سيارتي انصدمت والكفر زحف برا ابي حل

[ff34d]

السلام عليكم ورحمة الله وبركاته
قدر الله علي وانصدم موتري جيب جي اكس ار 2006 جات الضربه علا الرفرف الخلفي الايمن جنب الاصطب وزحف الجيب وضرب طرف الجنط الايسر في ركنية الرصيف
لااحظت الكفر الايمن طالع برا تقريباً 3سم والكفر الاديسر داخل نفس المسافه
نزلت اسفل السياره لقيت مسامير التوازن فيها ميول والعامور بعد في ميول خفيف جهت اليمين
قست المسافه بين الكفر والشاص لقيت فيه فرق تقريبا اصبعين ونص
وين المشكله بالضبط هل هي من الدفرنس
هل فيه مقص خلفي للجيب اقدر اوزنها
تكفون الي عنده علم يفيدني

[ff34d]

وينكم يارجال

[م.سعيد]

الحمد لله على السلامة..
تأكد ان الشاصي سليم..

[ff34d]

الله يسلمك
الصدمه خفيفه انطعج ركنية الرفرف وتشطب الاسطب
لكن زحف علا جنبه لني كنت ماخذ اللفه وارتطم الجنط بالرصيف

[نايف الشمال]

الحمدلله ع السلامه انتبه لايكون الشاص او الجسر يبيلك خبير شواص وجسر
وثانيآ ممكن الدفرنس والقواعد مع الضربه صار فيهن طعج

[ff34d]

مدري
لكن الجيب هل فيه مقص في الخلف
لان واحد شافه قلي يبيله وزن مقص

[موادع 1]

مالك الا توديه للميزان ويفتونك
ونصيحه لف على اكثر من واحد
واحرص على اللي سمعته زينه وشغله مضبوط
والحمد لله على سلامتك والحديد يتصلح وانا اخوك
يوم سلمت هذي راس مال

[راعي الرود]

ايه نعم فيه مقص بالخلف عددهن 4 تمسك الدفرنس اثنين طوال و اثنين قصار
فيه ناس تسميها مقصات و ناس تسميها عمدان السحب
الوكاد هي اللي ماسكه الدفرنس بالشاصي احتمال انعفطت و امرها بسيط تغيرها طقم جديد بـ 1200 تقريباً
تأكد منها قبل رح لميزان اليرموك ولا المجد او ميزان البلاد ولا تقرب العضيب ... موفق و معوض خير

[ابوعبدالله 93]

تصحيح لكلام اخوي راعي الورد اسمه ربطات الدفرنس الي فوق قصار والي تحت طوال والحمد لله على السلامه

[ff34d]

الله يبيض وجيهكم
صحيح فيه اعمدة سحب اربعه ٢صغار ٢كبار لكنها سليمه مافيه ولاعفطه
الله يجزاكم خير ويحرم وجيهكم على النار

[sulaiman.fj40]

بما ان الكفر ضرب بالرصيف فيمكن حصل ميلان بعمود الدفرنش اللي خلف الدفرنش يربط الدفرنش بالشاصي/ فكه وعدله بمطرقه وبيرجع كل شي تمام/ سبق وان عملتها ف نيسان باترول /

[ff34d]

مشكورين على مروركم وافادتكم
ايوم مريت ورشه سحب وتعديل شاصات وكشف علي الموتر
واحد قلي اشاص ملووح والدفرنس مطعوج والتصليح يكلف 3500ريال وتجلس اسبوع
بغت تجيني جلطه تركته ومريت واحد ثاني قالي بسيطه يبيله تعديل افك الاعمده واوزن الدفرنس بـ600 ريال توقفها الصبح تاخذها العصر
بشوف العصر وارد لكم وش صار معي

[ابوراكان تبوك]

الحمد لله على السلامه اخي

ممكن مافيه طعج احتمال اعمده السحب هي اللي فيها اللوحه شف اذا ضبط عند ابو 600 ريال اشرط عليه يكون الوزن 100% وانه رايح تفحصه بعده ولا يسبب مسحيه للكفرات الخلفيه وجربه قبل تدفع له عن الحذفه
انصحك بعد ماتصلحه تكشف عليه ميزان بالمبيوتر لو 1 ملي رايح يطلع وقيمه الوزن بالكمبيوتر 120 ريال

[ff34d]

ان شاء الله مافيه طعجه ولا شي
مشيت عليه بعد الحادث يومين وسافرت عليه من الطائف لمكه ولا فيه شي الحمدلله
لكن المكنيكي يضخم الامور لجل يزيد في الاجره

[ff34d]

السلام عليكم
امس طلعت الموتر من الورشه
طلعة المشكله مع الظربه زحف الدفرنس ٣،٥سم
ارخا في اعمدة التوازن الاربعه ورجع الدفرنس مكانه الاصلي حسب القواعد الموجوده في البودي حقة الدفرنس
والحمدلله رجعت السياره مثل اول واحسن
الله يكفينا ويكفيكم شر الحوادث

[ابوراكان تبوك]

الحمد لله ع السلامه اخوي والحمد لله على انتهاء المشكله وموفق بإذن الله

[ff34d]

الله يسلمك

[ls1.5700]

عدل عمود التوازن وعلى مسؤليتي اذا ماضبط شد بلد

[اليامي قطر]

تكفى ياذيبان الحق علي

عندي الهدد موديل 2000 جاه حادث فالزاويه اليسار خلفي

وحصل فيه الاتي :

1- الدفرنش طلع اشوي يمين تقريبا نفس موترك
2- الكفر اليسار تقدم شوي للامام

عندكم حل مناسب حتى لو فالحساء انا من اهل قطر

تكفون يااخوان شما توني مركب بالون جدد والكفر الايسر الخلفي يمسح بسرعه قبل
الكفرات الثانيه ... افيدوني :(:(

[أرض الحجاز]

أخوي فيه شدادات تمسك الدفرنس بالشاصي بشكل حرف U

تأكد منها أو استبدلها أفضل

مع إعادة تركيب الدفرنس والوزن فقط

رح عند الرجال أبو 600 ريال وتوكل على الله

وإذا فيه أي مشكلة بعد التركيب بتبين مع الطريق والوزن عند الكمبيوتر



بالتوفيق

[اليامي قطر]

أخوي فيه شدادات تمسك الدفرنس بالشاصي بشكل حرف U

تأكد منها أو استبدلها أفضل

مع إعادة تركيب الدفرنس والوزن فقط

رح عند الرجال أبو 600 ريال وتوكل على الله

وإذا فيه أي مشكلة بعد التركيب بتبين مع الطريق والوزن عند الكمبيوتر



بالتوفيق


مدري اذا تقصدني ياخوك انا من اهل قطر وين ابو 600 ؟؟

[ff34d]

صبحكم الله بالخير
اخوي راعي الهدد الشغله ان شاء الله بسيطه لايجيك واحد يسوي فاهم عليك ويقلك الشاص فيه مشكله
حل المشكله كاللاتي
مر اقرب ميزان اذرعه ومقصات وارف الموتر وشوف الدفرنس جنبه عامودين صغيره واحد يمين وواحد يسار طولها تقريباً ١٥ سم هذي تبين لك مقدار الحذفه الخارجيه
الشي الثاني تروح لحقين تربيط المواتر خله يكشف عليه مزبوط وشوف وش يقلك اذا قلك الشاص فيه مشكله قله لاتسوي شي في الشاص اوزن الدفرنس فقط
ولاتاخذ على كلام او واحد مر وشوف كذ واحد
ماعند الا العافيه

[اليامي قطر]

صبحكم الله بالخير
اخوي راعي الهدد الشغله ان شاء الله بسيطه لايجيك واحد يسوي فاهم عليك ويقلك الشاص فيه مشكله
حل المشكله كاللاتي
مر اقرب ميزان اذرعه ومقصات وارف الموتر وشوف الدفرنس جنبه عامودين صغيره واحد يمين وواحد يسار طولها تقريباً ١٥ سم هذي تبين لك مقدار الحذفه الخارجيه
الشي الثاني تروح لحقين تربيط المواتر خله يكشف عليه مزبوط وشوف وش يقلك اذا قلك الشاص فيه مشكله قله لاتسوي شي في الشاص اوزن الدفرنس فقط
ولاتاخذ على كلام او واحد مر وشوف كذ واحد
ماعند الا العافيه


مدري اذا تقصدني

عموما يعطيك العافيه وماقصرت :)