ليه كثير من اهل البر يكرهون النفود باالصيف

[ألخشيبي]

السلام عليكم يااهل مكشات
ليه اهل البر مايحبون النفود باالصيف
وبعضهم يطلع لكن ماينام ابدآ
وهل هو اخطر من الضلع والشعبان
عن نفسي مااشوف فيه شي
لعل احد يفيدنا عن خبره او معلومة

[سمان البر4]

امكن من العقارب والحيايه

[ناصر]

تخرج كل الدواب فيه والجو حار صعب المبات فيه

[sniuor]

النفود باليل سموم وذواري من ناحيه هل هي اخطر من الضلع والشعبان لا بالعكس اضلع يجمع كل الدواب والشعيب على حسب نظافه المنطقه الى سلمت من خرابة الفيران وعلى العموم اقراء المعوذات وتوكل على الله ولايصيبك شيء باذن الله

[ابوعوض اليامي]

عجاج وسوافي تدفن الواحد

لكن لا جاها المطر وغدت كنها سراميك تشرح الصدر

[فياض الربيع]

فرق بين الصيف والشتاء خاصه اذا نزل المطر بأذن الله
يصير النفود يفتح النفس وماودك تطلع منه اما بالصيف
عجاج وغبار مع انه بالليل الايام هذي ولا احسن منه
طلعنا قبل امس للخراره وتعشينا هناك بالنفود براد بالليل
بس الشتاء غير غير غير له طعم البر

[الدبا]

خروج الدواب وما تقدر تنام من الحر !!!

[ألخشيبي]

ماقصرتوا جزاكم الله خير لكن ظهور الدواب بالنفود قليل لان مالها مخبأ
لكن الشعبان والجبال لها عدة اماكن تلوذ وتختبىء فيه
ومع هذا الكثير يشوف النفود اخطر وهذا العجب

[ابوعوض اليامي]

بالعكس فالليل تقدر ترقد ولا عليك خلاف والدواب فيها شوي مهب واجد لكن البلا من 10 الظهر ووراء اسالني عنها سوافي وسموم

[تزبطي]

السبب بسيط

حرررررر

موفق

[خالد الشمري20]

السلام عليكم ورحمة الله وبركاتة


ليس شرط

لكن بشتاء افضل...

[ابـو ولـيـد الـحـربـي]

لان في الصيف النفوذ ميلان من العقارب والضبان والثعابين وكل انواع الحشرات ثاني شي مرا حر

[ابورايف]

حياك الله



الأخوان ماقصروا لكن راح أعطيك الي عندي



طبعاً النفود في الليل مثل هذي الأيام حلوه لكن ينبغي أخذ الحيطه والحذر من الدواب



مثل العقارب والثعابين ... أم جنيب وغيرها



وللمعلوميه :: أغلب الثعابين ليليه المعيشة يعني ماتخرج الا بالليل للبحث عن الغذاء



والأمر الأخر هوات الرحلات يبحثون عن الجو المناسب أي البارد والأبعض الأخر ليست مهمه لديه



أتنمنى أني فدتك



تقبل مروري وردي

[أبوفهد3]

الجو له دور اخوي

[عابد-]

الحر الحر والسموم والسوافي والجو المكفهر
كلها عوامل منفره من الصحراء فالصيف

[ألخشيبي]

ماقصرتوا الله يحفظكم لكن القصد انه لايوجد مكان لدواب تلوذ وتختبىء فيه
الا ام اجنيب وهذامعروف مشهور اما الدواب الاخرى اقول ان هذا الكلام غير صحيح
بل وكلام متوارث لايستند الا مصدر او معلومة اكيدة

والدليل اننا نردد كلام لانجزم بصحته
واكثر الناس لو سألتهم عن مصادفاتهم ومارؤه في النفود مع كثرة ذهابهم اليه
ومارؤو في غيره مع قلة ذهبهم اليه لاخبروك ان النفود امن بكثير من غيره

والله اعلم 0000حفظ الله الجميع بالحل والترحال والسلام

[ابورايف]

ماقصرتوا الله يحفظكم لكن القصد انه لايوجد مكان لدواب تلوذ وتختبىء فيه
الا ام اجنيب وهذامعروف مشهور اما الدواب الاخرى اقول ان هذا الكلام غير صحيح
بل وكلام متوارث لايستند الا مصدر او معلومة اكيدة

والدليل اننا نردد كلام لانجزم بصحته
واكثر الناس لو سألتهم عن مصادفاتهم ومارؤه في النفود مع كثرة ذهابهم اليه
ومارؤو في غيره مع قلة ذهبهم اليه لاخبروك ان النفود امن بكثير من غيره

والله اعلم 0000حفظ الله الجميع بالحل والترحال والسلام

غير صحيح ومن قالك أنها أمنه

بالعكس الكشاته يواجهون الدواب من عقارب وثعابين وخاصه فالصيف ...

[روقي نجد...]

وعليكم السلام ورحمة الله...بالنسبة لطلعات النفود في الصيف فهي ممتعه نوعاً ما خصوصاً الليالي المقمرة .
ويعيبها كثرة الغرازات ولو كانت السيارة رباعية بسبب حرارة الشمس تخلي النفود كنه (طحين) وأما بالنسبة للأمان البر كله ما يخلى من الثعابين والعقارب فإذا نزلت أذكر أذكار نزول المكان ولا عليك من شيء بإذن الله.

[أبو الوليد 14]

من اهم عوامل عدم الخروج هو الحررر باليل فما بالك بالظهر .
ايضا الحر يؤثر على السيارة ومع النفود تشد على الموتر وانزل واطلع بيحتمي زود .
النفود وقت الصيف نسبة الغراز كبيرة بسبب ان الارض غير متماسكة ( هيار )بفعل الريح او السافي . لكن مع المطر تشد الارض وتبرد .
مايطلع الا راعين الصيد ويتجنبون الدخول في الرملة ..يمكن تذكر سالفة المفقودين العام الماضي كان الوقت مقارب لوقتنا الان منهم من توفى الله يغفر له ويرحمه ومن هم عايش اطال الله باعمارنا واعمارهم على طاعتة سبحانه .
اما عن الدواب فهي موجودة بالنفود ووجودها في الشعبان قد يكون اكثر ، ولكن الدعاء والورد والأذكار كفيلة ان شاء الله بالحفظ من شرها .

الوالد الله يحفظه يقول بما معناه ان إذا طلعت في مكان كله خضار وشجر و زهر و ورد ...لكن الجو حااار لن تستمتع ابدا
وإذا طلعت بمكان صحراء بر صلوقعة... لكن الجو براد وغيم ستستمتع جدا

بالتوفيق

[ألخشيبي]

غير صحيح ومن قالك أنها أمنه

بالعكس الكشاته يواجهون الدواب من عقارب وثعابين وخاصه فالصيف ...


اخوي حنا نقول تواجه حقيقة لكن ليس باالكثرة الموجودة في الاماكن الاخرى

[ألخشيبي]

من اهم عوامل عدم الخروج هو الحررر باليل فما بالك بالظهر .
ايضا الحر يؤثر على السيارة ومع النفود تشد على الموتر وانزل واطلع بيحتمي زود .
النفود وقت الصيف نسبة الغراز كبيرة بسبب ان الارض غير متماسكة ( هيار )بفعل الريح او السافي . لكن مع المطر تشد الارض وتبرد .
مايطلع الا راعين الصيد ويتجنبون الدخول في الرملة ..يمكن تذكر سالفة المفقودين العام الماضي كان الوقت مقارب لوقتنا الان منهم من توفى الله يغفر له ويرحمه ومن هم عايش اطال الله باعمارنا واعمارهم على طاعتة سبحانه .
اما عن الدواب فهي موجودة بالنفود ووجودها في الشعبان قد يكون اكثر ، ولكن الدعاء والورد والأذكار كفيلة ان شاء الله بالحفظ من شرها .

الوالد الله يحفظه يقول بما معناه ان إذا طلعت في مكان كله خضار وشجر و زهر و ورد ...لكن الجو حااار لن تستمتع ابدا
وإذا طلعت بمكان صحراء بر صلوقعة... لكن الجو براد وغيم ستستمتع جدا

بالتوفيق

نعم وهذا هو الوقع الي يخالف مفاهيم كثير منا

[متابع سحاب14]

لان في الصيف النفوذ ميلان من العقارب والضبان والثعابين وكل انواع الحشرات ثاني شي مرا حر

الضبان ماتعض:D

الله يعطيك العافيه ياصاحب الموضوع وانا من وجهه نظري بسبب السافي والعقارب

[متقاعد ومرتاح]

السلام عليكم ورحمة الله وبركاته
دعاء النزول والتوكل على الله سبحانه وتعالى
بعض الكشاته يرمي البقايا من الاكل قرب مكان الجلوس والنوم وهذا خطأ كبير يجب رمي الاكل بعيد وعكس الهواء
حيث الفاريأكل بقايا الاكل والثعابين تأكل الفأر

[المطيري99]

السلام عليكم / الناس حسب معتقداتهم وانا أرى ان النوم في النفود يسحب التعب
ويريح البدن وهواه عليل بخلاف النوم على الارض الصخرية لأنها ترفع الحرارة في الجسم
وصاحبها يحس بالتعب ولا يقوم نشيطاً ، وبالنسبة للسوام فالأرض التي تكثر بها الأشواك
تقل بها السوام وظهور السوام يبدأ من المغرب الى الساعه 9 ليلاً
والله يحفظ الجميع من كل مكروه وهذا مجرد رأي شخصي .

[مخ الكشتات]

السلام عليكم ورحمة الله وبركاته

بالعكس المكشاتية يفضلون النفود بالليل بالصيف

لا ادري على ماذا ستنتجت سؤالك ؟؟

[سالم2015]

الاسباب الحر والسوافي والارض اللى تنزع الواهس

[راعي الجنوب]

يازين النفود زيناه وبس شتاء وصيف

[عز1م]

السلام عليكم يااهل مكشات
ليه اهل البر مايحبون النفود باالصيف
وبعضهم يطلع لكن ماينام ابدآ
وهل هو اخطر من الضلع والشعبان
عن نفسي مااشوف فيه شي
لعل احد يفيدنا عن خبره او معلومة


السلام عليكم ورحمة الله وبركاته

بالعكس المكشاتية يفضلون النفود بالليل بالصيف :good::good:

لا ادري على ماذا ستنتجت سؤالك ؟؟
.

بالعكس تماما

اغلب الكشاته يحبون النفود في كل وقت

الا اذا الهواء صلف
..

والمفروض الموضوع

لماذا اهل البر يحبون النفود ليلا في الصيف

[ابوعزااام]

السلام عليكم من وجهة نظري المتواضعه انه اقل اخطار من الشعيب للمبيت اما بالنسبه لعزوف اهل البر عن النفوذ عدم وجود ظل الاشجار وكثرة السوافي اما بالليل فالنفود ابرد واوسع صدر خصوصا اذا كانت قمرا ودمتم

[رعد الصيف]

النفوذ في الصيف في النهار حر ولا يوجد ظل شجر مايطاق ما في الليل مقبول لا كن قليل من الناس تخرج في الليل لعده أسباب افضل مواسم النفوذ ايام البرد وإذا الربيع موجود ذاك المطلوب والغايه

[فهد 003]

بالعكس النفود اضمن لك بالنوم من الضلعان او الشعبان
لكن في النهار ابدا ماتصلح
النهار خلك في الضلعان او الاوديه
والليل خلك في راس طعس ومايكون فيه قشع ولا فيه نبات
حتى تضمن مايجيك شي من الدواب

[راعي الرود]

اللحين بسهيل أزين وقت للنفود و كل ما تأخر الوقت كل مازان الجو و هفهف عليك البراد من الساعه 11 و طالع إلى شروق الشمس

[مكسر الشداد]

كل ما زاد عمر الرجال يزهد بالنفود ماوراه الا التغاريز وتفجير المواتر والدليل ان الباديه وهم اهل البر مايسكنون النفود بالاضافه للسافي والهوام القاتله مثل ام اجنيب تنشط ومسكنه المشجار بقيعان النفود
اما بالشتاء فهو اذرا من الصياهد بالاضافه لوجود الحطب منول يوم النفود فيه حطب

[احمد الشريف .]

العنوان يكفي انت قلت بالصيف يعني الجو اكيد بيكون حرررر
وبعد الذواري ي اخوك وبعد الدواب الله يكفينا شرها

[يكفيني نظرة]

من ناحيتي النفود بالصيف ماينفع الا بالليل والليل قصير جداً مايمدي توصل الا الساعه 1 وخط عوده وخلص الليل ولاعندك الا هالويكند تكشت به اما الشتاء لو طلعت لانهار الجو حلو ويساعد ولو اخذت من الليل اوله عندك الباقي يكفي للنوم والطريق ..

وبالنهايه كلامي عن نفسي لاني من سكان الرياض .

[تميم2222]

مافي الطعوس خير بالصيف تتعب الموتر والهوام تكثر الله يكفينا الشر وياكم وجهه نظر

[ابوخالد977]

تطلع عليك باليل اذا برد الجو لانه في النهار ما تقدر تطلع

[باسم40]

للمراح زين بس بالنهار حار (مله)

[.. PATROL ..]

السافي ثم السافي ثم السافي

[راعي الوايت]

عدم وجود الظل احد الاسباب الرئيسية
اما بالنسبه للدواب قبل سنتين في الدهناء وبعز المربعانية العقرب في وسط الجلسه لكن الحمدلله جت سليمه
عاد مادري هو طالع كذا من حاله والا جاي مع الارطى اللي حطبناه

[خشكاري]

مع احترامي لكل من رد .. نفود عن نفود يختلف ..

وشكرا لصاحب الطرح ..

[الطامي]

هلا بالجميع
ولنا مشاركه لعلها تروق لذائقتكم

البر عموما سواء كان نفودا او سهول لاخطر منه او فيه لمن يعرفه وبخصه
المبيت فيه خير من الضلعان والأحجار والمدن
طبعا في الصيف حارا وخاصة كل مأتجهت للجنوب
وفي الشتاء بارد لقلة الأشجار في بعض الأماكن
مع العلم انه كثير الرياح التي تحمل الأتربه والغبار ولاكنها مفيدة في حالة وضارة في حالة اخرى
عموما المبيت في البر وفي راس طعس خاصة في البراد هو عندي وعند كثير من الناس افضل من اجهزة التكيف وبرادها
وكل انسان وهواياته
اما من ناحية المخلوقات الصغيره كالحيات والثعابين والعقارب فهي موجوده في كل مكان
وما قدَر الله للأنسان اتى له خير او شر
شكرا للجميع

[ابو محمد 40]

النفوذ المشكله فيه الهواء يدفنك والله ما فيه احسن من نومه النفود بالصندوق

[العصيمي سلطان]

يا اخوان وشلون انزل موضوع

[طلال مكشاتي]

بالنسبه لي في الصيف ماطلع النفود.. ابشرك جاك البراد وزان وقت المكاشيت في النفود وغيرها
وشكرآ ع الموضوع.