حرارة الباترول ( الفتك ) ارجو المساعده !!!

[the_gold]

سلام عليكم

بالمختصر مشكلتي ارتفاع الحراره ونقص موية الرديتر بين فتره يوم او يومين
مقدار دبه مويه ام ريالين
رحت اكثر من ورشه رديترات وكل واحد يفتي من راسه او بالاصح ماعرف المشكله
وكلهم يقلون مافيه تهريب !
وفيه احد الورش ضيق صدري صراحه وهي ورشة البركه لرديتر
ذكر لي ان المشكله في راس الوجهه وبالفعل شفت بقعة زيت بسيطه على غطاء الداخلي لزيت
المكينه لونه ابيض
بعدها رحت لورشه مختصه بالباترول وفحص زيت المكينه والقير وقاال المشكله ماهي من الراس
تأكد من الطبات والرديتر
وكذالك وصاني ب اضافة محلول او دواء لمعالجة ان كان فيه تهريب او تشققات وشريت المحلول ب 25 ريال من المنيفي ولم استخدمه الى الان

طبيعة الموتر الان الحراره عاديه واذا نقصت يرتفع شرطه او شرطتين عن الطبيعي اصب مويه يرجع الوضع عادي
المكينه مافيها اهتزاز او مشاكل
غداً بشتري غطيان جدد
اتمنى ياخوان المساعده على الاقل بوصف ورشه ممتازه تخلصني من هالمشكله !


الموقع الرياض اقرب صناعيه لي
الصناعيه القديمه
السياره فتك 2008

[ابولولو]

أخوي جرب تغير غطاء الاديترخذ اصلي وكاله وغطاء ألقربة احتمال كبير فيه تنظيم خفيف

أنا توي مغير الغطيان حقات مؤتمري فتك ٢٠٠٦ والحمدلله تمام

وتأكد من القربة لايصدر فيه تنسيم

خذ البودرة حقت السدد وحطه بالاديتر هي رخيصه جدآ حوالي ٥ او ١٠

اهم شي غطيان اصلي

والطبات ظروري تشيك عليهن لا نهن حديد ويخربآ

انتبه تقرب المسكينه

فيه ورشه التركي مختصر للجيوب النسيان ممتازة ولا عليك من السعر صح غالين شوي بس شغله ممتاز

[the_gold]

الله يجزاك خير
ممكن وصف ورشة التركي لاني جيت محله القديم ومقفل

[ابو ايمن]

حياك الله اخي الكريم

وحيا الله اهل السفاري

انا حصل معي مشكلة في احد السيارات

وغيرت الطرمبة وماخليت شي

ومازالت مشكلة نقص الموية في كل يوم او يومين

بالاخير .. صار هناك خرم بسييط في الخرطوش مايكتشفه الميكانيكي ولا تلاحظه

لانه مايطلع الموية الا مع الضغط من السرعة او الحرارة المرتفعة ويطلع فقط بخار ماراح تلاحظ

تهريب المااء

تأكد أخي من الخراطيش خاصة الاسفل منها

والله يحفظك

[the_gold]

حياك الله يبو ايمن
اليوم فحصت السياره وتبين في غطاء المكينه مويه بيضا
لكن فيه ورشه قال ممكن تبخر لانه فحص الزيت من المعيار ولا وجد مويه

[خالد ...]

ورشة التركي مغلقـــة

فيه احد يعرف موقعها الجديد ؟؟

[ابو خالد 1992]

لك رسالة على الخاص

[فتك08]

غير الغطيان مثل ماقالوا الاخوان فان لم تنحل المشكلة
تفقد جميع الليات الصغيرة و الخراطيش لايكون فيها تنسيم و تهريب خفيف
و ترى الليات غالبا اذا كان بها تهريب مايبين والسيارة شغالة لان دورة الماء
مستمرة و يخف الضغط لكن في حال كون السيارة طافية يزيد الضغط داخل
دورة الماء و يبدأ التهريب...فاذا ماتبين تهريب و السيارة شغالة فشيك عليها
بعد ماتطفيها من مشوار كافي لتسخينها بعد 10دقايق من اطفاء المحرك

احيانا يكون التهريب بمكان مثلا فوق القزوز و يتبخر الماء بسبب حرارة القزوز
و لا تشوف له اثر على الارض

يبي لك تدقق على جميع الليات و الطبات بالكشاف

[the_gold]

ماجاني شي على الخاص
المهم ابي ورشه تبت في امور موتري وتريحني
هل هو وجه راس ولا لا

[العطاوي a511]

الليات الصغار عيب مصنعي بالفتك بدلها بليات كبس نفس المقاس واهم شي لي صغير جاي من ورى المكينه راكب بمدخل الثلاجه ولاتنسى تربط الليات زين بعد ماتبدلها وانس الحراره باذن الله

[ابوسند9]

وعليكم السلام
اخوي احينا نقص الماء يكون من تبخير بسيط وصعب اكتشافه ولازم تفحص الاتي
الليات الداخله للثلاجه داخل الغماره
كذالك الثلاجه الداخليه
كذالك افحص القربه من الاسفل التي بجانب البطاريه وجميع الليات الخارجه منها
كذالك شيك على طبات السرندل وشيك عليها وحده وحده
كذالك يوجد ليات مويه فوق راس المكينه فلازم تفك غطاء المكينه الاسود وتشيك
ولاهم يوجد هناك ماصوره جايه بالعرض فوق السلف وراكبه با السرندل مع الجنب هذي دائم يكون التهريب منها
كذالك احينا يكون التهريب من الاديتر ويكون هناك خرم بسيط ويبخر الماء وهنا مجرد النظر صعب اكتشافه يعني لازم ينفك الاديترويفحص ويضغط بالهواء والماء
والافضل فحص ما ذكرته لك والسياره شغاله والحراره مرتفعه,,ودائما غلق الماء في حال النقص عن طريق القربه اللي بجانب البطاريه وليس من الاديتر
والاهم لا تستعجل بفك الراس حتى تتاكد وتفحص كل شي واذا ما تفحص بنفسك صدقني الورش ما راح يفحص لك كل شي

[aklubiam]

غير غطاء الاديتر اصلي وحط مويه اصليه وتشوف

[craino]

حياك
يظهر والله اعلم ان عندك تهريب بسيط جدا على شكل بخار ما يظهر للفاحص بالعين المجرده
لذلك افضل طريقة هي استخدام صبغة الفلورسنت اسمها بالانجليزيه Fluorescent Dye الخاصه بنظام التبريد بحث تحط علبة صغيره مع موية الرديتر والصبغه تكون من النوع المخصص لنظام التبريد وتمشي على السياره يوم او يومين وبعدين تفحص بواسطة كشاف فلوسنت ,وراح يظهر لك مكان التهريب بوضوح هذا لو كان خارجي من اي خرطوش مهما كان حجم التهريب وبهذه الطريقة توفر على نفسك وتكشف الخراب بالضبط
انا شريت هذه الصبغه في الصيف من امريكا واذكر سعرها كان حوالي 17 دولار او شي مثل كذا من محل اسمه advance autoparts

[موتك]

اخوي الفتك اللي اعرف عنه ان رديتره كل ١٥٠ الف لازم يتغير

يعني اللي يمشي معه اكثر هذا توفيق من الله

تغير الرديتر و تشيك على الخراطيش كلها و خصوصا اللي رايح للراس هذا اهم واحد

شعر راس المكينة بسبة هالخرطوش و كلفني راس كامل

رح للرديتر السعودي بالصناعية القديمة يفحص الرديتر لك

وما يحتاج تروح للتركي ابد

مجرد اقتراح

[ابوعبدالله172]

اخي العزيز بما انه يوجد نقط بيضاء داخل غطاءالزيت معناه انه فيه تسرب ماء الى داخل المكينه والاسباب كثيره راجع اقرب ميكانيكي حتى لا تتطور مشكلك

[العطاوي a511]

حياك
يظهر والله اعلم ان عندك تهريب بسيط جدا على شكل بخار ما يظهر للفاحص بالعين المجرده
لذلك افضل طريقة هي استخدام صبغة الفلورسنت اسمها بالانجليزيه Fluorescent Dye الخاصه بنظام التبريد بحث تحط علبة صغيره مع موية الرديتر والصبغه تكون من النوع المخصص لنظام التبريد وتمشي على السياره يوم او يومين وبعدين تفحص بواسطة كشاف فلوسنت ,وراح يظهر لك مكان التهريب بوضوح هذا لو كان خارجي من اي خرطوش مهما كان حجم التهريب وبهذه الطريقة توفر على نفسك وتكشف الخراب بالضبط
انا شريت هذه الصبغه في الصيف من امريكا واذكر سعرها كان حوالي 17 دولار او شي مثل كذا من محل اسمه advance autoparts


ماظني تحصلها بالسعوديه

[البدر 707]

السلام عليكم حبيت اشارك بهذي المشاركه بخصوص التركي الله لايوفقه هذا نصاب وانحاش انا حاط سيارتي عنده قبل رمضان وصلح مكينتها وعطاني ظمان شهر بعد اسبوعين خبطت المكينه والضمان يشملها وكان في نص رمضان وقال بفحصها واشوف وكل ماكلمته قال خلنا لين ننقل ويوم جا بعد رمضان كلمته قال بعد اسبوعين لين قفل جواله وسيارتي عنده وبعدها رحت لورشته لقيت ابوابها مفتوحه ومافيه احد وجوا الورشه سيارات صغيره وصايره مثل المواقف طلعت منها ومشيت لاخر الشارع لقيت ورشه لباترول وقفت عندها ولقيت سيارتي موقفه وكنها بتشليح ولقيت واحد سعودي وسالته وين ابو صالح قال انا ادوره مثلك قلت وسيارتي وش جابها عندك قال هذي لك حنا ندورك من زمان وندور ابو صالح قلت وش جابها قال ابو صالح جابها وقال اسبوعين وننقل بالورشه الجديده وبجي اخذها هي ومعها سيارتين ومن بعدها معد رد وقفل جواله والى يومك بالشين وانا بعد بالش بس ما اقول الا الله لايوفقه وحسبي الله عليه وجعله يشوفها بعياله واغلى مايملك يارب العالمين

[AASEM]

لف الخراطيش بقصدير واطلع عليه مشوار اكرف الموتر شوي وافتح القصدير اذا فيه تبخير بتشوف ماي في القصدير لو شي بسيط (فكره جديده )

[ابوباااسل]

اخي الكريم حصلت معي نفس المشكله وكل واحد من اهل الورش يتفلسف حتى ان بعضهم قال الرأس مشعور والمكينه بتخبط
وقالوا طبات وطرمبة المويه والغطيان وخسرت على السياره واجد وفي الاخير رحت لورشه فيها واحد تركي قال لي كلتش المروحه وصارت سيارتي ولله الحمد تمام كلهمم الي قال الكلام الاول نصابين
فأنت غير كلتش المروحه بأصلي وراح تدعي لي

[فتك08]

اخي الكريم حصلت معي نفس المشكله وكل واحد من اهل الورش يتفلسف حتى ان بعضهم قال الرأس مشعور والمكينه بتخبط
وقالوا طبات وطرمبة المويه والغطيان وخسرت على السياره واجد وفي الاخير رحت لورشه فيها واحد تركي قال لي كلتش المروحه وصارت سيارتي ولله الحمد تمام كلهمم الي قال الكلام الاول نصابين
فأنت غير كلتش المروحه بأصلي وراح تدعي لي

كلامك صحيح يالغالي اذا مافيه نقص ماء
لكن اخونا ينقص عنده الماء و من ثم ترتفع الحرارة

[العطاوي a511]

السلام عليكم حبيت اشارك بهذي المشاركه بخصوص التركي الله لايوفقه هذا نصاب وانحاش انا حاط سيارتي عنده قبل رمضان وصلح مكينتها وعطاني ظمان شهر بعد اسبوعين خبطت المكينه والضمان يشملها وكان في نص رمضان وقال بفحصها واشوف وكل ماكلمته قال خلنا لين ننقل ويوم جا بعد رمضان كلمته قال بعد اسبوعين لين قفل جواله وسيارتي عنده وبعدها رحت لورشته لقيت ابوابها مفتوحه ومافيه احد وجوا الورشه سيارات صغيره وصايره مثل المواقف طلعت منها ومشيت لاخر الشارع لقيت ورشه لباترول وقفت عندها ولقيت سيارتي موقفه وكنها بتشليح ولقيت واحد سعودي وسالته وين ابو صالح قال انا ادوره مثلك قلت وسيارتي وش جابها عندك قال هذي لك حنا ندورك من زمان وندور ابو صالح قلت وش جابها قال ابو صالح جابها وقال اسبوعين وننقل بالورشه الجديده وبجي اخذها هي ومعها سيارتين ومن بعدها معد رد وقفل جواله والى يومك بالشين وانا بعد بالش بس ما اقول الا الله لايوفقه وحسبي الله عليه وجعله يشوفها بعياله واغلى مايملك يارب العالمين


اشتك عليه عند شيخ الصناعيه وراح يرجعلك فلوسك كامله ان شاء الله لاتقبل صلح معه حتى لو قال اصلحها لك قل مااثق فيك جب فلوسي بصلحها عند الاوادم اللي تخاف الله

[البدر 707]

اشتك عليه عند شيخ الصناعيه وراح يرجعلك فلوسك كامله ان شاء الله لاتقبل صلح معه حتى لو قال اصلحها لك قل مااثق فيك جب فلوسي بصلحها عند الاوادم اللي تخاف الله
المشكله انه منحاش يعني وين يحصله شيخ الصناعيه ووش سلطته عشان يجبره يسلمني فلوس