هل فيه حل لمشكلة الفراش في البرد

[nejjer]

السلام عليكم ورحمة الله وبركاته

أعضاء منتداء مكشات

انا اواجه مشاكله تتعبني في البر وهي النوم بالليل في البرد مع اني اشيل بطانيات كثيره بس بدون فائده اثلج اخر الليل

وسمعت انه فيه قطعة قماش شرشف او فوطه تشتغل على سخان كهربائي تدخلها داخل الفراش فياليت اي واحد عنده خلفيه عن هالموضوع مايبخل علي فيه .

[هلال المطيري]

السلام عليكم ياأخوي نجررر الحل عندي وأنا أبو هندي بس أن كانك من سكان الرياض:
أولا: فراش البر عن دك محل العمري الي في سوق الزل قله أبي فراش مثل فراش هلال المطيري هذا ياطويل العمر ولد جرانا فصل فراش من تصميمه القماش الخارجي تنزاني والبطانه أسفنج قاسي مصري يدبلوه والداخليه فرو تركي الي لونه حليبي لا يعطيك الأبيض .
وثانيا: رح معرض ناسا حقين الفضاء الي بال عليا قل ابي غطاء يشبه البطانيه الخفيفه لونه فضي مايل لللامعان قمته حول الألف حق نفر هذا مع الوالد يدفي لدرجه توصل 30 تحت الصفر يستخدمونه في لبس الفضاء ونيتيجته فعال مجرب الوالد وشكرا0000000000000
((((معليش على الأطاله))))

[ذيب النجيل]

خذ لك كيس نوم من الانواع الكويسه وان شاء الله ماتعرف البرد لا أول الليل ولا آخره

[( برى بحرى)]

اخى الكريم يوجد فراش بر سعره مثلا 10 دينار كويتى ويوجد سعره 50 دينار كويتى وأكثر

سوالف التفصال كلها خرطى بخرطى وانا شخصيا جربت اكثر من فراش كان مصيرهم انى رميتهم وخسرت فلوسى

اشتر لك واحد امريكى او غيره يكون شىء امرتب وفلوسه فيه وخامته تسمح بخروج بخار وعرق جسمك منه ولا تسمح بدخول البرد عليك

وجهه نظرى الشخصيه

[راشد الحربي]

نصيحتي وانا اخوك .. خذ لك فراش من السنيدي .. بس النوع الغالي ..اعتقد الان سعره ب (280 ) ريال ..وكد ومد له معي يمكن خمس سنوات .. ماعمري اخذت معي حتى الشرشف .. سكر السحاب عليك ..وبعز المربعانية .. ولاعندك مشكلة ..
تمااااااااااام تمااااااااااااااام ..

[راشد الحربي]

البطانة الداخلية فرو .. تراه ممتاااااااااز ..ولعلمك فرشته على البلاط عندي بالبيت ابغسله ..وغسلته اول شي من جهت الفرو ويوم قلبته والله مادخل إلا يمكن مقدار الكف من الماء .. بعد غسل يمكن اكثر من نص ساعة بالماء والصابون ..

[راعي الطلعات]

هلابك اخوي

افضل كيس نوم بكل صراحه ومجرب الي يكون غطائه الخارجي تنزاني اصلي والبطانه الوسطاء ام ان تكون سفنج او بعض اكياس النوم الي من هذا النوع لاتوجد بها اسفنج واهم شي والاساسي ان يكون داخليت كيس النوم فرو واعتقد مثل ما قال اخي الهوياني ان الاصلي الي يكون لونه ليس ابيض لونه اغمق بكثير من البياض قريب من اللون الحليبي لانه في وسط نومك لايتعفط ويتسفط عليك ويتعبك في النوم

وارجو ان اكون افدتك

دمت بحفظ الرحمن

[ابونايف الروقي]

حلوه ناسا وين الرجال بيكشت لعطارد ؟

[ريمون]

الاشخاص يختلفون في قدرة تحمل البرد وانصحك ان تاخذ معك بطانية ثقيلة داخل كيس النوم والافضل لك ان تنام داخل الخيمة تحياتي.

[عريدان]

إنت فكه من البطانيات ويرتاح من البرد . بعدين كثر البطانيات والخلاقين هي اللي تجيب البرد شف لك فراش من الطيبات القاضي وإلا الدريويش

[عبار درب]

بعطيك نصيحة تنهي مشكلك مع البرد فيه عند الصيدليات قربة حقة التصخين خذلك ثنتين و اذا جيت تبي تنام عبهن من المفواح لازم يصير الماء فايح او حول الفوح حط وحدة عند رجولك و وحدة عند جنبك ونم انس البرد طريقة مجربة ونتائجها 100%

[ALBDRANE]

التنزاني أبو فرو أصلي وبس

[nejjer]

للاسف كل حلولكم مراح تنفع مع هالبرد

على العموم مشكورين ماقصرتم :(



V

V

V

V

V

V

V

V

V

V

V

V

V

V

V





http://www.mekshat.com/pix/upload/images24/mk40025_alim1.jpg

[rehaam88]

ربنا وربك الله

[كايد]

اخوي اذا انت تعاني من برودة الاطراف مثلي ..سابقا

دواك الحجامة .............


والله اني كنت اروح لدورة المياه (اكرمكم الله اطير شراب كل ربع ساعة لان اطرافي ثلج)


ورحت بالصدفة لقيت دعاية لمركز دوفن الطبي في دكتور اسمه ماهر سعودي مطوع وفيه خير شروا من يقرأ


المهم شرحت لك وحجمت ولله الحمد.....................تصدق ما كنت انام بالبر خوفا من هذه المشكلة

وهذا تلفونهم2865665
2860044

بالرياض على شارع الخزان ............جرب اخوي واذا ما نفع ادفع التكلفة .ههههههههههههههههههههههههه

[jaber280]

أخي عليك بفراش امريكي من شركة كولمن اختار الذي يتحمل لغاية 20- درجة الحرارة وشوف الفرق .

[أبوالوليد]

حياك الله يا بعدي ..
لا أدري ما سبب البرد .. ؟ هل بسبب الفراش .. !؟
أم أنك أنت بك برد ..

لكن أبعطيك رأيي ..
سبق وأن استشرت الإخوة عن فراش بر ممتاز ..
فأشاروا علي وأخذت واحد .. وجربته الثلاثة أيام الماضية بالتنهاة ..
كان رااائع جدا .. وادفي أيضا ..

هنا رابط الموضوع .. ومواصفات الفراش وضعته بأحد مشاركاتي ..

http://mekshat.com/vb/showthread.php?t=69417&page=1&pp=15


رعاك الله ..

[NOOOMAS]

تبي حل بسيط خذ لك بطانيه غاطين حسب مقاس فراشك وخيطها على الفراش من داخل في الغرابي نراي مجربها في درجة حرارة وصلت الى 2 وجرب وادعلي

[ولد شقرا]

تبي حل بسيط جدا

خذ لك كيس خيش / قماش

بعد ما تنتهي من النار خذ لك التراب اللي حول النار بس لا يكون فيه جمر وحطه في الكيس

لف كيس القماش بطبقة ثانية من القماش وخله تحت رجليك هو احسن من بربسة المويه

[طارق الحربي]

والله اللي انا مجربه فراش القاضي اللي ب 350 ريال

طبعا هم عندهم 3 انواع خذ احسن نوع وتبي تدعيلي

[قارئ]

فراش القاضي الغالي ما مثله

جربته وجربه غيري

[باثفندر]

http://www.mekshat.com/pix/upload/sign/images/mk41765.gif
المشكلة ياخوان ان الفراش مهما كان دافي ونوع جيد يكون قلبة بارد يعني يبيلك وقت لين جسمك يطلع حرارة ويدفي الفراش عشان تدفى انت وياه وهذا العملية تستغرق حوالي عشر دقايق تقريبا وبعدين لو دفيت وصكيت الكيس مجرد تتحرك او تنقلب يدخل عليك هوا من برا الفراش تقول فريزر .
فالحل المجرب انك تنام مسكر الفراش وطلع راسك وتغطي باقي جسمك ببطانية خارجية .

[الجافي]

الاخ نجر ارسلتلك على الخاص

[الشايب 1]

والله ياخوك انا عانيت نفس المشكله ولاكن لقيت الحل انك مهما حطيت داخل الفراش بطانيه بتشعر بالبرد والحل اني حطيت بطانيه من فوق الفراش يعني من برا بس تكون بطانيه كبيره شوي ( راهيه ) تغطي الفراش وراح تشوف الفرق انا جربتها والي كانوا معي جربوها .

[HAMAD554]

فراش القاضي ورح لهلك دعاية ههههههههههههههه

بس بصراحة هو الافضل

[nejjer]

اشكركم جميع من شارك بهالموضوع

صراحة اعجبتني الحلولو بس شدني حل الأخ ولد شقراء
حلك اخوي جربناة مره في عام 1421هـ واحد من الشباب اخذ المله حقت النار وفرقها تحت الفراش بس بغاء يروح فيها كان فيه جمره صغيره ماحس فيها بعد ساعه من نومنا ماسمعنا إلا صوت خوينا يصارخ داخل فراشه ههههههههههههههههههههههههههه احرقت فراشة الجمره ونام ذاك اليوم بالسياره .

واخي الجافي رديت على رسالتك بالخاص وياليت ترد علي بأسرع وقت قبل عطلة الربيع.

[البّري]

شف اخوي

من اهم الامور في النوم ومجربه انا منذ سنتين الى الآن

1- لا تضع الفراش على الارض مباشرة بل افرشه فوق فرشه
2- اسفط البطانيه خلها غاطين وافرشها تحتك
3- الغطا اللي عليك ما فيه مشكله كبيره لو يكون مشلح (بشت) او بطايه خفيفه

وان كان داخل الفراش فرو احسن

دمتم بود

اخوكم البري