استفسار عن مقاسات الدربيل

[فهد 003]

بسم الله الرحمن الرحيم


مساكم الله بالخير جميعاا

اخواني انا ابي اشتريلي دربيل ولقيت ماركات معروفه بس المقاسات اللي مكتوبه عليها مو فاهم فيها شي

يعني بعضها مكتوب عليها 30/8 او/ 11 ومن هالارقام وماني فاهم فيها شي

ياليت احد يفهمني فيها وش الاحسن والافضل بهالمقاسات

وانا بحثت بالمنتدى عن موضوع يخص هذه المقاسات ولا حصلت شي


دمتم بخير

[zya]

الرقم الصغير يعني عدد مرات التكبير
الرقم الكبير قطر العدسة بالمليمتر
مثلا دربيل مقاس 30:8
8 عدد مرات التكبير
30 قطر العدسة

[هآوي الصيد]

افادك الاخ Zya وكلن وهوايته وكل مازادت الارقام كل ماكبر حجم الدربيل وزادت قوة التقريب.. انا افضل 7 *50 او 10 * 50 .. مقاس ماعليه خلاف وكويس ..

[فهد33]

هلا باخوي فهد003

أنا مثلك سيم سيم قريت عنهن واشتريت لي واحد ومازال بالطريق ماوصل الله يجيبه والدرابيل أشكال وأنواع ومثل ماذكرت يحتار الواحد بينهن لكن يهمك انك تعرف الزين والفرق بينهن ..
آخر ماتوصلت له ان المقاس مثلاً 50*10 يعني العدد 10 تضربه في 10
وال50 هي المدى اللي تستطيع مشاهدته من خلال العدسة من جهة اليمين واليسار للنظر وال10 هي المسافة التي تستطيع أن تشاهد بعدها طبعا مضروب في 10 .. هذا حسب فهمي إذا فيه أحد يعرف أكثر أو يقدر يصحح لي يتفضل نبي نستفيد ..

والسعر تراه ماله علاقة بالبعد فيه درابيل مداها قريب لكن سعرها غالي حسب جودة النوعية المصنعه منها الكواليتي ..

ايضا:-
الدربيل وطريقة قياسه للمسافات ومعلومات تهمك خاصة بالدربيل binoculars
الكثير لايعرف معلومات عن الدربيل وكيفية طريقة في قياس المسافات وماهي العلامات التي على الدربيل او المنظار
لذلك هذه معلومات تهمك لو كنت تريد شراء دربيل
دائما نشاهد في الدربيل قياس مثلا 7x50
معنى الارقام على الدربيل مثلا 7x50 او 8x30
الدربيل 7x50 الرقم الذي بالاحمر يعني عدد مرات التكبير يعني انه يكبر أو يقرب 7 مرات عن العين المجرده
و الدربيل 8x30 الرقم الي بالون الاحمر 8 يعني انه يكبر 8 مرات عن العين المجرده اما بالنسبه الارقام الي بالون الازرق الي هي 50 و 30 هاذا يعني مقاس كبر العدسه

عوامل اختيار الدربيل
1- الرقم الاول الرقم الاحمر هو قوه التقريب كل مازاد التقريب الي قل الرؤيه الميدانيه وقل ثبات الدربيل

2- الرقم الكبير الازرق هو مقاس العدسه كل مازاد الرقم الازرق يعني كبر العدسه صار الدربيل اكثر وضوح ورؤية واشرقا وصفاوه وكبر حجمه وثقل وزنه يعني 7x50 اكبر واثقل واكثر وضوحا من 8x30 لكن 8x30 اكثر تقريب للاشياء واخف واقل رويه ميدانيه من 7x50

بختصار اذا كنت تبحث عن قوه تقريب قويه مثل 10x50 و 15x50 تقل الرؤيه الميدانيه ويقل ثبات الدربيل يهتز ماتقدر تشوف زين ويكبر حجمه ويثقل
بعض الدرابيل مزوده بنظام ثبات الصوره وهي غاليه جدا

واذا كنت تبحث عن وضوح وثبات رويه ميدانيه واسعه عندك 7x50 و 8x30
و 6x30 ولكن تقل عندك القوه التقريبيه للبعيد

[مفكر إسلامي]

ايضا المهم هو بماذا تريد ان تستخدمه تريد بالبر وطيور ونحو ذلك خذ 7في 50
اما اذا تبي تناظر النجوم خذ اقل شي 15 في 80 وتجد اكبر من ذلك

[فهد 003]

جزااااكم الله خير على التوضيح والحين صارت هالارقام عندي واضحه ومفهومه

استخدامي له ابيه للبر ويكون حجمه صغير عشان يسهل نقله وحمله في ادراج السيارة

[أبو فااارس]

فهد اهم شي بالدربيل انه يكون راكد وبارد على العين والميزه هاذي ماتلقاها الا بالدرابيل الغاليه ارتبها لك اول شي بالاسم
السوارفسكي 8000 ريال وطالع
السايز 5000 ريال وطالع
اللايكا 3000 ريال وطالع
الستنر الالماني وهذا انصحك فيه من 1000 ريال وطالع
الجلوري وهذا دربيل يناسبك مع الستنر مقارنه بسعره من 800 ريال الى1500
غيرهن لاتدور
انا اتكلم لك عن المقاسات المتوسطه للدرابيل 7*50 اللي ذكرت فوق وكل مازاد كبر الدربيل زاد سعره بالنسبه لي افضل السايز 10*42 الالماني الاصلي واللي معي الان الستنر الالماني 7*50 سعره 1200 ومكفيني اتمنى اني افدتك

[طير الحماد1]

السلام عليكم
انا يااخوان عندي دربيلين سويت مقارنه بينهن:-
1/ دربيل سايز ربل 7*50 t*
2/ دربيل سوارفسكي 8*30 ربل جيشي
لاحظت مايلي :-
رغم اختلاف المقاس والحجم انه نفس المساحه التي اشاهدها بالسايز نفسها اشاهدها بالسوارفسكي . طبعا حدود وعلامات محدده . بل على العكس 8*30 اكثر وضوح من السايز. هذه تجربه قد تصيب او تخطي.
طبعا بعت السايز واحتفظت بالسوارفسكي لصغر حجمه.
ودمتم سالمين.