المساعد الشخصي الرقمي

مشاهدة النسخة كاملة : مشكلة ددسن 85 - الله العالم انها كربريتر!!


aL7yAwI
28/10/2014, 01:52 PM
السلام عليكم ورحمة الله وبركاته..

يا اخوان بختصر عليكم المشكلة اللي عندي واللي يقدر يفيدني فيها عسى الله يجزاه ألف خير..

كانت عندي مشكلة في الموتر وهي اني لما أتركها يومين واكثر وجيت اشغلها تتعبني حيل ولازم اشممه بنزين علشان يشتغل وكان فيه بعد تفتفه (فرقعه) خفيفه مع الشكمان تسمعها بشكل خفيف واحيان يطفى علي..

اللي صار.. اني بدلت طرمبة البنزين وغيرت اسلاك البواجي مع البواجي وكلها أصلية عدا الطرمبة يابانيه وعجزت أحصل منها أصلي.. وتحمست زياده وفكيت الكربريتر وطلعته على جنب ونظفته بمنظف كربريتر وبنزين لين صار يلق، طبعا بدون ما افككه اجزاء.. بس تنظيف ما تعبثت فيه من داخل..

النتيجه.. الموتر صار لما ادبله بنزين يشتغل مع اول دقة سلف بس لازم اصير ضاغط شوي على البنزين علشان ما يطفى بما انه بارد.. بعد كذا يصير وضعه طبيعي جدا وطبعا التفتفه ما راحت وعلى وضعها خفيفه لما احن على الموتر وادعس له..

المشكله الحاليه.. لما امشي مسافة واوقف عند تقاطع والا اشاره والا مطب تشوف الابنص ينزل وفجأه يطفى الموتر واضطر أدبل بنزين واشغل وامشي.. ولاحظت ان فيه تقطيع بسيط وانا امشي..

ف وش الحل هنا!! ودي اعرف هل المشكله هذي لها دخل بالكربريتر والا لا.!؟

نزلت مقطع فيديو اوريكم فيه شغلتين ابي اتأكد منها..
هذا المقطع: http://youtu.be/335Hhfw42R8

الشغله الاولى.. شوفوا اول قطعه أمسكها هل هي تجي كذا مرتخيه والا لازم تكون واقفه لاني لما اعدلها تسمع حنه بسيطه في المكينه وبعدها يرجع طبيعي..
الشغله الثانيه.. الباب هذا هل وضعه طبيعي كذا يجي مفتوح!! مو المفروض يتحرك مع دعسة البنزين!؟

آسف على الاطاله وبانتظار افادتكم
الاشهب 507
28/10/2014, 02:22 PM
الواضح من المقطع
وصوت الموتر ان
كلبريتك من احس مايكون
ماشاء الله تبارك الله
اخو الجديد وماقصرت في التنضيف
ماشاء الله بس شغله بصيطه
اوزن الهوى والبنزين للكلبليتر
واذا ماضبط اوزن الكويل
يمكن منه لينه بعض الاحيان
ينحل معى المطبات لين شوارعنا
حرير تعرف وش معنات حرير
مافي اي عيب احسن من اليابان
وش اليابان بجنب شوارعنا
الله يلعن من زفلت شوارعنا
ياشيخ قالك مواصفات قل والله الجلد
احسن من شوارعنا ليتهم مهدوه بس
مازفلتوه
الأشهب 507
نفود حلوان
28/10/2014, 02:49 PM
لاحض البنزين داخل الكلبليتر العوامه ربما فيه تهريب او ينشف علشان كذا ماتشتغل اليا ابطت فك الغطا القزاز وطلع العوامه البلاستك فوقها ابره تسكر البنزبن نضفها
تضبط ان شاء الله.
السيارات الاوله مبروكه
كنا نفك الكبليتر ونضفه ونازن الديلكو .
وزن الديلكو وهي شغاله قبل ماتحركه حط خط على مكانه الاول حتى لو ماضبط ترجعه مكانه لفه يمين ويسار حتى يخف صوت الموتر وثبته
هيضتنا على السيارات الوله الله يبارك لك فيها..
صاروخ الغطغط
28/10/2014, 03:50 PM
شيك على البليتين وعلى الكويل
العمده 0ون0
28/10/2014, 11:29 PM
وعليكم السلام ورحمة الله بركاته0

شييك على الابلتين اوزنه بشكل دقيق وافحص اسلاكه وغير البوبينة و افحص غطاء الديلكو اذا كان سليم نظف مساميره من الداخل من اثر اللذع وان شاء الله سهالات اخوي 0
هذا والله اعلى واعلم0
aL7yAwI
29/10/2014, 10:38 AM
فيه شي لاحظته والي أسأل عنه اذا هي عاديه والا فيها مشكله!! اللي هي الصور اللي تحت وصوت التنسيم!؟
http://im62.gulfup.com/m1uu8H.jpg

وهذا رابط مباشر:
http://im62.gulfup.com/m1uu8H.jpg

بانتظار الافادة
الاشهب 507
29/10/2014, 01:57 PM
هذى خرطوش
هوى لازم توصله
في مكانة علشان
المكينه ماتفقد الضغط
إلى داخله ويبدو انه انقص
اول اكله فار معى الزمن
تور وين يركب وغيره بلي غاز
الأشهب 507
aL7yAwI
29/10/2014, 06:30 PM
اوما فار!! هههههههههه
ما ظنيت بس ممكن واللي يخليني اقول ان المشكله كربريتر لاني عقب ما نظفته صار الموتر يطفي اذا مشيت وهديت او وقفت وآراء الشباب اللي فوق ما ودي ابدا في تطبيقها الا بعد ما اتأكد من موضوعها اول لان احتمال الموضوع سهل..
ل وفيه شغله لاحظتها وهي ان زيت الكلتش ناقص وواضح انه فيه تهريب..
هل ممكن يكون السبب منه!؟
الاشهب 507
29/10/2014, 07:13 PM
انت ذلحين
جرب إلى قلنا
لك ولا تستغرب
من الفيران أنا
فار اكل موصي الهوء
للمكيف واكل ماصورت
القربه الفلت وفي الخير
رشت في الكبوت سم
وقبضت عليه متلبس
داخل الكبوت هذي طبيعي
جدن ياكلون اي شيء حتى
اسلاك الكهرب وحتمال الكلتش
بما انه يهرب زيت ميخلي القير
يصقط في مكانه صح إذا القير
طبيعي عادي جن ينقص بس
ماهو كثير بحد المعقول
واختصر على نفسك رح لورشه
يفحص ويصله ب 50 ريال إذا الخلل
بصيط وشكرن لك عرف انك
يمكن ماتبغى تخسر على الموتر
ويمكن ان ضروفك ماتسمح لكن
هذى احسن لك أنا بلنسبه لي
مطفر بعد مافصلوني من العمل
فاطريت اي شيء يخرب أنا سويه
الين سرت معلم الحمد لله
ماشاء الله عليه
الأشهب 507
SGL
29/10/2014, 10:31 PM
هذا لي الثلاجة ﻻزم تركبه إذا عرفة وين ينشبك طرفه الأخر وعلى ماأذكر إنه حول الديلكو وعند إنفصال هذا الي راح يعلى صوت المكينة
aL7yAwI
30/10/2014, 06:38 PM
طيب بالنسبه لوزن الديلكو عادي والسياره تكون شغاله !؟
الاشهب 507
31/10/2014, 08:13 AM
اصلن ماب يوزن
إلى والسيارت شغاله
وتلاحظ إذا الصوت
حق المكينه متغير
إذا تغير إلى الاحسن
شد على هلوزنيه وحط
علامه بمزيل حبر على
مكانه الاول
وبس ما اسهل منها
الأشهب 507
aL7yAwI
31/10/2014, 03:26 PM
بغيت بس اتأكد بالصوره هل هذي عي الصاموله اللي اوزن بها الديلكو!؟


.

http:///im45.gulfup.com/3DAcuV.jpg
الاشهب 507
31/10/2014, 06:45 PM
الصورت ماطلعة
عندي
الأشهب 507
aL7yAwI
02/11/2014, 04:31 AM
هذا رابط مباشر لها اذا ما طلعتلك


http://im45.gulfup.com/3DAcuV.jpg
aL7yAwI
02/11/2014, 09:08 PM
بانتظار ردك يالاشهب واعتذر اذا ازعجتك والله يجزاك خير
aL7yAwI
04/11/2014, 02:06 PM
مازلت انتظر فزعتكم..
الميكانيكي يقول شوف كهربائي والكهربائي يقول شوف ميكانيكي!!

واذا رحت لاحد يحسسني اني ابصلحها ببلاش!!
تشوفه يناظر بنص عين المكينه ويطل في الكربريتر ويتلمس الاسلاك!!
مو واحد ولا اثنين اللي سوو كذا..
الظاهر يبون اشياء تافهه لان يحصلون من وراها دراهم ما عاد لهم في الشغالات الصدق