عطوني العلم الوكاد... ابغى اقنص في 19 سبتمبر

[راعي المطافيل]

تحيه للجميع

العضو والزائر

الي يرد والي ما يرد

اخواني بما اننا نقترب كل يوم من موعد هجره الطيور سواء الجارحه او الغير جارحه

وكل على هوايته ورزقه يمشي

انا كل سنه اقنص للشبك الصقور في شهر اكتوبر

السنه هذه ابغى اقنص في تاريخ 19 سبتمبر واخذ اسبوع اجازه واشبكها مع عطله العيد

بمشيئه الله عزوجل

وش رايكم اخر 11 يوم من سبتمبر

هل فيه طرح طيور بشكل كبير

مع اني عارف
ان الفروخ تجي بدري


للمعلوميه وجهتي

هي الدبدبه - المسناه

ظهره الشعيب بحفر الباطن وشمال الصفيري


ارجوا التعليق

على ذلك

تقبلوا مروري

[فهد33]

هلابك والله ياخوي أنا ماعندي علم لكن ابشر بالاخوة مايقصرون

[أبو العنود1]

اخوي بالنسبه للصقور تعتبر حالك دخلت المقناص من 25/9/2014م وانت رايح والطير يمكن يسبق بكم يوم ويمكن ياخر وترجع للاحوال الجويه ولكن بشكل عام 25/09/2014 تتوقع وجود الطير في هذا الوقت والله يوفقك هذي رزقه من الله يسوقها لك ماتدري متى تطيح بيدك والله يرزقك النادر يارب انت اعقلها وتوكل وماحد يقدر يقولك انه اليوم الفلاني خلص به حرار بدن لكن هي حسبه تقديريه

[راعي المطافيل]

يعطيكم العافيه

لكن ارغب بالمزيد

العام انشبك طير بتاريخ

15 سبتمبر

بحفر الباطن وانباع بـ 40000 تقريباا

طبعااا منطقه الحماد يبدا المقناص قبل منطقه حفر الباطن والكويت


ابغى اكثر اراء من الاعضااااااااااااااااااااااااااااااااء

[القصير111]

تقريبا من 15 سبتمبر توقع الطير في أي مكان

[أبو العنود1]

اخوي الوكارى والمثاليث من 01/09/2014م يصير طرح لكن خفيف جدا وجالس ينطرح الان وكارى
انا جالس اتكلم عن الكمل

[أبو فااارس]

قصدك المثلوث.. مضبوط اول ماطرح هو العام حول التاريخ هذا وطير الكويت والسعوديه تاريخ24/11 هجري والله انك موافقهن ميه بالميه اول العبور الله يرزقك وترى عز المقناص لاعيدت الضحيه بداية اكتوبر

[ابو مشاري 1]

مساكم الله بالخير
بالنسبة للمقناص يبدأ سنويا من 15 سبتمبر الى 30 أكتوبر
يعني شهر ونصف ولا يمنع ان يكون فيه مرور قبلها بايام وكذلك بعدها ولكن هذا انسب وقت
وفالكم النادر يا اخوان

[هم الشمالي]

وقت أختيارك للمقناص 19سبتمبر مناسب جدا منها تقنص طيور ومنها تصيد من هالقميري والفري ويبدا عاد النزل والحوم بأعداد كبيرة من تاريخ 25سبتمبر وأنا أنصحك بمقناص المسناه لين تجي مكينه الجبو هاذي كلها معبر طيور قوي وأكثر ماينطرح فيها
وبنسبه لظهرت الشعيب وشمال الصفيري معبر طيور قوي ومقناصه حلو لاكن صار كله أهل غنم و الناس أكثر من الطيور سواء بالدبدبه او شمال الصفيري
وأنا لي ثلاث سنوات ماأقنص بالحفر كله اروح أقنص بالشمال يم عرعر براد وأرضه حلوه شجر وفيها حطب لابغيت تشب نارك الدبدبه مافيها لاشجر ولأ حطب ارضها كلها مثل بعض أرض متساويه تلقى الناس على كوامري يقنصون بجنبك تحس أنك منت بالبر داخل الديرة بس ارضها حقت هدد طيور يعني أنس طيرك يضيع بذيك الأرض وأي استفسار أنا حاضر سواء بمنطقه الحفر أو منطقه الشمال عرعر

[عاشق التوام]

السلام عليكم ورحمة الله وبركاته

صبحك - مساك الله بالخير أنت والحاضرين


هجرة الصقور على حد علمي تاصلنا بإذن الله مع اليوم الأول من برج الميزان ويوافق 23 سبتمبر وتستمر بإذن الله إلى 15 نوفمبر بشكل تقريبي وبعضهم يقولك لين تشوف حوم الحنادي وبعضهم على هالبيت ينكف

ياسعد جانا بشير من الحيا
صوت القواري وإختلاف الهبايب

وكثير مانسمع بطرح طيور يقولون لها (السبّق) وهي أول ماياصلنا من الطيور وفي الغالب
القرناسة المثلوثة
فرخ الحرار التام
القرناسة التامة
ومن بعدها تجيك قرانيس التوام وفروخ المثاليث وفروخ تامة وفروخ مثلوثة ويتخللها اللي ذكرته قبل من اللي تتمشى في هجرتها ^_^
وهذا ترتيب بعض الشبّاكين مع أنه طرح قرناس تام في أول الوقت
وذا يعني إنه هالترتيب تقريبي
وهي علمها عند الله سبحانه هو اللي يسيّرها

والله لايضيع لك ولايضيع لنا تعب


تقبل مروري
أخوك عاشق التوام

[راعي المطافيل]

القصير111تقريبا من 15 سبتمبر توقع الطير في أي مكان

يعطيك العافيه

توقعي كان قريب من ردك

[راعي المطافيل]

أبو العنود1اخوي الوكارى والمثاليث من 01/09/2014م يصير طرح لكن خفيف جدا وجالس ينطرح الان وكارى
انا جالس اتكلم عن الكمل

يعطيك العافيه

صدقت لكن في هذا التاريخ الجو اعتقد حار
لكن 15 سبتمبر يعتبر مقناص رسمي من وجهه نظري

[راعي المطافيل]

أبو فااارس قصدك المثلوث.. مضبوط اول ماطرح هو العام حول التاريخ هذا وطير الكويت والسعوديه تاريخ24/11 هجري والله انك موافقهن ميه بالميه اول العبور الله يرزقك وترى عز المقناص لاعيدت الضحيه بداية اكتوبر

يعطيك العافيه

المثلوث الي انطرح العام طرحه نواف النوري

كل ورزقه سواء اول الموسم او اخره

[راعي المطافيل]

ابو مشاري 1مساكم الله بالخير
بالنسبة للمقناص يبدأ سنويا من 15 سبتمبر الى 30 أكتوبر
يعني شهر ونصف ولا يمنع ان يكون فيه مرور قبلها بايام وكذلك بعدها ولكن هذا انسب وقت
وفالكم النادر يا اخوان


يعطيك العافيه

تاريخك مقارب جدااااا او هو الاصح

وكل ورزقه

[راعي المطافيل]

[QUOTE=هم الشمالي;10189193]وقت أختيارك للمقناص 19سبتمبر مناسب جدا منها تقنص طيور ومنها تصيد من هالقميري والفري ويبدا عاد النزل والحوم بأعداد كبيرة من تاريخ 25سبتمبر وأنا أنصحك بمقناص المسناه لين تجي مكينه الجبو هاذي كلها معبر طيور قوي وأكثر ماينطرح فيها
وبنسبه لظهرت الشعيب وشمال الصفيري معبر طيور قوي ومقناصه حلو لاكن صار كله أهل غنم و الناس أكثر من الطيور سواء بالدبدبه او شمال الصفيري
وأنا لي ثلاث سنوات ماأقنص بالحفر كله اروح أقنص بالشمال يم عرعر براد وأرضه حلوه شجر وفيها حطب لابغيت تشب نارك الدبدبه مافيها لاشجر ولأ حطب ارضها كلها مثل بعض أرض متساويه تلقى الناس على كوامري يقنصون بجنبك تحس أنك منت بالبر داخل الديرة بس ارضها حقت هدد طيور يعني أنس طيرك يضيع بذيك الأرض وأي استفسار أنا حاضر سواء بمنطقه الحفر أو منطقه الشمال عرعر

يعطيك العافيه

وكل حرف كتبته صحيح وينم عن خبره طويله

لكن انا الفت حفر الباطن
ولي اقارب واصدقاء
والرزق وعده من الله سبحانه وتعالى

وعرعر غلاها بالقلب مدقوق

يا زينها ويا زين حتى ثراهااا

[راعي المطافيل]

[QUOTE=عاشق التوام;10189264]
السلام عليكم ورحمة الله وبركاته




صبحك - مساك الله بالخير أنت والحاضرين



هجرة الصقور على حد علمي تاصلنا بإذن الله مع اليوم الأول من برج الميزان ويوافق 23 سبتمبر وتستمر بإذن الله إلى 15 نوفمبر بشكل تقريبي وبعضهم يقولك لين تشوف حوم الحنادي وبعضهم على هالبيت ينكف


ياسعد جانا بشير من الحيا
صوت القواري وإختلاف الهبايب


وكثير مانسمع بطرح طيور يقولون لها (السبّق) وهي أول ماياصلنا من الطيور وفي الغالب
القرناسة المثلوثة
فرخ الحرار التام
القرناسة التامة
ومن بعدها تجيك قرانيس التوام وفروخ المثاليث وفروخ تامة وفروخ مثلوثة ويتخللها اللي ذكرته قبل من اللي تتمشى في هجرتها ^_^
وهذا ترتيب بعض الشبّاكين مع أنه طرح قرناس تام في أول الوقت
وذا يعني إنه هالترتيب تقريبي
وهي علمها عند الله سبحانه هو اللي يسيّرها


والله لايضيع لك ولايضيع لنا تعب



تقبل مروري
أخوك عاشق التوام


يعطيك العافيه


وكلامك كبير ودقيق
لكن قبل كم سنه شبكت شيهانه قرناس مثلوثه في 16 اكتوبر
و23 سبتمبر هو اول ايام الخريف
وكل ورزقه عند الله

[أملج سيتي]

حياك الله يا الغالي
اذا هل سهيل طاب الليل
بعد ظهور نجم سهيل ترزّق الله
بالنسبة لسبتمبر كنّا نقنصه كامل
لكن الفيصل والدفعات النزل القوية للطيور
نلاحظها في اكتوبر
لك مني جزيل الشكر
وفالك الطير اللي تتمناه

[بندر سويلم]

مساكم الله بالخير يالربع والله اني مرتين ولا ثلاث اشوف التاريخ بالجوال تورم قلبي وانا انتظر

[هم الشمالي]

اليوم شفت باشق في الشمال بمحافظه رفحاء والله إني أستغربت قلت هذا وش جايبه مع إن البواشق ماتشوفها الا بدايه أكتوبر دايم تكون متأخره
يعني أول ماتشوف الحقبيات وبعده القطرات الي البعض يسميها الحديه وبعدها تشوف العقبان وبعدها تشوف البواشق
وهالحين ماهو وقت هجرتها
وقبل يومين كنت مسافر لرياض وحول الساعه 7 الصباح شاهدت جول طيورالماء الغرانيق أبيض حول 10 مهاجرات قبل المجمعه ب50 كيلو تقريبا وأنا على الخط متجه لرياض

[بندر سويلم]

يا شباب افضل مكان للمقناص على حسب معرفتكم وين

[عاشق التوام]

يعافيك الله من كل شر ياراعي المطافيل

الترتيب إجتهاد حسب مايلاحظون الطواريح ومايمنع إن الطيور تخالف الترتيب حسب ماتلقاه من أجواء تناسبها وعلف في المناطق اللي تمرها ممكن إنها تبطي
وإن إختلف عليها الجو أو إنتهى العلف تكمل هجرتها

[عزوم الاولين]

من عشرة سبتمبر حروة طير وشد حيلك من عشرين سبتمبر وآلله يكرمك بالزين واذا تبي الطير لاتقيل ههههههه وترا ذا الوقت فيه نزل طيب من القمري وبيجيك معه عبور حرار واذا صادف نزل قوي من القمري أشتهد بأيامه وحاس انك بطرح فرخ حر والله يكرمك انت وبقية الإخوان اللي صراحه ماقصروا بمداخلاتهم الطيبه

[محمدالشكره]

السلام عليكم
الله يوفق الجميع ويرزقهم

[راعي المطافيل]

يعطيكم العافيه

انا اكتفيت من اقوالكم وحسمت الامر بمشيئه الله عز وجل


الرفع للفائده

[hadad098]

السلام عليكم ورحمة الله

الاخوان ماقصروا ماخلوا لي شيء اقوله. بيض الله وجيههم

لكن احب اضيف شيء بسيط جدا.

الطير مقناصه. لشفت الحقبي ( ابو حقب )

اعرف ان الطير معه.

كلام توارثناه من شيبانا وشفناه بالعين.

والله يرزقك بالنادر

[SULTAN MUTIRI]

الله يوفق الجميع

[hawwamT]

من يطلع سهيل الا وتهاجر الطيور ..تابع سهيل وانطلق وفقك الله ورزقك من واسع فضله