هل المشكله عند الكل ولا الحالي في الصيد

[مزآآجي]

السلام عليكم ورحمه الله وبركاته وجمعه مباركه ان شاء الله

المهم مشكلتي مع الصيد مشكله:(

والله ياشباب احط لي سجارهـ واصيبها من المتنصف بالضبط لاكن لما يكون فيه طير ما اصيبه نهائياً

هل هي ارزاق ولا وش السالفه :)

هل تعانون مثل ما اعاني :eek:

[ابوس11م]

انت ترمي في دربيل ولا بدون دربيل

[مزآآجي]

ارمي بدربيل وبدون

[قناص الأشهب]

الصيد ارزاق كﻻم ما فيه نقاش
ولكن لكل شئ سبب
هذا معروف مو كل من رمى هدف جاامد او غير حي يقدر يجيب الصيد سواء صيد كبير او صغير .
لان فيه عوامل ﻻبد من ضبطها وقت رمي الصيد وهي كثيره ولكن باذكر المهمه
اوﻻ . عدم التسرع في الرمي والتسرع بفتح التاء والتشديد على السين يختلف عن السرعه فالتسرع عيب في الرامي والسرعه احتراف وخبرة
ثانيا . الضغط على الزناد او الضراب بقوة او بشكل خاطئ يسبب اختﻻل في التوازن
هذي من اهم النقاط والقائمه تطول وتحتاج وقت طويل للشرح .

[فارس الكلمه]

قول جمعه مباركه بدعه
وبالنسبة للصيد يمكن يدك ترتجف إذا صوبت تخاف أن الطير يطير

[خليل909]

مثل ماقالو الاخوان التسرع والشي الثاني تصير عندك ردة فعل داخليه ويكون تفكيرك خايف تخطي الصيده اكثر من ثقتك بالاصابه وهذا بعد من الاسباب والزقاره هدف ثابت تكون واثق من الاصابه ولا انت خايف تطير مثل الطير علشان كذا تكون عندك ثقه بالاصابه

[ابوتركي122]

الصيد ارزاق

[ابوصالح3]

جبتها على الجرح اوزن البندق واسوي بروفات واحط اشارات واصيبهن ومن بكره يختل العيار

والسبب الرئيسي رداءة الصناعة بالنسبة للهوائيات النيشان دايم يختل وتغير الوزنية

والسبب الثاني عامل نفسي بحت وهوالارتباك والتسرع وفقك الله اخي الكريم

[مطر وسم]

اخوي ترى وزنية الساكتون على الارض تحت تختلف لما يكون فوق في الشجره انت اوزنها وزنيه فوق الشجره شف لك نقطه او بقعه صغيره سوداء على غصن وتقد عليها ورم لين تصير الرميه على البقعه بالضبط واعرف الوزنيه كيف لاتنساها وبعدين اضمنلك مايفوتك أي طير فوق مو تحت

تحت خل لها وزنيه ثانيه ولا تجلس تفرفر في الميزان عشان مايخرب الوزن

تحياتي لك

[coolfishing]

ما قصروا الشباب ... و اضيف على ما قالوا
ان الرياح او ( الهواء ) في منطقة الصيد لها تأثير على
اتجاه الرصاصة الى الهدف

تحياني
اخوك ابو وجيه

[شرق المغيب]

يمكن البندق ماهي مضبوطه وزنتها اومن هالاسبانيات الي مادخلن مزاجي ابدا
اوزن البندق على اشاره بالارض واشاره على شجره
ثاني شي لاجيت ترمي اكتم النفس مع الاستراخاء للجسم وخلك واثق ولاترجف يدك

مع الممارسه راح تكون بواردي بأذن الله تعالى

[Lover Albatru]

الصيد ارزاق

[مزآآجي]

ههههه الله يعطيكم العافيه ماقصرتو

انا بصراحه دايم اوزن على الارض ما عمري وزنت على الشجره لاكن ان شاء الله اجرب الفجريه اليوم

[TABUKII]

اذا بغيت ترمي ووزنت في الهدف حاول تكتم النفس وعلى طول ارم.
هي مسألة اجزاء من الثانية
والصراحة ماشاءالله عليك اللي ترمي السجارة بدون دربيل
موفق ان شاءالله

[أبوصالح9]

الزقارة مهب دليل على الميزانية

لان الزقارة طولية اذا بغيت تعرف وزنية بندقك حط العلامة ( نقطة ) كبر الظفر حق ابهامك او خلنا نقول كبر القرش مثلا ربع ريال او نص ريال حديد بالكثير

ومافيه فرق بين اذا الرمي تحت او فوق اذا كنت متمكن وضابط نفسك وحركتك - اللي يفرق بالرمي البعد والقرب واتجاه الهواء وقوته ماله دخل فوق ولا تحت يعني لو كنت وازن بندقك ونيشانك على مسافة 20 متر راح تتغير رؤيتك للمنشاف او النيشان على مسافة 30 او 35 متر واحسب حساب الهواء بعد

العامل المسبب لعدم صيدك التوفيق من الله اولا ثم استعجالك من ذهاب الصيده بخلاف الزقارة انت ترمي وانت مرتاح لانك عارف انها ماراح تتحرك لو تخليها ساعة بالارض

[كاتم الشكوى]

ليا جيت توزن البندق افضل شئ حط لك دواير وكل مرة صغر الدايرة وخل موقع النيشان تقريبا يقارب موقع الطير
ولازم يكون مافيه هواء لأن الهواء يغير الوزن
وليا وزنت بندقك ثبت الميزان بالمعجون السليكون حتى لا يتحرك
وعند ما ترمي لازم تكتم النفس
بالتوفيق ... وفالك الصيد

[رشيد22]

هلابك اخوي شكلك عجل هذه روح وامرها بيد الله سبحانه لها اجل ودمت بخير

[المتلولس]

فعلا وزنية الارض تختلف عن الشجرة اذا وزنت على الشجرة مظبوط وبغيت ترمي بالارض نزلها شوي حطها برجليه

[حمدي الرشيدي]

حبيت اشارك في موضوعك وعندي كم نقطه نشالله تفيدك
1 عدم التسرع
2 لاتنفس اثنا الرمي اكتم نفسك
3 خلك هادي ولاتضغط عالزناد بقوه او بسرعه شوي شوي لين يرمي من كيفه
4 اذا الوزنه كويسه ومفيها اختلاف
5 وطبقت كل هالخطوات باذن الله تصيد ميه فالميه

[حمدي الرشيدي]

وعندي ملاحضه اذا تبي تصيد اشتر سوجر وارتاح

[شيخ القناصة1]

السلام عليكم ورحمة اللي وبركاته
اولا: الهوائيات مشكلتها مشكلة اذا صارت السرعه كبيره صار طيران الرصاصة مسطح وفائدة الطيران المسطح انك تقدر تصيب اهداف مختلفة المسافة مثلا وزنت البندقية على 10 متر وطيران الرصاصة مسطح راح تكون رمياتك الى مسافة 25 متر إصابة ولكن دخلنا في مشكل جديده وهي الدقة تصير الرصاصة غير مستقرة في الدوران حول نفسها بفعل ما يسمى التويست او الحلزون الداخلي للسبطانه وبكذا تكون الهوائية غير دقيقه وكل ما زادت المسافة تزيد الرصاصة في فقدان الدوران حول نفسها وتكون واضحه انها فقدت الدقه لك كرامي
ثانيا: اذا صارت الهوائية سرعتها ضعيفة وتتراوح السرعة الضعيفه من 210متر بالثانية واقل راح يكون طيران الرصاصة مقوس وراح تكون الدقة عالية ولكن دخلنا بمشكلة جديده وهي انك لازم تعرف مستوى السقوط للطلقة حتى تقدر تتعامل معها اما برفع الصليب فوق الهدف او بتنزيل الصليب تحت الهدف
ثالثا ان المسافة الي ترمي عليها الهدف غير المسافة اللي ترمي عليها الصيده
تحليلي للمشكلة ان سرعة البندقية عندك ضعيفة و وهذا هو السبب عدم اصابتك للصيد
انا اطلب منك انت ترمي اهداف من 3 متر الى 25 متر وراح تعرف هل طيران الرصاصة مسطح ام لا في بندقيتك

اتمنى ان لا يكون شرحي ممل لأني اتكلم بشكل علمي

[دكتور زمانه]

فعلاً ذكرتني ببعض الربع خذ ولد في رمي القواطي واذا شاف الطيور ضاعت علومه . الشباب ماقصروا . وفعلاً نفس المشكلة تصير معي الي بالشجر قليل ماأخطيه . وأحيانا الي بالأرض وواضح زي الشمس مايكتبه ربي . أهم نقطة أن الي بالأرض تختلف وزنيته شوي بمعنى الي في الشجرة تحط طرف العلمان النيشان والي في الأرض تحط نصفه فرضاً وهكذا . ضبطها بالطريقة الي تشوفها مناسبة . وأضيف نقطة مهمة . البندق انتبه لها وهي في الغمارة لاتنحاس وزنيتها مع المطاب خلها واقفه على كعبها افضل . وفالك الشحم وكل قناص

[محمد ابن عيد]

..
حياك الله ي الغالي
هههه الله يجعلك بالجنه و والديك ومن يقراء
ابد لانك لاشفت الطيـر تهيض قلبك و رجف جسمك
ابد خلك طبيعي و بحول الله تجيبه
و فالك الشحم