جي مطور وارد اليحي + نيسان قير عادي بطل الدروب

[برق السر]

السلام عليكم ورحمة الله وبركاتة
اخواني أهل مكشات محتار بين الاثنين لآني مقبل علي الشراء خلال هذا الاسبوع
الجي مطور من اليحي قير تماتيك + تبترونيك وداخلية بيج بدون ثلاجة
وباقي المواصفات ما اعرفها
سعره 157000 الف وكالة
وبطل الدروب قير عادي ثمانية سردنل سعره 160000 الف
ولا اعرف مواصفاته وياليت اللي عنده خلفية عن مواصفاته يعلمني
وإدري ان الموضوع يمكن تكرر اكثر من مرة بس علي ما قال المثل
ماخب من استشار
وياليت اللي جرب الاثنين يعلمني
لان هذا المبلغ اللي اقدر احطه في موتر 160000 وابيها في موتر
العمر لآني ما اهتم في المواصفات كثير ويهمني القطع الغيار للموتر الاستهلاكية فقط
وصرف البانزين فقط
ومعروف ان الهدد من 2007 هي القوية والعزم والجديد اللي اعرف انه ضعيف عزمه
خاصه القير العادي بس التماتيك ما ادري عنه واللي اعجبني انه فية ميزة تبترونيك
بس اخاف اشرية واندم اني شريته
لاني راعي طلعات بر ولاني راعي تطعيس ومطامر
وانا كان معي برادو سته تماتيك موتر كفو بس بعته لان العيال كبرو ولا عاد يشيل
اغراضهم وخلاصه اذا صرت في خط طويل ونامو ابلش فيهم وهذا اللي خلاني
ابيعه استخدمته ثلاث سنوات بس كان موتر حلو لولا ضيقه
والآن قررت اشري موتر
تكفون يالذيابة ابي الراي من اللي يعرف احد جرب الموتر او يكون استخدمة
وسلامتكم

[برق السر]

ومن ضمن الخيارات الفتك هل التماتيك فية تبترونيك مع اني أحب القير العادي
ووش الافضل بينهم التماتيك او القير العادي لان ماعمري جربت الفتك

[XRAY MAN]

الجي عزمه ميت للأسف ماينفع والله لا في خط ولا في بر

بطل الدروب نشيط لكن يشفط البنزين شفط

حط من ضمن خياراتك الباترول السفاري الشكل القديم تراه طيب حيل

ولا تنسى صلاة الإستخاره

[برق السر]

تسلم يالغالي علي ردك وهذا اللي محيرني

[تركي الشقاوي]

نصيحه من واقع تجربه انا شريت الجي 2013 قير تماتيك + تبترونيك
والله ما جلس معي اسبوعين سافرت عليه وكان هواء قويه وعج بغى يوقف بي مييييييت حزمه
وبعته وشريت 8 سلندر
والنيسان والله مالي به خبره
والله يرزقك بالسياره اللي توسع صدرك ..

[ساكن الحنو]

160 تجيب لك جي اكس ار 2012 ثمانيه سلندر ماشي قليل واذا تبي جديد مامشى الفتك تراه موتر يطرب وسعره جديد حول مبلغك

[النمساوي 2008]

مرحبا بكـ يابرق السر

شف وانا اخوك العلم من دون قصور بالجميع

الجيوب الستة سلندر التويوتا بشكل عام
انحش من التماتيك ,, اما الي رجلة باردة وسواقته راكدة بالحيل .. بيمشي معه اي موتر

الجي اكس اول مشراي من موديل 91

وكل ثلاث سنوات تقريبا الى اربع , اطمر للموديل الجديد
بعد ماكد الموتر من مقانيص ومكاشيت الخ ....

والان معي الجي اكس 2014

جربت الثمانية والستة منها التماتيك والعادي

(( الثمانية سلندر مايسلك ويضبط معه الا القير التماتيك ))

(( الستة سلندر مايسلك ويضبط معه الا القير العادي ))

طبعا الجي اكس الستة تغيرت مكينتة للاقوى وذلك من موديل 2012 وطالع
حتى الثمانيه صار فيها بعض التعديلات البسيطة ..

لاكن موضوعنا على الستة سلندر ونركز عليه اكثر
شف وانا اخوك ..
اذا بغيت الستة سلندر الموديلات الحديثة
خذ القير العادي , واذا انت راعي نفود ورجلك حاره وتبي الموتر فزته حلوه
اضف عليه القطعه الصغيره الي تحول الدعسه من سرعة كهرب الى سركة سلك قيمتها 1200 الى 1500
راح طبعا تفرق الموتر بشكل ملاحض

وفي الاخير .. اذا تبي تماتيك خذ 8 سلندر
واذا انت راعي بر ومطامر ترى السته ممتاز وأخف وزن من الثمانية ولفاته وفزاته اوذف من الثمانية




واذا بغيت اي خدمة .. تحت امرك

وفقك الله ..

[الصيادالمليح]

خذ لك تويوتا سيكويا مكينة جبارة و سعة ورحابة

سعرها 159400 ريال النص فل

[ابو حسان الجنوبي]

انا أرشح لك نيسان الفتك موتر نشيط سواء تماتيك أو عايدي وشكله ماعليه كلام وله زباينه وقت البيع

الجي اكس لا تقرب منه مره انحش وانا اخوك

فلوسك تجيب لك 2012 GXR 3 مستخدم نظيف


وشف خل عندك قاعدة اذا انت راعي بر خذ نيسان واذا انت راعي زفلت التويوتا حلو

[برق السر]

نصيحه من واقع تجربه انا شريت الجي 2013 قير تماتيك + تبترونيك
والله ما جلس معي اسبوعين سافرت عليه وكان هواء قويه وعج بغى يوقف بي مييييييت حزمه
وبعته وشريت 8 سلندر
والنيسان والله مالي به خبره
والله يرزقك بالسياره اللي توسع صدرك ..

يعني حتي التماتيك عزمه ضعيف

وكيف الثمانية معك في النفود وهل لاحظه علية ملاحظات

وكيف ادائة الرمل الناعم زي الرباضات والله يعطيك خيرة ويكفيك شرة

والله يوفقك يالغالي ويسهل امورك

[برق السر]

160 تجيب لك جي اكس ار 2012 ثمانيه سلندر ماشي قليل واذا تبي جديد مامشى الفتك تراه موتر يطرب وسعره جديد حول مبلغك

والله ياخوك دورت وتعبت مالقيت النظيف خاصه ال 2012

كل مالقيت واحد ورحت وشفته ما ارتحت له من ناحية ممشي

عندي احساس ان العداد منزل في اكثر من جيب شفتة

وانا مو ذيك الخبرة في الجيوب

وإذا تخبر لي واحد 2012 من واحد تعرفه شخصيا حول هالسعر

الله يرحم والديك لاتخليني ابي فل كامل

والحمدلله علي كل حال والله تعبت وانا ادور لي حول الشهر وانا ادور

جيب ، نفسي في ال V82012 والله يجيب الخير

والله يوفقك ويسهل امورك يالغالي

[برق السر]

الجي عزمه ميت للأسف ماينفع والله لا في خط ولا في بر

بطل الدروب نشيط لكن يشفط البنزين شفط

حط من ضمن خياراتك الباترول السفاري الشكل القديم تراه طيب حيل

ولا تنسى صلاة الإستخاره

الله يوفقك يالغالي وشكرا لردك لي

بس السفاري القديم اي موديل بالضبط

ياليت تحدد الموديل من موديل - الي موديل

ويالغالي تسلم والله يوفقك ويسهل امورك

وانا النيسان والله ماقد استخدمته ابد ولا لي فيه خلفية

وانا لفيت معارض النسيم ولقيت واحد موديلة 92 لفت انتباهي نظافته وخش مزاجي و رحت

وسألته طلع مكيف واحد والسوم يقول 85 وانا ابو عائله مكيف واحد ميخارج معي

ولا الموتر نظيف وداخليتة جديدة مرة حتي من نظافته شكيت انه مسويه عند محل شغله

100/100

والكلام هذا يوم الجمعه او يوم الخميس اللي راح

وانا أحب البر وموتر عزمه ضعيف والله ما ابيه وموتر يشفط البانزين شفط برضوه ما ابيه

اقل شي يكون صرف البانزين معقول وعزمه يكون قوي شوي لان انا من الناس اللي

لاشاف النفود وفيه امطار والجو يحبة قلبك دخلت النفود وخليت الزفلت

لين ألقي المكان اللي يستاهل من يكشت فية واخذ جميع الاحتياطات من كل شي

لان النفود يبيلها موتر قوي واقل شي يكون فية دفلك وهذا اللي قاهرني في الجي وحتي

عزمه الكل يسبه وانا والله ماجربته ابد

وانا يالغالي ابو عائله ماني قاعد كل شوي

اشري موتر وهذا اللي مخليني استشيركم ياالغالي ، هي مرة وحدة ابي سيارة صح وبعدها

بأذن الله البيت لآني من سكان القصيم وأقل شي يعني السيارة تكون حقت مكده

والنقل من عملي صعب شوي يبيلة وقت وأقل شي 6 سنوات علشان اقدر انقل

واقرب لديرتي

والله يوفقك وانا اخوك و يسهل امورك ومشكور علي ردك

[برق السر]

مرحبا بكـ يابرق السر

شف وانا اخوك العلم من دون قصور بالجميع

الجيوب الستة سلندر التويوتا بشكل عام
انحش من التماتيك ,, اما الي رجلة باردة وسواقته راكدة بالحيل .. بيمشي معه اي موتر

الجي اكس اول مشراي من موديل 91

وكل ثلاث سنوات تقريبا الى اربع , اطمر للموديل الجديد
بعد ماكد الموتر من مقانيص ومكاشيت الخ ....

والان معي الجي اكس 2014

جربت الثمانية والستة منها التماتيك والعادي

(( الثمانية سلندر مايسلك ويضبط معه الا القير التماتيك ))

(( الستة سلندر مايسلك ويضبط معه الا القير العادي ))

طبعا الجي اكس الستة تغيرت مكينتة للاقوى وذلك من موديل 2012 وطالع
حتى الثمانيه صار فيها بعض التعديلات البسيطة ..

لاكن موضوعنا على الستة سلندر ونركز عليه اكثر
شف وانا اخوك ..
اذا بغيت الستة سلندر الموديلات الحديثة
خذ القير العادي , واذا انت راعي نفود ورجلك حاره وتبي الموتر فزته حلوه
اضف عليه القطعه الصغيره الي تحول الدعسه من سرعة كهرب الى سركة سلك قيمتها 1200 الى 1500
راح طبعا تفرق الموتر بشكل ملاحض

وفي الاخير .. اذا تبي تماتيك خذ 8 سلندر
واذا انت راعي بر ومطامر ترى السته ممتاز وأخف وزن من الثمانية ولفاته وفزاته اوذف من الثمانية




واذا بغيت اي خدمة .. تحت امرك

وفقك الله ..

هلا بك يالغالي وتسلم علي ردك

انا ما احب التماتيك ولا عرفته الا يوم شريت

البرادو وفعلا كنت اتضايق منه البر لاني

متعود علي العادي وانا اخوك انا سواقتي

راكدة ولاني راعي تطعيس ولا لي فيه ابد

دخولي للبر لتمشيه واستكشاف المناطق

اللي ما اعرفها وطلعاتي للبر كل خميس او

جمعه وخاصة اذا رحت للقصيم نكشت

خفيفة زي من بعد صلاه العشاء لين الساعه 2

او 3 واحيان نصلي الفجر ونرجع للبيت

خاصه اوقات الصيف والشتاء عاد الله لا

يوريك خاصة لا صار الجو حلو وفيه امطار

وعلي حسب الامطار وتوقعات الامطار

واضرب مشاوير اذا فيه توقعات حلوة

حتي لو عندي دوام عادي

والموديلات القديمه وانا اخوك غير قوية

وتتحمل ودفرنسين وقير الدبل عصا

والجديد قرأت معلومات عنه فقط

واشوف الكل يقول عزمة ضعيف وانا جربت

البارادو سته حلو بس حجمه اخف من الجي

اكس وفعلا الدعسه كهرب يمكن هذا اللي

محلي الناس تقول عزمه ضعيف

وكلامك في محلة قرأت عن المكينه انها

متغيرة من 2012 وطالع

وانا فعلا افضل القير العادي علي التماتيك

و القطعه هذي قرأت عنها كثير

هل انت ركبتها واذا ركبتها فية فرق واضح

في العزم وخاصة اذا رفعت رجلك ودعست

تحس انه يتجاوب الموتر ويعطيك عزم حلو

والله يعطيك خيرة ويكفيك شرة ويسهل

امورك والله نورتي بمعلوماتك لان علي ما قالو

اسئل مجرب

وعندي سؤال هل تركب الفرارات علي الجي

اكس ؟

يعني لو اركب القطعه اللي تغير الدعسه

وافصل الدفع الرباعي بتركيب الفرارات

راح يكون عزمه حلو وخفيف ؟

وانا ودي بال جي اكس بس اسعاره شوي

غالية الجي اكس بدون ونش وبدون دفلك

ب 177 الف والفل من الجي اكس ب 195

هل تنصحني انتظر وادور هدد جي اكس

مستخدم من 2012 وطالع فل كامل لاني

افضل ميزة الدفلك وهي مهمة جدا في الجيب

وادري طولت عليك بس

هل المكينه V8 وال V6

تفرق في البيع لاني افكر لبيعد وضارب

احتمالات كثير وفي نفيس الوقت ابي المبلغ

اللي ادفعه مايتعدي ال 160 الف ومل ما قل

مان افضل

ووفقك الله وماقصرت يالغالي وشكرا

[برق السر]

خذ لك تويوتا سيكويا مكينة جبارة و سعة ورحابة

سعرها 159400 ريال النص فل

تسلم يالغالي

و انا والله ما أحب السيارات العائلية لكبر حجمها وثقل وزنها حتي المكينه قوية

راح يكون دخولها صعب شوي لنفود خاصه اذا فية طلعات ونزلات قريبة من بعض

وانا من محب الجيوب وتسلم ياغلاهم وماقصرت وبيض الله وجهك

وشكرا

[برق السر]

انا أرشح لك نيسان الفتك موتر نشيط سواء تماتيك أو عايدي وشكله ماعليه كلام وله زباينه وقت البيع

الجي اكس لا تقرب منه مره انحش وانا اخوك

فلوسك تجيب لك 2012 GXR 3 مستخدم نظيف


وشف خل عندك قاعدة اذا انت راعي بر خذ نيسان واذا انت راعي زفلت التويوتا حلو

هلابك ياغلاهم وتسلم

وفعلا حطيته من ضمن الاختيارات وانا ماجربته ولا اعرف احد جربه

لآكن قريت كم موضوع ان فيه صرف بانزين شوي وخلاصه اذا تعدت السرعة 140

وفي الخط ماهو مريح شوي ويابعدهم ماقصرت

والنيسان والتويتا من افضل السيارات واكثرها شعبيه لدينا في دول الخليج

وكلها لها سلبيات وايجابيات وانا لم اجرب من الجيوب الا الهدد 2007 علي وقته

و البرادو 2011 فقط

بس عيب التيوتا في الهدد انهم خلو المكينه راسين لانها قلبت الموتر فوق تحت

وفوق ذا مخلين الدعسه كهرب ما ادري هم قصدهم في السته توفير البانزين

واكيد لها فوائد لاني قرأت مواضيع كثيرة

والنيسان خلو مكينه الفتك 4800 ومعروف النيسان في النفود

وكلها من افضل السيارات و اغلبها استخدام لدينا

وانا والله دورت ولي فترة وانا ابحث ونفسي في ال 2012 وفوق ويكون فل و وثمانية

ومستخدم استخدام حلو ويكون السعر من ال 160 وتحت

بس مالقيت الموتر اللي ارتحت له

واغلب اللي في المعارض شريطيه وانا مالي ذيك الخبرة بس عندي حاسه سادسه ههههههه

اغلب اللي لقيتها ما ارتحت لها ابد ابد واغلبها احس ممشي السيارة ماهو جاي علي الموتر

ومن غير لا فتحت الكبوت تشوف المكينه تنتفض نفض شوي وتطلع وهذا دليل علي ان الموتر

ماجته محافضه من قبل الشخص اللي يملكه واجي اشوف الزيت لوووونه اسود ولا غيرة

وبعضهم جايب الموتر وكفره منتهي حتي ماغيره

علشان كذا ما ارتحت ولا طحت في واحد يملك السيارة له يعني ماهو شريطي

والدعوه فيها فلوس واللي لقيتهم اغلبهم حول ال 170 الف و 2012 او حوله بشي بسيط

ما صارت وش خلو لل 2013 و 2014

ياخي من كثر ماجيت المعارض جتني نفسية هههههههه

وجزاكم الله الف خير والله يوفقكم

واشكر كل من شاركني موضوعي

وتسلموون

[---ابو يوسف-]

انا ارشح لك الفورد f150 الونيت ممتاز وفخم وقوي واذ ماتبي ونيت
خذ الجي اكس 6 سرندل تلقاه فل كامل 180 او اقل عند اليحي والعمر بمعارض النسيم
وتر السته اللحين نفس قوة الثامنيه تحت 2011 او عندك الفتك فل كامل اهم شي انت
دافع فلوس واجد خذ شي به فخامه شوي عشان ماتندم وخذ جديد احسن لك ترتاح نفسيا
وعموما ترا اسعار السيارة في نزول مع انخفاظ اسعار البترول ويبين لك بعد كم شهر

[قناص الوعول]

اشتر G واذا ما اعجبك بعه واشتر بترول ولا تخلي شي نفسك فيه

[برق السر]

انا ارشح لك الفورد f150 الونيت ممتاز وفخم وقوي واذ ماتبي ونيت
خذ الجي اكس 6 سرندل تلقاه فل كامل 180 او اقل عند اليحي والعمر بمعارض النسيم
وتر السته اللحين نفس قوة الثامنيه تحت 2011 او عندك الفتك فل كامل اهم شي انت
دافع فلوس واجد خذ شي به فخامه شوي عشان ماتندم وخذ جديد احسن لك ترتاح نفسيا
وعموما ترا اسعار السيارة في نزول مع انخفاظ اسعار البترول ويبين لك بعد كم شهر

هلابك اخوي ابو يوسف
الفورد f150 ما علية كلام بس النفس في جيب
صراحه محتار لاكن لقيت حل ابي استأجر واجرب والله يكتب اللي
فيه خير
وشكرا

[برق السر]

اشتر G واذا ما اعجبك بعه واشتر بترول ولا تخلي شي نفسك فيه

هلابك قناص
الله يوفقك لو بشري وابيع ما استفدت شي
لأكن لقيت حل اروح استأجر واجرب والله يكتب اللي فيه
خير
وشكرا

[اسبيدر مان]

من كلامك فهمت انك من عشاق التايوتا
على شان كذا لاتاخذ الا الى نفسك فيه لو تأخرت شوي

الله يكتب لك الى فيه الخير

[حسين السبيعي]

كانك راعي عائله خذ سيكويا

[التعـ King ـديل]

من واقع تجربه للجكس الهدد 2013 قير عادي & بطل الدروب بنوعيه القير العادي والتماتيك

لا يوجد مقارنه في الافضليه والكفه لصالح بطل الدروب

[قناص مزاجي]

السلام عليكم ورحمة الله وبركاته

التايوتو لاند كروزر افضل من غير مقارنه وقطع غيار متوفره بعكس النيسان اليوم تم تقديم شكوى على وكيل نيسان بسبب قطع الغيار وتقول الوكاله فيه قطع ل 2011 غير متوفره
ووقت اللبيع مافيه مقارنه مع النيسان التايوتا ابيع ويمسك السعر هذا من واقع تجربه قبل ان اتوهق واملك نيسان كلا يمد لحافه على قد رجليه :D

نصيحة اخ لا تتعدى الاند كروزر

[بدوي نمبر ون]

مدري احترت
الخيره خفيه

[XRAY MAN]

أهم شيء لا تقرب النيسان الشكل الجديد تراه ماينفع للبر أبد

خذ السفاري الشكل القديم نزل منه 2015

ال G ما أنصح فيه أبد عن تجربه ماهنا مكينه أبد

[الفهيد بدر]

خذ بطل الدروب شيخ المواتر ومابعده جيب واللي يقول مايصلح للبر والله اني شايفه بنفود متعلق برباضه اول ماشغل الثقيل طلع بعدين طلعت كفراته 45

[وسيع البال]

بطل الدروب
وسيع
مكينة قوية
في النفود ممتاز
شكل
البنزين يمشيك (حول 700 كيلو) الجديد تغيرت صرفيته ممتاااااازه
انا مجرب بنفسي

[عاشق الهدد051]

و عليكم السلام و رحمة الله و بركاته
شف لو اني مكانك باخذ اللاندكروزر و اهم شيء
انه يكون مكيفين و لو حصل ثلاجة عز الطلب و
ما دامك راعي بر خذ اسبير علاق و هذي هي اهم
المواصفات و لو حصل لك فرصة تروح قطر و لا البحرين
اكيد تبي تلقى اللي تبي و ارخص من عندنا و المواصفات
ازين خاصة للجي و الجي اكس و لا تصير عجل ابد
اصبر لك شهر شهرين و حاول ترفع ميزانيتك شوي
و تاخذ موتر عليه الكلام خاصة انك رجال تبي تستعمل
و الله يكتب لك اللي فيه الخير

[قناص الوعول]

ما ضلم النيسان الا وكلائه من جرف الى دحديره في توفير قطع الغيار واسعار قطع الغيار ولو قارنة اسعار القطع الي هينا مع الامارات راح تحص فرق كبير والناس تشوف وتسمع وهاذا الي اثر على البيع بعد استعمال السيارة

[قناص مزاجي]

خذ موتر للعائله جديد

ودور لك بترول من 88-1997 للبر

لاتشتري موتر جديد وتطامر فيه وتكسره

http://img.montada.haraj.com.sa.s3-website-eu-west-1.amazonaws.com/imgdir-s3/53823300b1de7.jpg

[قناص مزاجي]

ما ضلم النيسان الا وكلائه من جرف الى دحديره في توفير قطع الغيار واسعار قطع الغيار ولو قارنة اسعار القطع الي هينا مع الامارات راح تحص فرق كبير والناس تشوف وتسمع وهاذا الي اثر على البيع بعد استعمال السيارة

اسئل ابن ماضي لقطع غيار نيسان عن بطل الدروب :D صفاية بانزين ب 1800 ريال

الفتك الشاص الرفارف الفيبر لون اسود ب 5000 ريال

قطع غيارغير متوفره بالوكالتين الحمراني والعيسى تجلس شهر انتظار

[برق السر]

الله يرحم والدينكم ويوفقكم واشكر كل من رد علي موضوعي وآسف علي التأخير ومعليش علي عدم الرد عليكم

والله اني من الدوام للبيت للمعارض وخلوها علي الله

والنيسان ماعليه كلام ويكفي فخامته موتر بس وكليه هو المشكله وفعلا قطع غياره غالي شوي وحصلت واحد منكسره

قزازته اللي قدام يقول ماهي موجوده في الوكاله وراح تجي خلال ايام معه بطل الدروب والله اضلمه وكيله

وبالعكيس يالغالي ماني متحيز لتيوتا ولا نيسان بالعكس كلهم معجبيني وكلهم مواتر


والتيوتا يميزه انه مرغوب اكثر لانه يمسك سعره وقطع الغيار متوفره

وانا ما راح استعجل ابد

اللي ابيه جيب وبس سيارات كبيره ما ابيها زي السكويا واليوكن و الاكسبيديشن

الجيب افضل بكثير واخف منها وفي البر سلس ويتحمل اكثر

واعتذر عن عدم الرد عليكم وجزاكم الله خير

لاني كل يوم أطب المعارض واشوف التويوتا اكثرها من الامارات وكلها مستخدمه ماشيه 30 او 50 او 60 الف

بالكثير

هل سعرها مستخدم اقل من اللي عندنا

وتسلموون علي ردودكم وجزاكم الله خير

وشكرا

[راعي الجيوب 1]

قبل كل شي عليك بصلاه الاستخاره وإنشاء الله بتوفيق الله تجد مطلبك والله يوفقك بحسن الاختيار
اخي الغالي بعيد عن التعصب عن شركه تويوتا وشركه نيسان !! جربت الشركتين ووجدت مطلبي وراحه للبترول
اكثر قوه في الرمل والخط ثبات مشاء الله تبارك الله ! جربت الفتك بانواعه وجربت بطل الدروب قير تماتيك وعادي
لقيت ألقوه والمتانه والخفيه في بطل الدروب لا يقارن في اي سياره لإمانه من موديل 2010 وحتي موديل 2014لم
اشتكي من اي شي والله الحمد !! الخيار الثاني فتك جديد والله يوفقك باختيارك
تحياتي

[تميم2222]

اسئل ابن ماضي لقطع غيار نيسان عن بطل الدروب :D صفاية بانزين ب 1800 ريال

الفتك الشاص الرفارف الفيبر لون اسود ب 5000 ريال

قطع غيارغير متوفره بالوكالتين الحمراني والعيسى تجلس شهر انتظار


من قال صفايه البطل 1800؟؟؟؟؟؟ انت واضح انك من جنبها انا شاريها طرمبه كامله مع الصفايه 650 ريال من شبيب اعطي الناس العلم الوكاد وخلك صادق ولا تقدح من راسك الله يحييك

[ابوسعود البري]

احب اضيف بالنسبة لكلامك اللي ذكرت ان عن النيسان ستاندر (بطل الدروب) 8 سلندر بـ 160 الف .. كان عليه عرض مغري جدا بـ 154 الف 2014 .. وعقدت النيه على الشراء لكن عندما شاهدته في المستودع حصلته مثل شكل 2013 سواء الوجه او الخلفية مع العلم ان الفئات الاخرى جميعها تغيرت. كذلك من الداخل كان خامة قماش المراتب رديئة جدا واللون الداخلي للديكونرات والطبلون اسود .. فلم يعجبني وصرفت النظر

[مكسر الشداد]

تحيه طيبه كانك لسا ماشريت ،،، اشوف ان الصبر زين لما تصير دراهمك تجيب بطل الدروب الاستندر se داخل بيج وستمتع بسياره تعتبر نقله في عالم السيارات مهب هالتايوتا الي شكله اكل عليه الدهر وسنتين بالكثير ويتغير ،الباترل سعه ومحرك وفخامه داخليه وهيبه
ونكان حدك على الخيارات الي ذكرت كلهن كل واحد اسؤ من الثاني ،،،، والفتك اشوف انه سياره جباره بس ترى شكله خلاص اصبح من الماضي له الان 10 سنوات نفس الشكل يعني مافيه جديد،، مجرد راي ونصيحه

[مكسر الشداد]

تحيه طيبه كانك لسا ماشريت ،،، اشوف ان الصبر زين لما تصير دراهمك تجيب بطل الدروب الاستندر se داخل بيج وستمتع بسياره تعتبر نقله في عالم السيارات مهب هالتايوتا الي شكله اكل عليه الدهر وسنتين بالكثير ويتغير ،الباترل سعه ومحرك وفخامه داخليه وهيبه
ونكان حدك على الخيارات الي ذكرت كلهن كل واحد اسؤ من الثاني ،،،، والفتك اشوف انه سياره جباره بس ترى شكله خلاص اصبح من الماضي له الان 10 سنوات نفس الشكل يعني مافيه جديد،، مجرد راي ونصيحه