القعود للحين مايطاوع ياهل الخبره

[ابوفريحح]

السلام عليكم

عندي قعود جذع السنه الجايه يضرب
المهم ربطناه رباط مع قيد وله شهر بس مايخلي احد يقرب له عودناه ياكل على اليد بس مافي فايده ماطاح اللي براسه , هل فيه طريقه لتنويخه نبيه مثل ابوه لاجاه الطفل نزل راسه لو ينام الواحد تحته مايقوله شي , ماعليش عن الاطاله :D

[ابو محمد 2006]

ياهلا ومرحبا
الله يبارك لك فيه
خله برباطه ﻻتفكه ابد
واصبر يجي الصيف ويطيح اللي في راسه
اﻻن مع البرد تكثر حركته

[ذيب قديد]

ودك تقارد الحاشي من يصير له شهرين عشان يوالفك والصيف زي ما تفضل الاخوان بطيح اللي في راسه

تحياتي

[a202b]

عليك بالقيد والهجار ترى القيد والهجار بيهينه لك
وحاول تقارد له ووقت ما تبيه يشرب فك له رباطه يطلع يشرب ورجعه وربطه يعني خله يتعود على فكة الرباط

وزي ما قلت لك الهجار بيهينه لك ويطيح الى في راسه

عندي قعود والله والله ما كنت اهقى انه بيهدى وهجرناه وقيدته وبدينا معه نقارد له واذا جاء وقت الشراب نفكه اثنين واحد يفك الرباط والثاني ينتبه لايعود علينا شوي شوي تطبع على الفكه والطلعه للشرب ولا عاد خاف منا
وبفضل الله هديناه هالسنه ويفكه ويربطه الورع الصغير وصار ينصانا يبغى المقارد وراسه في الارض

وطبقناها الحين على قعود جذع مجهم ما قد ربط في حياته ولاقيد كان وسط حوش في مزرعه ويهابد اذا حد جاه

والحين ابشرك قيدناه وهجرنا وربطانه وينفك بهدواه يشرب ويرجع لمربطه ويخلين نربطه

اهم شي القعود لا تضربه

[اليامي قطر]

الحل طال عمرك

سو له خيه تعرف الخيه ؟؟

الخيه هي تاخذ كيس الشوار او الشعير كيس فاضي وتملاه تراب وتربط الكيس

وتركب في راس البعير خطام وتطول حبل الخطام وتربط الخطام في كيس التراب وتوطي راس البعير

الين يصك في الكيس وثم تعلمه على البروك والوقاف مع النطق

وخل ذا دوبك كمن يوم وراسه موطى وبأذن الله يطاوع ويتعوذ من الشيطان


اهم شي الخطام لايكون رخو وضعيف ركب خطام قوي ومشدود على راسه

عندي بكره سنها (حقه) وهي اللي علمتني الامور ذي كلها :)

[معزب النشاما3]

السلام عليكم ورحمة الله كلام اخوي يامي قطر صحيح بس لازم يكون المكان اللي تربطه فيه قوي عشان مايفك نفسه ويتعود بعدين واذا ماطاع استعمل نظام التجويع لين يركد وحاول تشد الخطام زين وانتبه تستعمل الضرب

[اليامي قطر]

السلام عليكم ورحمة الله كلام اخوي يامي قطر صحيح بس لازم يكون المكان اللي تربطه فيه قوي عشان مايفك نفسه ويتعود بعدين واذا ماطاع استعمل نظام التجويع لين يركد وحاول تشد الخطام زين وانتبه تستعمل الضرب


كلامك صحيح يامعزب النشاما

وذكرتني في التجويع انا بعد استخدمه وهو اللي لين راس المطيه

[almushraq]

اخذ لك خيشة ولفها وخل طولها شبر او اطول شوي واربط فيها حبل قووي من الوسط ..واحفر لها في الارض وطول الحفر

وادفنها وجود دفنها ..بحيث تكون الخيشه في الاسفل والي طالع من الحبل اقل من طول الذراع وفي راس الحبل حلقة في حلقة من حديد تسمى ( مجوول )

واربط الخطام في المجول واقصر الخطام الين يدنق براس القعود .... (الخطام لازم يكون فيه عذار ..حبل يجي في الخطام من اليمين واليسار ويجي من خلف راس القعود حتى لايطيح الخطان على خشم القعود ويكسرة )

وجوع القعود .. يعني عطه علف خفيف وجبتين في اليوم صبح وعصر وخل العلف بعيد بحيث انك تفك خطامه وانت الي توديه للعلف ماسك الخطام والشرب كذلك

وكل مارميت عليه امسك الخطام ونوخه واضرب على نسومه حتى يبرك

ولا تربط فيه هجار حتى يقدر يبرك ..ولا تطول قيده ولا تقصرة بالحيل ...

[ابوفريحح]

اخذ لك خيشة ولفها وخل طولها شبر او اطول شوي واربط فيها حبل قووي من الوسط ..واحفر لها في الارض وطول الحفر

وادفنها وجود دفنها ..بحيث تكون الخيشه في الاسفل والي طالع من الحبل اقل من طول الذراع وفي راس الحبل حلقة في حلقة من حديد تسمى ( مجوول )

واربط الخطام في المجول واقصر الخطام الين يدنق براس القعود .... (الخطام لازم يكون فيه عذار ..حبل يجي في الخطام من اليمين واليسار ويجي من خلف راس القعود حتى لايطيح الخطان على خشم القعود ويكسرة )

وجوع القعود .. يعني عطه علف خفيف وجبتين في اليوم صبح وعصر وخل العلف بعيد بحيث انك تفك خطامه وانت الي توديه للعلف ماسك الخطام والشرب كذلك

وكل مارميت عليه امسك الخطام ونوخه واضرب على نسومه حتى يبرك

ولا تربط فيه هجار حتى يقدر يبرك ..ولا تطول قيده ولا تقصرة بالحيل ...



كلامكم صحيح بس هاذا جمل مهي سالفة خطام انوخه على كلام الشيبان الجمل لاجاء راسه حبل خرب طبعه

[ابو ايمن]

حسب مافهمت ان الاخ يبيه فحل ماهو مطية

لذلك موضوع الربط بالكيس والخطام والتجويع هذا للمطية

لكن الفحل غير مع الهداوة والتعويد مثل ماذكر الاخ a202b

لان كلامه يخص تطويع الفحل على الرباط والقيد

واضافتي لاتقلل من آراء الإخوان

تقبل تحياتي

[almushraq]

انا الي فهمت خطاء
اربط القعود في يدة مع القيد وكل ماريت عليه قارد له شوي شوي لو من بعيد بالعصا وبزين طبعه وبيهدا

[أبو علوى]

أستعمل معه حاجتين و اقصرهم

هجار

قيد



أقصرهم قصر و قارده و اكرمه لين تشوف انه هدا ثم وسع له الحبال و اربطه أحيان و لا تطلقه إلا بهجار و قيد و بيتعود و يهدى مع الوقت و يصير أطيب من أبوه

اليامي قطر كلامك صحيح لكن مثل ما قال أبو فريحح و طريقتك تنفع لهجن و ركايب و الا خلفة صلفة و عجور

[الودعاني 2009]

يالغالي ابو فريح القعود المفروض وهو مفرود تعوده على القياد تربطه يوم او يومين وتفكه مثلها .. وهو حق ولقي تعوده على ربط الخيه في يده علشان يتوثن بس لاتنسى المدور ولازم يتعود على المشي مع صاحبه تقوده وتسوقه وترده لمراحه وتأكله بيدك من يومه صغير ولازم يشوف الابل بس تعزله منها علشان لاجاء جذع فحل الين طبعه زين ...
على العموم عليك بالقياد والخية ولو تحط له توبيات ( شبك حديد ) افضل وناده دايم باسمه وحك له بس اذا هايج يمكن يتعبك اصبر عليه الين يجي الصيف ..