استفسار عن وجهة للسفر

[mr.crowley]

السلام عليكم

صبحكم / مساكم الله بالخير

اخواني محتاج نصيحتكم في أفضل وجهة للسفر في شهر يناير / فبراير أو مارش مو أكيد بأي شهر منهم :p

انا معي مجموعة شباب 8 أشخاص تقريبا

المدة 10 - 12 يوم
وجهتنا كانت بالي لكن فيه ناس ما نصحوني فيها بهذا الوقت بسبب الجو

الغرض من الرحلة تمشيه مغامرة نشاطات بحريه

[خشكاري]

وعليكم السلام ..

تبي شوري خلكم على بالي دامكم مجموعة شباب ومن ناحية الجو في شهر 1 و 2 و 3 دايم نسمعها سالفة الأمطار لكن نروح ونلقى الجو عادي وامطار مهيب ذاك الزود زي مايبالغون يقلك 24 ساعة مطر لا مهوب صحيح بالي جوها متقلب وامطارها غرام .. وعز الله بتنبسطون في بالي دامكم مجموعة شباب تدورون الفله والتماشي والرياضات البحرية وغيرها .. والزين في بالي تنوع تضاريسها مابين شواطيء معتدلة وجبال باردة وغابات وانهار وشلالات .. ولاتنسى عندكم جزيرة لومبوك قريبه تخلون عفشكم عند أمانات الفندق وتاخذون خفايف شورتات وتي شيرتات وتنصونها يومين والدزه بالقارب السريع ساعة ونص وأنت فيها واحلى شي منطقة شاطيء سنقيقي .. ومن سنقيقي نص ساعة بالتكسي في طريق خيالي إلى مرفأ بانقسال تركبون القارب العام public boat الواحد ب10 آلاف روبية حدود 3 ريال ههههه وثلث ساعة تلقون نفسكم في جزيرة قيلي تراونقان gili trawangan ثاني أهم وجهة عالمية في اندونيسيا بعد بالي .. مامثلها للشباب وناسه وفله حجاج .. وتقدرون تنصونها دايركت من بالي بدون ماتمرون لومبوك وهذا إللي انصحكم فيه لأن مدة سفريتكم قصيرة .. وتتكون فيها يومين مع إني متأكد انكم راح تمددون فيها :) .. لأنها روعة ورخيصة بالحيل من ناحية السكن بحدود 300 ألف غرفة سريرين .. والمشاوي والأكل البحري المشهوره فيه الجزيرة .. وتراهي جزيرة شبه بكر مافيها سيارات ودبابات ممنوع بس عربات خيول وسياكل والجزيرة أصلا صغيرة ماتتعدى 3 كيلومتر تقريبا .. وبحرها والحيد المرجاني روعه وأهم شي السباحة الصبح او الظهر فوق الحيد .. تستأجرون عدة سنوركلنق قصبة تنفس ونظارة وزعانف تسهل عليكم السباحة كثير ب 15 ألف الشخص الواحد لوقت مفتوح وعلى البحر طوالي .. والسباحة داخل شوي مهوب تخافون ويفوتكم منظر الحيد والأسماك المتنوعة والملونة شي روعة وادمان .. تقدر تشوف صور وتقارير لها على النت ..حط بقوقل قيلي تراونقان بالعربي ولا بالإنقلش وشوفها ..

أهم شي تنتبهون له في بالي بما انكم مجموعة راح تقل عليكم تكلفة المناشط السياحية لأن كل مازاد العدد قلت التكلفة والحجوزات من المكاتب المنتشرة بمنطقة كوتا .. مثل الرياضات البحرية في شاطيء نوسا دوا والتجديف النهري في alam .. بتطلع تكلفة الواحد بحدود 250 ألف روبية للتجديف النهري إللي مايفوت وسط هذيك الطبيعة الروعة والجبال والوديان والشلالات شاملة التوصيل من السكن الساعة 8 الصبح والعودة العصر ووجبة غداء .. ونفس التكلفة للقارب السريع لقيلي تراونقان .. أما الألعاب البحرية فس شاطيء نوسا دوا بتطلع عليكم بحدود 450 ألف الشخص بما انكم قروب .. واحسن شي تتفقون معهم على 4 ألعاب .. البرشوت و البنانا بوت و الفلاينق فش و الجت سكي .. وانتم بكيفكم فيه ألعاب لكن مهيب بذاك الزود وأشرطوا على مكتب الحجز يحجز لكم عند محل ألعاب عندهم التأمين وأشرطوا المواصلات من وإلى السكن .. وإذا بغيت تشوف الألعاب وطريقتها حط بقوقل (شاطيء نوسا دوا مش حتئدر تغمض عينيك) هههه وأدخل الرابط وصفت فيه الالعاب بالصور في تقرير قديم ايام الزحف ههههه ..

وإذا بغيت أرشح لك سكن نظيف ورخيص في بالي أو لومبوك أو قيلي تراونقان أبشر وترى طريقتي انا وأخواي في السكن أهم شي يكون نظيف ومريح مهوب شرط غلاء وفخامة ودلع لأن نظامنا نطلع من السكن الصبح مافيه شخري للظهر ممنوع :) .. وما نرجع له إلا للنوم بس .. كل وقتنا تماشي ومطامر :) ..
أرسل لك عناوين على الخاص اذا بغيت علشان محد يقول أسوي دعاية مجانية ..

وأي استفسار عن بالي او لومبوك او جزر قيلي الثلاث واندونيسيا عموما انا حاضر دامكم مجموعة شباب علكم تستفيدون وتنبسطون في رحلتكم ..


هذا وبالله التوفيق ...

[ابوغلاالقصيمي]

لن تندم على تجربة بالي

شي خيالي

جميع الاجواء تجدها في هالجزيره

حر برد مطر بحر ارض خضرا

كلها تجتمع ببالي