السلام عليكم ورحمة الله وكل عام وانتم بخير طلب واستفسار لو سمحتم

[ابومشعل؟؟]

مساء الخير على الجميع

كيف حالم ياخوان

لو سمحتو عندي مشكله وابي فزعتكم

عندي استراحة وفيها حلال ومستودع اعلاف

لعبت فينا الفيران الله لايكثرها 😁😁😁 لعبت بكياس الشعير لعب

وبالفرشات والمساند حطينا سم وحطينا غراء وحطينا شبك صيد مانفعت

ونصحني واحد من الشباب قال مالك الا ام صتمه هوائيه بدربيل ليلي

لاني بالليل اشوفهن بكثره غير طبيعه سؤالي ياخوان وين القاها مع دربيلها الليلي وكم اسعارها

[ابومشعل؟؟]

93 مشاهد ولا واحد رد

شكل ام صتمه محد يعرف عنها شي ������

[هارون97]

شف اريح لك من ام صتمة متعبة فيه عند محلات الزراعية عندهم سم على شكل حبوب للفيران

[ابومشعل؟؟]

هلا وسهلا اخوي هارون شريته وحطيت له من اسبوع وشريت نوعين وخلطتهم سواء

لاكن كاني ماحطيت شي ماجاهم شي ابد مات واحد فقط والباقي كل شوي اشوف على الكشاف بالليل ٢ ولا ٣ ولا حسبن حسابي هههههه فيران كبار

[مشعل666]

هلا يابو مشعل وعليكم السلام

وانت بالف خير ان شاء الله

عليك بالبس (قطه/بسه) مارح تشوف ولا فار وانت بكرامه

[Lover Albatru]

هلا اخوي خذلك ديانا ولا فايروخ
تلقاها عند الرميح

[الوسم]

عند شركات مكافحة الحشرات أجهزة صوتية تبعد الحشرات ومن ضمنها الفئران والطيور أيضا
إسأل عنها ويبون يفيدونك أقرب جريده فيها إعلانات ولا تأخذإلا من الشركة المعتمدة في وزارة التجاره
يعني طالبهم برقم الترخيص لهم من الوزارة وأكيد سعرهم ما هو رخيص خذ منهم حتى لو هو غالي لأنهم مضمونييييين

[أشباط]

شف اخوي اذا تبغى تشتري أم صتمة عشان تحل المشكلة

لاتتعب نفسك ماراح تحل المشكلة أبدا واذا جبتها تراهن يختفن ولاعاد تشوفهن

واذا رحت يطلعن


انا اقول خذ لك سم سائل وخلطة بالماء وكبه بالجحور حقتها

[قناص1975]

اشتر ابساسه ما يبقي منهن شي

[محمد ابن عيد]

..
حياك الله ي الغالي
صدقني ام صتمه ماراح تحل مشكلتك
لانه الفيـران و انتم بكرامه اذكى مني و منك
م تطلع الا لاهجد الصوت
عليك ب البساسه ان شاء الله تهجد
و قبل ماتسوي شي لازم تنظف المكان
اللي يكثـر فيه الفيران ماتحط الغراء و الكياس فيه
ماينفع و حط لك سم لاتيأس ابد
انا كان عندي في المستودع هبلن فينا
نضفناه و خطينا سم و جبن لانهن يحبن الجبن الحمدلله راحن
لكن تأكيد !! هل هن فيران او حراذي
و ان شاء بعد هاكلام ماتشوف ولا وحده

[ابو بندراا]

عليك بالبسه

[أبوصالح9]

صبحك الله بالخير يابو مشعل

شف اول شي رح لحقين الادوات الزراعية بتلقى عندهم محلول فرنسي له ريحة نفاثة رش منه على جميع اطراف الغرفة او المستودع وكل 10 ايام رش مره ثانية - ولا تروح عند مكافحة الحشرات ماعندهم الا الخرطي

وثاني شي استخدم الديتول المركز بدون تخفيف بالماء وايضا الكلوركس الاصلي ايضا بدون تخفيف بالماء ورش على جميع اطراف الغرفة وحاول انك تحفظ الفرشات والمساند بمكان مغلق - دولاب حديد مثلا

وترا النعناع ينفع بعد ازرع نعناع وان شاء الله ماتشوف شي

بس قبل كل شي تعوذ منهن واقر وردك وسم بالله

[الشيخ الظريف]

يوجد عند الادوات الزراعيه سم على شكل حلوى مغلف ببلاستيك شفاف لون الحلوى ازرق ولكن احرص كل الحرص انك ماتلمسه بيدك. ليس لانه سام ولكن الفئران تشم ريحة يدك ولا تأكله٠انا وضعت الحلوى بيدي فلم تأكل الفئران حلاوة واحده٠فذهبت للمهندس غاضبا وقلت انا اشتريت الحلاوه بريال ولم تنفع فقال لي هل لمسته بيدك قلت نعم٠قال هذا هو السبب المس الحلوى وبيدك قفاز بلاستيك ففعلت وآكل الفآر السم ومات واصبح سعر كل فآر ريال واحد

[ابوتركي122]

الله يكون بالعون والله ان الفيران مابها حيله

[مطر وسم]

من رائيي يابومشعل انكم تجيبون قطاوه كثيره وتربونها بالحضيره او المستودع او كلاب صغار اعزكم الله وهم يتفاهمون معهم كل يوم بتحس انها تنقص لين تنتهون منها

ترى والله اكلمك من تجربه كانت عند خالي طاحونه حبوب وفيه فيران كثيره وجاب لهم قطاوه وقامت تصيد منهم ونقصت كثير واخر شي اختفت معاد نشوفها

تحياتي لك

[المسلهم]

مافيه أفضل من الحبالة القديمة تراه بثلاثة اريل
اشتر لك عشرين ووزعهن وانسهن
ولا يخربن
بس لازم تطرفها بالحيل
اما ان كان اباالعريص فماهو لازم تطرفها لأنه كبير وثقيل وتذبحه شرط