيمة الترهيم
دور لك فتك 2007 او 2008
واسلم من الترهيم والورش