نور الفتك الحل

[نفود حلوان]

[CENTER]السلام عليكم

عندي نور الفتك قزاز الشمعه الامامي مشعور وبه كسر عرض
الاصبع حقين القزاز قلو مانصلحه سعره بالوكاله 1800وش الحل ياخوان شغال مافيه شي حرام ابدله
ابي افحص الموتر منتهيه الاستماره احد يخبر له تصليح
ابي قزازه بس...او احد يلحم او مستعمل سعره معقول
افزعولي جزاكم الله خير. .

[ابوسند9]

وعليكم السلام
تقدر تشتري شمعه كامله تجاريه سعرها من 150 الى 200 ريال
وعن طريق الحراره استشاور الشعر تفك غطاء الشمعه التجاريه وتركبه للشمعه المكسوره وتضع سيلكون من شان الغبار والماء
او اذا انت بالرياض تمر على شارع الغرابي ويفكوها لك
او راسل اخونا العضو فتك 08 سبق وسوها

[فتك08]

قد فكيت قزازة الشمعة بالغرابي و نظفوها و صنفروها و طبقوها بالسلكون
و سبب دخول الاتربة كان الجرم الداخلي الاسود منشعر و صلحوه بغرا مع لاصق
و السعر تقريبا 80-100ريال اذا ماني غلطان
بالنسبة لك لو تمر التشليح
او
اذكر احد الاخوان يقول انه اخذ شمعة باترول4500 اصلية ب600او حولها و فك
القزازة و طبقها لان المقاس واحد
او
تاخذ تجارية بس احتمال تصفر مع الوقت

[LiLiiibcJI]

أرى أن تشتري من محلات الزينه وإذا كانت قزاز فإن شاء الله ما تتغير ولا تصفر
فك القزاز من التجاري وركبه على جرم الأصلي ووقك الله

[الشواوي]

او شفلك واحد يجدد الاستماره بدون فحص

[نفود حلوان]

بارك الله فيكم جميعا
بالنسبه لنور4500مايركب شمعته نور واجد والفتك نورين
الزنون والعالي
لقيت نور عايدي بدون زنون 500ريال لكن شمعه واحده
تتوقعون نفس مقاس نور الفتك
شكله مختلف في التصميم مدري عن القزازه

اما تجديد الاستماره والله اني افكر بتجديدها
بمكان مابه فحص بنفس قيمة النور ويبقى منه بعد

[الشواوي]

الغاط يجددون بدون فحص

[نفود حلوان]

تسلم اخوي الشواوي
وش المطلوب بدون فحص تأمين بس
اخاف يقولون عن طريق ابشر ونا مافتحت حساب
الغاط على دربي رايح جاي من عنده

اي واحد عنده علم لا
جرائات بالغاط هل اخلص بيوم وش المطلوب..

عطوني خبر الله يجزاكم خير

[فتك08]

لايهم حساب ابشر
المطلوب
1-تامين و تقدر تامن عن طريق مباشر الراجحي ارخص من المكاتب النصابين لانهم ياخذون عمولة عليك و مبالغ فيها و مجرد قبول التأمين و دخوله النظام يكفي عن احضار الاوراق لان الاوراق راح تتأخر بمعدل72ساعة تقريبا
2-صورة بطاقة الاحوال و اعتقد الرخصة
3-ملف علاقي
4-تعريف انك من المحافظة او المراكز التابعة لها و هذا شي روتيني فقط و اجتهاد من بعض
اقسام المرور و يمكن مايطلبونه واذا يطلبونه فالمعقبين يجددونها بدون تعريف
5-تسديد رسوم الاستمارة الجديدة و تسويها عن طريق المباشر

[نفود حلوان]

جزاك الله خير رحم الله والديك ومن قرى

[راعي الرود]

اخوي انت مشكلتك القزازة بس ؟
اذا بس بالقزازة زي ماشارو عليك الاخوان
اشتر تجاري و رح للمحلات بالغرابي ولا اللي بالنسيم على عبدالرحمن بن عوف انا زينت شمعاتي حقت لاندكروزر عند المحلات بالنسيم شريت تجاري ماركه depo ثنتين بـ300 ريال و فكيت قزازهن و ركبت على الاصلي بـ80 و زي الحلاوة