فزعتكم ياهل الخبره

[منكوب بسببهم]

السلام عليكم ورحمة الله وبركاته
مابطول عليكم
الموضوع اشتريت سيارة واقفه بمعرض بعد مارغبني فيها سوداني من كثر مدحه وحلفه انها سيارة نظيفه
المهم توكلت على الله وقلت له بفحص قال خذ راحتك ونوديها فحص قريب من المعرضوكشف عليها وقال نظيفة واعطاني برنت للكشف
ولها الان اسبوع معي واكتشفت بلاوي بالسيارة تجنن لدرجة انهم مثبتين الحرارة ماترتفع اكثر من النص
والطبلون من جوه ملعوب فيه والسيارة عيوبها كثيره مشتريها ب 46 مابتجيب لي علر وضعها هذا 15 الف
نوعها يوكن 2006 فل كامل وطلع بالتقرير غير كذا
انصفوني وين اشتكي وش اسوي علما السيارة لها اسبوع معي واريد رفع قضيه على المعرض

[الوسم]

شيخ المعارض إبدأ به شخصيا وإطلب فحص وجب ورقة المبايعة من المعرض اللي خذت منه السيارة
وجب التقرير اللي غرروك به معك وخله يشوفه وعلمه عن الموضوع وشف وش يسوي لك ....
وأهم شيء إنك تفحص عند ورشتين على الأقل معتمدة من شيخ المعارض أو المرور علشان المصداقيه في الشكوى
وإجمع عدتك من تقارير وفحوص للسيارة وعلى طووووووول على المرور وإكتب شكوى رسمية على المعرض والسوداني وإذكر إسمه في شكواك
و بعدين على وزارة التجارة وإكتب شكوى ثانيه بنفس المضمون ولا تنسى فيها إسم المعرض ودور كفيل السوداني وإعرف إسمة وضمنه الشكوى
ويالله .. نسف ذرعانك مثل ما يقولون ... ترى ما هنا شيء ببلااااااش ...
حتى حققك أتعب له والا ما نتاب شايفه إلا إذا ربك جابه لك بدون تعب
والله ييسر أمرك

[دواك عندي]

الله يعيننا واياك
مشكله ها النصابين حتى برمضان مهب كافين اذاهم عن خلق الله

[vtc2004]

اول شي سوي اتصال علي وزارة التجاره بخصوص الكشف وبعدها يعلمونك بقية الاجراءت
لاوصيك لاتخلي حقك يروح للاشكال التعبانه اصحاب المعارض

[منكوب بسببهم]

يعطيكم العافية ماقصرتم
رحت للمعرض وصااحب المعرض يقولون مسافر مافي الا بعد العيد
وشيخ المعارض نفس الشي مايفتح الا بعد العيد

[الوسم]

الله يجزااك خيييييييييير
نقول لك المعرض خصم لك !! لا عاد تجيه ولا تقبل عليه .. سامع ..
واللي يجب أن تتوجه له أولا شيخ المعارض وإكتب الشكوى وعطهياه
وأرفق إثباتاتك
وعلمنا وش يصير معك ووش يبي يسوي لك شيخ المعارض

[منكوب بسببهم]

قدمت بلاغ لوزارة التجارة
وافدتهم بجميع المعلومات
وفادني انه سوف يعرض على اللجنة لنظر ومتابعة الموضوع مع المعرض
واتصلت بصاحب المعرض وافادني انه لا علاقة للمعرض
والفحص يتحمل كل نتائج هذا الغش
لكن السؤال هنا
كم من الوقت تستغرق وزارة التجارة لنظر في موضوعي

[منكوب بسببهم]

بالنسبة لشيخ المعارض ليس موجود اخر مره رحت له اليوم

[منكوب بسببهم]

طبعا الي فحص السيارة
سوداني مختفي مالقيته من يوم اشتريت السيارة
وسألت عنه افادوني بأنه راح عمره
والمحل مافادني بشي معترف بالتقرير انه من قبلهم لكن بدون فائدة

[منكوب بسببهم]

والي عنده خبره لتقدم بشكوى للمحكة ضد المعرض ومركز الفحص يفيدني
وهل هناك وقت محدد لتقديم شكوى غش من تاريخ شراء السيارة

[yyy3]

خذ السياره ووقفها بلمعرض
وسوي لهم مشكله وارفع صوتك وسمع فيهم الناس
واكيد هم يخافون على سمعتهم
وراح يتفاهمون معاك ويراضونك
العالم هذي ماتمشي الا بلعين الحمرا
ولو تقول بشتكيهم راح تتعب بدون فايده
وانت كل يوم من مكان لمكان
والله يعينك

[منكوب بسببهم]

قابلت اليوم شيخ المعارض وأفادني بأن موضوعي ليس من اختصاصه
ولا يقدر يفيدني بشي
وسئلته عن الجهة المختصه وافادني بأن الجهة المختصة لموضوعي هي وحدة المعارض بمرور الناصريه
او الشرطة
وقال في نهاية الموضوع لاتتعب نفسك وتأخر موضوعك
بتلاقي اقرب مخرج ولابتلاقي حق منهم واسطاتهم ومعارفهم في كل مكان
ونصحني بتصليح السيارة واستخدامها او بيعها بحالتها والعوض على الله
واذا كنت مظلوم اتركهم للي اقوى مني ومنهم