والحقد في قلوب الحسودين مصبوب***اشد من سم الحنش واﻻفاعي

[راعي مرات]

آمل أن تحوز على رضاكم
..................

ترى المراجل سلم واخلاق واسلوب***تحتاج شخص في المواجيب واعي
يصبر على زود البلا صبر ايوب *** ويسطي على الكايد جزوم شجاعي
والحزم في بعض المهمات مطلوب *** والعزم والهمه تشد الذراعي
خلك كريم تصير للكل محبوب *** وتطرف به عيون لعيبك تراعي
وافزع لمن مسه من الدهر منيوب *** اقض اللزوم وسركم ﻻ يشاعي
والوعد اوفه ﻻيجي وعد عرقوب***وجنب عن دروب الحيل والخداعي
وان طاب حظك زان لك كل مشروب ***واليا تردى راح جهدك وضاعي
والزهد في الدنيا جميل ومرغوب***ياسعد من يرحل خفيف المتاعي
والجار قبل النفس له حق ماجوب***الدين وصانا لحقه نراعي
واطلب ولي العرش ﻻصرت مكروب ***ترى الفرج يأتيك عجل سراعي
واحذر تصير بعرض اﻻجواد شاذوب***عرضك تبي تنهشه غلث السباعي
وكثر الجدل لا شك عيب وعذروب *** خلك حكيم ولاتكون اندفاعي
والحقد في قلوب الحسودين مصبوب***اشد من سم الحنش واﻻفاعي
ومنته على طرد المقفين مغصوب *** الله خلق كون فجوجه وساعي
ناس على فرقاهم الدمع مسكوب***وناس خساره لو سلام الوداعي
والعمر معدود و في اللوح مكتوب***والموت ماياقاه درع وقناعي
أمر الله الغالب ولاهوب مغلوب *** سبحان رب للخلايق يراعي
يارب تغفر زلتي واقدر اتوب***من قبل ينعاني من الموت ناعي
وصلاة ربي عد مامال نبنوب *** على النبي واعداد نبت المراعي
راعي مرات
عبدالرحمن المجلي
2/2/1436هـ

[قوافي ( أم نهار )]

السلام عليكم ورحمة الله وبركاته
حياك الله اخي الفاضل
صح لسانك قصيده طيبه تتسم بالحكمه وطيب الكلمه..
اشكرك حفظك الله
تحياتي وتقديري واحترامي

[طلال مكشاتي]

صح لسانك ي راعي مرات،،

[عطيه الدوسي]

اللهم صل وسلم على سيدنا محمد
صح لسانك
والزهد في الدنيا جميل ومرغوب***ياسعد من يرحل خفيف المتاعي
هذا البيت تاج القصيدة مع أن القصيدة كلها جميلة
بارك الله فيك
تقبل تحياتي واحترامي

[راعي مرات]

اخواني تقديري واحترامي لكم جميعا
ولكل من مر من هنا

تقدير واحترامي

[راعي مرات]

عفوا الشطر الأول من البيت الأخير خطأ كتابي

الصحيح

يارب تغفر زلتي واقدر اتوب***من قبل ينعاني من الموت ناعي
وصلاة ربي عد مامال نبنوب *** على النبي واعداد نبت المراعي

[الجوال0]

أبداع ياراعي مرات صح الله لسانك

[راعي مرات]

الجوال
شكرا لمرورك
بورك فيك

[سحاب نجد راعي شقراء]

ماشاء الله تبارك الله
وش نقول وش نخلي ياعبدالرحمن المجلي
ياحبني لكم يالمجلي وربي يشهد

وقصيدتك كلها حكم يالغالي بالنصايح الي فيها

اطال الله عمرك وااسعدقلبك وفرج همك

[راعي مرات]

ماشاء الله تبارك الله
وش نقول وش نخلي ياعبدالرحمن المجلي
ياحبني لكم يالمجلي وربي يشهد

وقصيدتك كلها حكم يالغالي بالنصايح الي فيها

اطال الله عمرك وااسعدقلبك وفرج همك


الله يسعدك سحاب نجد اخي الغالي
ويبارك فيك
وأحبك الله
ونعتز ونفتخر بحبك وهذا نابع من حسن ذاتك وطيب اصلك

عاجز عن الشكر والتقدير طال عمرك على طاعته

[قوافي ( أم نهار )]

عفوا الشطر الأول من البيت الأخير خطأ كتابي

الصحيح

يارب تغفر زلتي واقدر اتوب***من قبل ينعاني من الموت ناعي
وصلاة ربي عد مامال نبنوب *** على النبي واعداد نبت المراعي

حياك الله اخي الفاضل

تم تصحيح الخطأ وتنسيق الابيات

[راعي مرات]

شكرا اخت قوافي بورك فيك