استفسار عن طير مشابطي

[أبومحمد عنيزة]

يوجد طير بس الله يهديه راعي مشابط ومشاكل. هل يوجد طريقة لترك هذا الطبع منه ولكم جزيل الشكر يا أحبابنا الغاليين

[عاشق التوام]

ممكن توضح أكثر يابو محمد
أنا بجاوبك على اللي فهمته منك وعلى حد علمي

إذا كان قصدك اللي يكوش فمالك ألا أنك تعلفه على يدك بدون سحب العلف إياً كان لين يخلص والمقصد التعويد لأن الطيور اللي تكوش عند العلف وتشبط هذي عانت من سحب العلف منها وهي تعلف

وإذا كان يشابط الطيور غالباً سببه الجوع أو إختلاف وقت العلف
لأن بعض الطيور من يمر عليها الوقت المتعود على العلف فيه تلقاه يكفخ وتكثر حركته يدور العلف
وذا ممكن يكون حله بالتعويد على وقت معين للعلف بدون تركه والأفضل قبل المغرب بالضبط وعلف اليوم هو نفس علف باكر أعني تعوّده على مقدار معين من العلف حسب وزنة هداده
لايكثر ويصطنع ويختلف في الهداد ولا يقل ويضعف ويختلف بعد في هداده
وكل اللي قلته يبي له وقت وصبر
للعلم عند بعض الصقاقير مثل هالطبوع تعتبر عذروب أو عيب في الطير فالبعض يعرّضه السوق على طول والبعض يجاهد فيه لين يغير هالطبوع حسب مهارته

ردي يحتمل الخطأ ويحتمل الصواب ومن لديه خبره بهالموضوع يفيدنا أنا وأنت إن شاء الله

وتقبل مروري،،،

[أبومحمد عنيزة]

بيض الله وجهك ياعاشق التوام.. كفيت ووفيت
لاحرمك ربي الجنه

[أبو فااارس]

بالنسبه للمشابطي اللي يلحق الطير ويعاقه هذا ماله حل طال عمرك ويعتبر عيب والقصر مايجيب نتيجه

[راعي الدويمع]

مافيك حيله يبيلك وقت وصبر على تطبيعه والله يعينك