عمود الكردان وعمود الدبل

[فهد -]

السلام عليكم ورحمة الله وبركاته ..
الله يمسيكم بالخير جميعا اخواني اعضاء المنتدى

الموضوع الله يسلمكم ، عندي باترول صالون موديل 94 .. على سرعة 80 وفوق تجي رجه تنخل الموتر نخل كل شي بالسياره يهز ويرقل مع الرجه .. كل مازادات السرعه زادت الرجه وصار صوتها مزعج .. بعض الربع قالولي عمود الدبل او عمود الكردان ويمكن الصليبات تعبانه .... الخ .. نصحوني بورشة ( وحيد ) اللي بالصناعيه القديمه انه متخصص بعمود الكردان والدبل .. رحت له وقال ما اشتغل الباترول القديم ، وانها ماتتصلح !! يتغير احسن .. الجديد 2000 ريال والمستعمل 1500 ريال
سؤالي يالربع .. فعلا مايتصلح عمود الباترول ؟
وانكانه يتصلح تكفوون دلوني على ورشه متخصصه بعمدان كردان ودبل الباترول .. مليت من هالمشكله اكثر من ورشه امرهم ولا لقيت حل

بانتظار الردود لا هنتوو

[LiLiiibcJI]

قبل الاستعجال أخي وربما أكون مخطئ .. تأكد من الكفر ومن الترصيص
الرجة على 80 أعتقد مالها علاقة بالعمود
يقولون بعد 80 من العمود وقبله من الكفر أو الترصيص

[فهد -]

هلا بك ياخوي

الرجه تبدأ من سرعة 80 وتستمر لحد 160 و 180 .. وما اعتقد ترصيص او كفرات .. الكفرات جديدة ومرصصها

[LiLiiibcJI]

هلا بك ياخوي

الرجه تبدأ من سرعة 80 وتستمر لحد 160 و 180 .. وما اعتقد ترصيص او كفرات .. الكفرات جديدة ومرصصها

إذا الكفرات جديده والترضيض قريب فالأفضل تبدا بعمود الكردان الخلفي بعد أن تتأكد من أكثر من ميكانيكي منه .. ودور تشليح ستجد شيء نظيف ورخيص ولكن دور بقلبك :)
إذا خت الرجه أو تغيرت فكمل جميلك وابحث عن الثاني
علما أن الرجه مرت علي وما تتخيل الطبلون وش يسوي تحس أنه ركبه جن والعياذ بالله فلفت نظري أحدهم إلى الكفرات وبالفعل غيرت كفر ووزنت أذرعه ومقصات ولله الحمد راحت الرجه

[فهد -]

الله يجزاك خير ويبيض وجهك على النصيحه يالغالي .. ممكن كلامك صحيح
لكن اطمع ان احد الاخوان يزودني بورشه متخصصه بعامود ودبل الباترول .. واروح لهم وافحص ليطمئن قلبي :-)

[فهد -]

ياشباب .. هل من جواب :director:

[ابو خالد 111]

اخي الفاضل

الرجه اللي تجيك على ال 80 وانت طالع تحس ان الموتر بيطير من يدك والدركسون ماعاد تقدر تمسكه وتحس الموتر بيتفكك ؟؟

[فهد -]

ايه .. وكثير اكدوا لي انه من عمود الدبل وعمود الكردان وان الصليبات كلها تعبانه او حدى العمدان .. والصدق انا شاك فيها من زمان بس زادت بقووه هاليومين ثلاثه الاخيره .. صرت ما احرص احرك الموتر ولا اسوقه .. اخاف ينطلق شي وانا اسوق ههههههه

[ابو خالد 111]

اخوي كانت معي

بس لاعمود دبل ولا عمود كردان

انت كفراتك بالون ؟؟

اذا بالون رصص ارضي وخله يحط مع الترصيص صمغ سوبر قلو علشان يثبت مره

واذا غير كذا تعالي خاص

[فهد -]

مالك لوا يالغالي .. كفراتي دانلوب .. ومرصصه ترصيص ارضي وحاط سوبر قلو شوف عيني

ما اقدر اجيك بالخاص .. لازم مشاركاتي توصل لـ 50 مشاركه عشان اقدر ارسل خاص

[A L - F A I Z]

صباح الخير
فيه ورشة الونيان بالصناعية القديمة
مكانهم جنب فرع بنك الراجحي
ابد لاجاك الفرع معه لف يمين ثاني ورشة يسار
فيها شايب نصوح وحبيب وشغله نظيف
دخلت له مره بنفس مشكلتك
قال لو بصلح بيحوس والخ
ركب فرارات وريح بالك
سويتها والحمد الله راحت 200 بالميه من الرجه

[فهد -]

الموتر عليه فرارات يالغالي
لكن ما يمنع ازوره باقرب فرصه واخذ الشور .. يمكن تزين الامور ان شاء الله

على كثر ماقريت عن هالموضوع وهالمشكله بالذات .. بس ما اشوف احد تكلم عن ورشه معينه متخصصه بهالشي !!

[الحميضاني]

السلام عليكم ورحمه الله وبركاته
صارت معي بباترول 96 رجه قويه كل ما بالسياراه يرج فيه ربلتين قدام بالعمود اللي يركب فيه مساعد الدركسيون غيرتهن وارحت المشكله كلفني 200 ريال مع شغل يده وصارت بسيارة واحد من اخوياي وغير الربل وراحت المشكله

[فهد -]

هلا بك اخوي الحميضاني
برضه وجهة نظر ولازم اخذها بعين الاعتبار .. ترا كل اللي قلتوه قاعد اقيده عندي هههههههه .. وبروح للصناعيه ويا انا يا هالرجه ..

بس اكرر سؤالي .. مافيه ورشه متخصصه بعمدان الباترول ؟ غير مركز ( وحيد ) طبعاً

[ع المشاري]

انت في الرياض شوف ابدلك على ورشه فيها سواداني ميكانيكي كويس شفت المسلخ اللي في صناعية النسيم فيه شارع قبل تاصل المسلخ وانت جاي من الحطب ادخل مع الشارع واتجه غرب شف اول ملف اوثاني ملف على يمناك بعد ماتمش تقريبا خمسين متر او اقل فيه ورشه على يدك اليسار فيها سوداني اسمه بشرى اسئل عنه في هذي المنطقه هو معروف انا متأكد انه يبي يفيدك لاانه يشتغل في الباترولات والله يوفق

[فهد -]

الله يجزاك خير ياخيي
ان شاء الله بمره واشوف وش يصير واعطيك العلم

[فهد -]

الله يمسيك بالخير اخوي ع المشاري
رحت للمهندس الميكانيكي السوداني " بشرى " طبعاً بعد جهد جهيد لين حصلت ورشته .. لان اللي وصفت لي تركها نقل عنها .. قالي مايشتغل عمود الكردان او الدبل .. واني يبيلي اروح لمخرطه ..
الله يجزاك الجنه يارب

[فهد -]

السلام عليكم .. الله يمسيكم بالخير

واحد من الربع قالي اروح لورشة ابو ابراهيم الثنيان بصناعية الدائري اللي بمخرج 18 .. يقول كل شغله ومتخصص بالباترول والباثفندر وانه ا نشاء الله ممكن يفيدني بمشكلتي ..
قد مرت عليكم هالورشه ؟ من يعرف رقم ابو ابراهيم الثنيان ؟

[BLA6K]

أنت طلبت شخص متخصص عمدان وأنا بوصف لك شخص متخصص عمدان عن تجربة بغض النظر عن سبب مشكلتك
الوصف ياطويل العمر وأنت رايح للصناعية القديمه مخرج 17
1- بتجيك أول اشارة عند الصناعية تاخذ يسار كانك تبي تدخل للورش
2-وسيدا لين ينتهي الخط تروح يميــــــــــن
3-وتمشي سيدا لين نهاية الطريق وتاخذ يسار بعدين يمين
4- تمشي سيدا يجيك تقاطع صغير تتعداه بعد التقاطع على يدك اليمين تقريباا خامس ورشة مكتوب مخرطة بشاور أسم العامل أحمد

[فهد -]

وصل الوصف ياحيي .. بمره ان شاء الله واعلمك وش يصير معي والله يكتب الخير والصالح
الله يجزاك الجنه يارب

[د ك م 586]

بما انك مركب فرارات نستبعد العمود الامامي
فاذا المساله من عمود فركز على العمود الخلفي
طيب رحت لاحد يفحصه وقال لك ان الصليبات خربانه او الفلنجه متوسعه؟؟؟
مع ان الرجه تجي من الصليب اوطعج في العمود لان الفلنجه تسبب صوت

شف لك اقرب حفره وانزل تحت الموتر وارفع احد الكفرات الخلفية ودور الكفر وهز العمود فوق وتحت وبتبان المشكله باذن الله

[الضرغام@@]

مساك الله بالخير
فك عمود الكردان وجرب الموتر انا معي جكسار واذا وصلت 140 يرج الموتر كله وغيرت الصليبات ولافيه فايده وفكيت عمود الكردان وجربت الموتر وراحت الرجه وصارت المشكله في العمود .