ممكن تفيدوني عن دربيل سايز يا اهل الدرابيل

[قناصص الششمال]

السلام عليكم ورحمة الله وبركاته
ممكن تفيدوني عن دربيل سايز كم سعره هل احصل جديد من4000 وتحت صناعه المانيه وكم مقاسه وهل فيه سايز تقليد واحسن نوع وش وين المحلات الي احصله تبيعه اقدر اطلبه من داخل مثل محلات الرمايه بالرياض واحسن مقاس كم لاهل الطيور واستعمله زين يعني دربيل صبور الاستعمال وبادر للعين
انا اسمع ان فيه صناعه هنقاري وصيني مممكن تفيدوني ويعطيكم العافيه

[mojazaf]

فيه اخونا هداج تيما باذن الله تلقى عنده مطلوبك
ولاهو قصور بالاخوان
وكذالك اخونا نديم الخيال عارض دربيل سايز لايفوتك اذا قناي

[راح الأمل]

يفيدك اخوي المحيط ما شالله طيب ولايجيب الا الدرابيل الطيبه انصحك تاخذ منه عنده درابيل مستعمله اخو الجديد وهو معروف بالمنتدى مع احترامي للجميع .

[المتلولس]

مثل ماقالو الاخوان الربع بيفيدونك اكثر منا انا اللي اعرفه السايز التيرا مصنوع بالصين والفكتوري مصنوع بالمانيا

[X3حائل]

يا اخوان نبي الافاده عن دربيل سايز الربل حق الجيش الالماني 8على30 هل هو بارد على العين او لا وهل تنصحون فيه

[قناصص الششمال]

يعطيكم العافيه يا اخوان
بس احسن سايز. الماني لقنص الصقور ايش مقاسه وشوه الاهتزاز وكم سعره هل احصل من4000 جديد واي محل اطلبه منه طلبيه وكم تنصحوني اخذ مقاسه وشكرا لكم

[عبدالله24]

السلام عليكم و رحمة الله و بركاته
بعطيك المعلومات اللي عندي ولا نستغني عن اخواننا اهل الخبرة في مجال البصريات و الدرابيل

بما أنك سألت عن السايز ( زايس ) ، راح نقتصر الكلام في هذة الشركة فقط
بلا شك ان شركة سايز هي افضل صانع للعدسات في العالم
ولكن هذا لا يعني ان كل دربيل عليه شعار سايز يعتبر دربيل جيد
لان صناعة الدرابيل دخل فيها الفكر التجاري بدل الفكر الطبي الذي
تأسست علية الشركة حيث تأسسة على يد علماء بصريات .
بمعنى ان الشركة تصنع
الجيد الغالي
و المتوسط
و الردي الرخيص .

راح اقيم ردابيل سايز من وجهت نظري الخاصة و من واقع تجربيه .
( تقيمي قابل للخطاء او الصواب )

1: الصيني ( سايز تيرا )
يصنع في الصين وهو دربيل ردي جداً و بدون ضمان وعدساته غير عمليه ( انا مشتريه من الرماية قبل 6 شهور تقريباً وكان ممتاز وكنت اعتقد انه بديل للدرابيل الغاليه واعطيته احد اخواني لكن بعد الاستعمال طلعت فضايح الصيني وتغير شوفه وصار كأنه ابو 200 ريال )

وسعره عند الرماية 10/42 ب 1885 ريال
8/42 ب 1685 تقريباً

2 : الهنقاري

متوسط الجوده و مرتفع السعر بالنسبة لجودتة
( اللي رافع سعره شعار ساير وتحصل درابيل افضل منه و ارخص )

3 : الألماني
المجال واسع في الانواع و الفئات و المقاسات و الإستخدامات و تفاوت جودة العدسات و تعدد الطلاء على العدسات و نوع المنشور ،لذلك يصعب حصرها .

( بصفة عامة جميع درابيل سايز الألمانية ممتازة وتستاهل المبلغ اللي يندفع فيها لكن بشرط ان تختار الدربيل اللي يلبي إحتاجاتك )

بما انك راعي طيور
أنصحك بعدم أخذ مقاس تكبير اكثر من 8 و عدم أخذ مقاس قطر عدسة اقل من 40

وأقترح عليك الدرابيل التاليه
أولاً
كلاسيكي ربل مقاس 7/50


يمتاز بمجال رؤية واسع جداً و رؤية واضحة اثناء قلت الضوء مثل أوقات الصباح الباكر و عند مغيب الشمس و هالاوقات مهمة عند اهل الطيور
يعيبه كبر الحجم
سعره عند الرماية 6650 ريال
والمستعمل 4000 ريال تقريباً

ثانياً
فكتوري 8/56


يمتاز بأنة من فيئة الفيكتوري وهي قمة دربيل شركة سايز من حيث نقاوة المادة المصنعه منها العدسات و طريقة صقل العدسات و تعدد الطلاء وطريقك ترتيب العدسات و نوع المنشور وكذلك متانة الجرم الخارجي و تحمل للصدمات
سعره عند الرماية 7600 ريال تقريباً
سعره مستعمل 4500 تقريباً

ثالثا
فيكتوري 8/40 ( الشكل القديم )


نفس مواصفات الفيكتوري 8/56
لكن يعيبه صغر مجال الرؤية و يمتاز بسعره المناسب

سعره عند الرماية 4600 ريال

رابعاً

سايز HD 8/42
يمتاز بعدسات نقية ورؤية واضحه
لكن لا اعلم عن قدرة العدسات على المحافظة على جودها

وسعرة عند الرماية 3700 تقريباً

اتمنى أني افدتك
تحياتي

[قناصص الششمال]

يعطيك العافيه اخوي عبدالله على الشرح ويعطيك الف عافيه ماقصرت تسسلم

[اتحشى الهم]

الله يجزاك خير ياصاحب الموضوع
والله اني افكر بدربيل سايز الصيني ED لاكن اخوي عبدالله ماقصر بيض الله وجهه عشان نهج عنه هههههههههههههه

[تميم2222]

ياهلا معنا شخص اسمه هداج تيما رجال كفو يعرض درابيل يصفط الطيب الله يجزاه الف خير انشده عنده علم عن انوعها

[X3حائل]

سبحان الله وبحمده سبحان الله العظيم