طير انفقد من اهله الاولين ونفقد من اهله التالين ((ابشركم تم التعرف على اهله))

[(هزاع)]

السلام عليكم ورحمة الله وبركاته
الله يجعل اوقاتكم كلها خير
((((الموضوع الطير موجود))))
الموضوع: طير شراه خويي وفحصه بالمستشفى وركب له حجل باسمه ونبي نعطيه بعد اذنكم اسم وهمي (حمد)
ودعا الطير والطير تنكر عليه وحام وفقده ولاحصله بذاك اليوم
وعمم عليه بالمستشفى
وخذ ايام وتصلو عليه رجال(بموجب الحجل) وبلغوه ان طيره عندهم ولاقصرو الاجواد ادو امانتهم
الا ان (خويي حمد) مابلغ المستشفى عن انه لقى الطير
وباع الطير على احد الصقاره المعروفين ونبي نعطيه اسم وهمي (خالد)
الاخ (خالد) باع الطير بسوق الرياض لشخص لايعرف اسمه لكنه يعرفه لاشافه:good2:
الاخ اللي شرى الطير من( خالد )قفا بالطير
وعقب مده اتصلو المستشفى( بخويي حمد)
وبلغوه ان عندهم طير مفقود وشريحته بأسمك يا (حمد )
و(حمد) صقار وعنده طيور واجد تبارك الله وانفقد له طيور من قبل
في ذلك الوقت كان في موقع لايستطيع ان يكلم الشخص اللي اتا بالطير للمستشفى
لكنه طلب من احد الاشخاص هناك ان يكرمو الذي اتا بالطير بمبلغ معقول (قضابه)
فرضي بمبلغ الف ريال وذهب
عند حضور( حمد) للمستشفى وجد ان الطير ليس من طيوره المفقوده وانما ذلك الطير الذي كان مفقود ووجده وباعه على( خالد)
اخذ (حمد)الطير وابلغ (خالد) ان الطير الذي باعه عليه موجود عنده وابلغه بما حدث
(خالد) ابلغه انه يتواجد بالسوق في اكثر الايام وعند مشاهدته لاهل الطير سوف يبلغهم
لكن بعد فتره قضى الموسم ودخلت الطيور المقيض وخويي (حمد) ابتلش بالطير ولاجا من ينشد عنه
وقيض الطير بمبلغ (2500) شامله الفحص والتطعيم
والان الطير مصفي وخويي (حمد) مبتلش
خسارته على الطير 3500 ريال
ملاحضه: عندما قضب الطير بالتالي لم يكن به حجل
المطلوب :رايكم ياصقاقير بالطير وكيفية التصرف به الله يلهمكم الرائي المبارك
او
ان راعي الطير يقراء الموضوع ويراسلني
بنوعه وماريته وحجمه ولون سبوقه يوم غدى ولون ريشته
وعمره يوم غدى واسم من اشترى منه الطير بسوق الرياض او وصف لشخص (خالد) وتاريخ فقده
الاخوه الاعضاء الذين لايستطيعون المراسله لقلة عدد مشاركاتهم
لامانع من الكتابه بالموضوع بشرط نسخ صيغة الرساله ادناه
(ادعو لي ولوالدي)



http://www.mekshat.com/pix/upload05/images245/mk210520_111rm.gif


ابشركم وجد راعي الطير
منوه في الصفحه الثانيه

[(هزاع)]

صيغة الرساله
.........................
عنوان الرساله
.........................
لي طير مفقود
....................
السلام عليكم ورحمة الله وبركاته
لي طير مفقود
نوعه :
عمره يوم غدى:
عرضه:
طوله :
ماريته:
لون سبوقه:
تاريخ فقد الطير :
اسم او وصف البائع الذي اشترى منه الطير اللي رمزنا له ب (خالد):

[THE SNIPER H]

وعليكم السلام ورحمه الله وبركاته
مشرفنا الغالي هزاع هذه المشكله ليس لها حل إلا ان الاخ حمد يمسك الطير عنده طالما رجع له ويخليه كأمانه عنده ويعلن عنه في المستشفي والقروبات والمنتديات ويوصي الاخ خالد يتابع السوق طالما انه يتواجد هناك كثير ويعرف شكل الرجل اللي اشتري منه الطير عسى الله يرده لراعيه وذلك الي نهايه الموسم وبدأ الربطه
اذا لم يستدل علي صاحب الطير الي نهايه الموسم يصير الطير للاخ حمد لانه دفع الربطه ودفع القضبه
اما لو توصل لصاحب الطير فعلي صاحب الطير دفع الربطه والقضبه
هذا والله اعلم

[(هزاع)]

حياك الله يالقناص
راي وننتظر مداخلة اخويانا ونشوف رايهم
نعم يالقناص انها مشكله لكن الحل يمكن يكون موجود ونسمعه من احد اخويانا الاعضاء
لكن الطير ابومختار يمكن لادعاه مع طيوره يدق الحوم مره ثالثه ويكون فرط بامانته
وان ابقاه بالمربط راعي المربط يبي زود وانتم اخبر

[عضيد]

الحل بسيط جدا
حيث ان الطير من العام وهو مقظوب عند حمد ولاجاه من ينشد عنه لاطلعت الطيور يحرج عليه بسوق ويشهد على البيع رجاال ثقات اثنين او اكثر ويباع
ياخذ حمد حقه والباقي يتصدق به عن صاحبه وحض ضعوف مساكين من قيمة الطير

[عابر الموج]

هلا ابو مشعل ارا ان يتجه حمد ويستفتي شيخ في بيعة الطير واذا بيع الطير قيمته ماذا يفعل بها وهل قيمة ماخسره حمد بالطير ياخذ حقه من البيعه ام لا هذا الصواب في رأيي حتى يبري ذمته من الطير لانه لايعتبر ملكا له والله ولي التوفيق

[(هزاع)]

الحل بسيط جدا
حيث ان الطير من العام وهو مقظوب عند حمد ولاجاه من ينشد عنه لاطلعت الطيور يحرج عليه بسوق ويشهد على البيع رجاال ثقات اثنين او اكثر ويباع
ياخذ حمد حقه والباقي يتصدق به عن صاحبه وحض ضعوف مساكين من قيمة الطير

رايك زين ياعضيد ولكن لاضهر راعي الطي هل له حق بالاعتراض ام لا




هلا ابو مشعل ارا ان يتجه حمد ويستفتي شيخ في بيعة الطير واذا بيع الطير قيمته ماذا يفعل بها وهل قيمة ماخسره حمد بالطير ياخذ حقه من البيعه ام لا هذا الصواب في رأيي حتى يبري ذمته من الطير لانه لايعتبر ملكا له والله ولي التوفيق



التوثق الشرعي
راي من مشرفنا القدير ابونبيل
بيؤخذ به لابراء الذمه مالنا غنا عن شرع الله ابد
تبادل الراي في حلال اخونا راعي الطير يبري الذمه
قد يكون احد قراء هذا الموضوع ويبين ونكسب اجره الله اعلم وهو القادر على كل شيء

[لحق وذبح]

السلام عليكم ورحمة الله وبركاته
فيه شي غامض بالموضوع
كيف الرجال اللي شرا الطير من خالد وخسران فيه مبلغ وفدره يرضى بالف ريال قضابه وهو شاريه على وضح النقا؟
وحمد عليه خطا بعد ماسال وشو الطير وكم عمره ومقاساته كانه راعي طير يعرف الطير طيره اللي يبيه
انا اشوف ان ماله حق يبيعه والا يتصرف به يدورون الرجال اللي عطاه المستشفى والا يعتق الطير لوجه الله

[ابوحزااااااام]

السلام عليكم وحيتو جميع
يابومشعل انا لو اني محل حمد آخذ الطير واسلمه خالد
لان الطير مشري من خالد وهو اللي يعرفهم
انا لو اني محل حمد مااطلع من مجلس خالد وهو معي
واعلم خالد باللي خسرته عشان ياخذه من اهله اذا جاو

[(هزاع)]

السلام عليكم ورحمة الله وبركاته
فيه شي غامض بالموضوع
كيف الرجال اللي شرا الطير من خالد وخسران فيه مبلغ وفدره يرضى بالف ريال قضابه وهو شاريه على وضح النقا؟
وحمد عليه خطا بعد ماسال وشو الطير وكم عمره ومقاساته كانه راعي طير يعرف الطير طيره اللي يبيه
انا اشوف ان ماله حق يبيعه والا يتصرف به يدورون الرجال اللي عطاه المستشفى والا يعتق الطير لوجه الله

حياك الله ياطويل العمر
ارجو ان تقراء الموضوع مرة اخرى
اللي جاب الطير للمستشفى شخص اخر (قاضب الطير)غير اللي شراه من خالد


السلام عليكم وحيتو جميع
يابومشعل انا لو اني محل حمد آخذ الطير واسلمه خالد
لان الطير مشري من خالد وهو اللي يعرفهم
انا لو اني محل حمد مااطلع من مجلس خالد وهو معي
واعلم خالد باللي خسرته عشان ياخذه من اهله اذا جاو

ابو حزام كلامك في محله
لكن حنى امام واقع نبيله حل منطقي
خالد ماهو مقصر لكن الطير ماهو عند راعيه وهنا المشكله
90 % ان بياصل علم الطير لراعيه عبر هذا الموضوع
اتمنا ذلك

[لامبالي]

الله يوفق حمد لما يحب وويرضى
.
والله يرد كل ذي حق حقه

[يزيد بن محمد]

السلام عليكم ورحمة الله وبركاته
الله لايهينك يابو مشعل بس لو تثبت الموضوع يكون افضل للاعضاء للنتباه للموضوع

[النداوي HZ2AF]

السلام عليكم ورحمة الله وبركاته
الرأي أعطاك إياه أبو نبيل بيض الله وجهه ووجهك
الموضوع ليس موضوع خبرة أبو تجربة أو رأي
الموضوع حكم شرعي ولا يفتيك فيه إلا أهل العلم

[(هزاع)]

السلام عليكم ورحمة الله وبركاته


الرأي أعطاك إياه أبو نبيل بيض الله وجهه ووجهك
الموضوع ليس موضوع خبرة أبو تجربة أو رأي

الموضوع حكم شرعي ولا يفتيك فيه إلا أهل العلم



ابيض وجه يالنداوي
الوجهه الشرعيه مايختلف عليها ثنين
الموضوع تناقل اخباره كثير من اخواننا من صقاري المملكه
وجاني اتصالات لاخوان لنا فاقدين طيورهم وهذا فائدة الموضوع
وايظا للموضوع فوائده اخره
1:فحص الطير قبل المشترى لعل عليه تعميم
2: وضع الحجل برجل الطير به سهوله بارجاع الطير لاهله
3:حرص اخونا حمد على عدم التصرف بالطير والاعلان عبر المنتدى ومن قبل بين صقاري المملكه
لعل ان يظهر راعي الطير قبل الاستفتاء به

[كايد]

ابلغ الكلام قله

على قولة الشيبان (طيرك لو قرنس على ايد غيرك ماعاد هو بطيرك ).
رايي الشخصي الطير صار ملك حمد لانه قرنس على ايده وخسر عليه وكما هو معلوم عند الصقاقير قرنس على أيد غيرك ماهو لك .

[ابرق الحرار]

مساكم الله بالخير

بالنسبة للموضوع شاركوا فيه الشباب الله يعطيهم العافيه ولكن رائ ان الطير ينباع ويخصم منه تكاليف قضبة الطير والقرنسه والباقي يجلس عند حمد وخلال سنة ماجاء صاحبة يتصدقها عن صاحب الطير

بدل مايجلس الطير عند حمد ويكد عليه ويكلفه اكثر وبعدبن يجيه صاحبه ويتناشبون ذاك الوقت عند التكاليف وعلمي وسلامتكم

[خشكاري]

والله لو تفكر فيها من كل النواحي مالها حل غير بيع الطير والفلوس تبقى أمانة عند حمد لين يظهر راعي الطير .. وان ما ظهر راعيه بمدة ويأس منه حمد يبري ذمته ويتصدق بالفلوس بنية الأجر لراعي الطير .. وإللي طرح الطير وخسر عليه مخير بين قسمه من الفلوس ولا الاجر وكلهم ان شاء الله مأجورين على امانتهم ..

[راعي شلهوب]

وعليكم السلام ورحمه الله وبركاته
من ناحيه الشرع اذا دار الحول على الطير فهو ل حمد ولا لراعيه حق اذا تصرف فيه بشررررط
انه نوه وشود عن الطير في الفتره اللي طير موجود فيها
وهاذا الكلام اللي متعارف عليه من خلقنا
اما يبيعه ويمسك فلوسه او يتصدق او يصرفها فهاذا راجع لحمد وعلى كيفه لان في فتره السنه يكون ملك الطير
ومن رائي الخاص قابل للصواب او للخطأ كأنه مبتلش بالطير ووصل الى حد المغثه يتصرف بالي يبيه ولا من ظهر راعيه بيتخالص هو وياه من رؤسهم ولا عليه مشروه مقيض الطير
ومتخسر والمطاليق بتعذره وماعليك اللي نيته طيبه ربي معه
والله يعطيك العافيه انت ووالدك والمسلمين

[وكّار مكّار]

السلام عليكم ورحمة الله وبركاته


الله يبارك بالشباب كلن ابدا برايه جزاهم الله خير .. ورايي ما يتبدا عليهم ولكن فالنهايه بنعطيك حل باللي جادت به انفسنا


حمد طرح طيره الي انتقلت ملكيته لشخص اخر مثلها مثل طرح طير مايعرف صاحبه

هنا من راايي انه حمد يتعامل مع القضيه كانه طرح طير بدون حجل بغض النظر ان الطير يعرفه او لا ..

يعلن عن طرح طير ولايعرف صاحبه ... واذا ما حصل صاحبه له حق يتصرف بالطير

اما يصقره الى ان يلقى صاحبه او يطلقه لوجهه الله اذا ما حب يصقره ..

والسلام عليكم ورحمة الله وبركاته

[المدلاه]

ألسلام عليكم ورحمة الله
ذكرت في بداية الموضوع ان خالد لوشاف الرجال يبي يعرفه
اعتقد لو حمد اعلن عن الطير وارفق صوره له سيكون الوصول لصاحبه اسرع لتناقل الناس الصوره عبر وسائل التواصل وتسب وغيره
يكتب على الصوره ﻻيجينا الا راعيه ﻷني اعرف وجه اللي شراه وابيه يذكرني بكم شراه وهذي للتاكيد.

[خالد العطااوي]

سلام عليكم ورحمة الله وبركاته
اول شيء حمد الطير ليه يبيعه من البدايه ..!
ثاني شيء الطير ان كان قرنسه حمد ويبحث عن راعيه بالمنتدى وغيره
بيلاقيه وان مالقاه وقرنسه عنده فهو طيررره ومثل ماقال كايد
( طيرك لو قرنس على ايد غيرك ماعاد هو بطيرك)
بمعنى ان بالشرع ان دار الحول وانت تبحث عن صاحبه ولالقيته فهو لك
بالنسبه انه يبيعه ماله حق يبيع بعدين ينشب مع الناس
وصلى الله وبارك

[(هزاع)]

الحمد والشكر لله
...............
وجد راعي الطير ولله الحمد
نتقدم للاخ الكبير ابوحسن /فخري بن غشيان(حمد)
والاخ الكبير ابونادر /بندر العنزي (خالد)
بالشكر على مابذلوه من مجهود للمحافظه على الطير واكرام الذي طرحه وتقييضه والبحث عن اهله
الى ان تعرف عليهم اخونا ابونادر ونشدهم عن الطير فاخبروه انهم فقدوه
فقال لهم ابشرو به عند الاخ الكبير ابوحسن فخري بن غشيان
الله يكثر خيرهم ويجزاهم خير