يوكن 2007 انمبير الزيت يلعب يمين يسار وش السواة يالربع لاتبخلوا علينا بالمشوره

[alatwe009]

السلام عليكم
يااخواني يالاعزاء
امبير الزيت على فجأه توقف ولمبة المكينه ولعت تقريبا قبل اسبوع
واليوم المؤشر يروح يمين يسار ومرات تطلع اشاره ان زيت المكينه انخفض
وش السواة بارك الله فيكم
اللي عنده خبره او مرت عليه حاله زي كذا لايبخل علينا وينورنا عسى الله ينور دربه
مع العلم ياااخوان اني مغير طرمبة الزيت قبل 8 شهور
ومغير الزيت تو قبل فتره قريبه من بترومين مع فلتر
وفحصته على كمبيوتر وقال لي ان المشكله من حساس الزيت
وش رايكم يا جماعه
شوروا علي
والموضوع مفتوح للنقاش
ودمتم بود

[الحلم الحلم]

ابدأ بالاقل تكلفة..
فحص كمبيوتر اذا تحددت المشكلة صلح العطل..
اذا ماتحددت ابدا بالاقل تكلفة..
زيت وسيفون من الوكالة
ساعة الزيت
طرمبة الزيت
وقبل الصيانة افحص كل قطة تريد تغيرها

محبكم/الحلم الحلم

[1824]

اخي مشكلتك بسيطة اذا في صوت طقطقة في المكينة مشكلتك ميكانكية سواء طرمبة او جلدة شخال او تنظيف شخال وغيره اذا مافي صوت مشكلتك كهربائية وهي حساس ضغط الزيت اما فيه التماس او انه عطلان ويحتاج تغير

واخر شيء نوع الزيت الي تستعمله غلط يجب عليك استعمال زيت بمواصفات دكسوس Dexsos وغير متوفر الا نوعين بترومين A1 5w30 او اسي ديلكو 5w30 وافضل البترومين كونه تخليقي بالكامل وحاصل على مواصفات عالية جدا خواص الزيت من حماية للمحرك عالية وتنظيف بالتوفيق لك

[alatwe009]

الله يعافيك ويجزاك الجنه
لا يوجد صوت طقطقه
وش المقصود بالشخال هل تقصد السيفون
وهل فلتر الهوا له علاقه بالموضوع

وحساس الزيت وين موقعه من المكينه

الله يعينك علي
كثرت عليك الاسأله
تحملني شويه

[alatwe009]

يالحلم بارك الله فيك
فحصه لي واحد
ركب قطعه فوق دعسة الفرامل وشغل برنامج على جواله وقال المشكله في حساس الزيت
الصراحه ما اقتنعت بطريقت فحصه على الجوال
مدري طريقته صح والاخطأ

انا افكر اغير الحساس على يدي بس ما اعرف وين موقعه بالضبط

وجزاكم الله خير

[cadillac911]

السلام عليكم اذا قطعة مثل ذي
فهو صادق وهذي عندي استخدمها على سيارتي مثل فحص الكمبيوتر http://tapatalk.imageshack.com/v2/14/12/01/a84b8a3358b0c7bf9c5535fdc4c3d74c.jpg

وفعلا تعطيك رقم الكود وتقدر تمسح الكود


اذكر الله تكسب حسنة

[alatwe009]

وعليكم السلام


نعم مثل اللي بالصوره

جزاك الله خير

طيب على كذا نغير حساس الزيت

السؤال
اقدر اغير القطعه على يدي
والا لازم فني

[1824]

الله يعافيك ويجزاك الجنه
لا يوجد صوت طقطقه
وش المقصود بالشخال هل تقصد السيفون
وهل فلتر الهوا له علاقه بالموضوع

وحساس الزيت وين موقعه من المكينه

الله يعينك علي
كثرت عليك الاسأله
تحملني شويه

دام مافي صوت طقطقة غير حساس ضغط الزيت وتنحل بحول الله بس تاكد اول من اسلاكه شيء يمكنه موعطلان وبعدها غير زيتك الى بترومين A1 اشتره بالكرتون من محلات جملة الزيوت من الغرابي او غيره ب 260 ريال العلبة تطلع ب 22 ريال تقريبا يمشيك 10 الاف كيلو بالراحة ولا تنسى السيفون دائما من الوكالة ب 12 ريال وادفع 10 ريال للبنشري يغير لك الزيت بالتوفيق لك

[عاشق البنية]

والله انا مشكلتي جمسي كل ماوديته محل قالو مانشتغله يحسسك انهم مولود في شركة مورسدس ولا بورشه محد يعرفله رغم ان موديله ٨٥ مكينة ٤٥٤ رفرف بهبهاني ولا فيه تشليح في ابها للجموس القديمه اذا فيه احد من ابها ويعرف تشاليح الجموس القديمه يعلمني جزاكم الله

[craino]

هل ممكن تعطيني رقم الكود
لأنه فيه حساسين للزيت في السياره , واحد لمستوى الزيت وواحد لضغط الزيت
السياره هل هي دبل او بدون وكم سعة المكينه يعني كم لتر
راح اجيب لك الطريقه بالصور ان شاء الله

[1824]

نسيت قبل ذا كله شيكت على الزيت نافص ولا لا

[alatwe009]

الله يجزاكم الجنه الجميع
بالنسبه للكود ما اعرف
لكن الموتر دبل وslt مستورد من امريكا وليس بدينالي

ام الزيت تمام ولا ينقص

غيرته قبل فتره من بترومين حتى دعايتهم سلمنا المفتاح وارتاح
اللي يمشى 5 الاف كيلوا
مدري هل هو A1 المعني والا لا
وفلتر الزيت من عندهم

وصلى الله وسلم على محمد

[alatwe009]

للرفع رفع الله قدركم

موقع الحساس بالمكينه وينه بالضبط لا هنتم

[م س س]

وعليكم السلام
في الصفحة رقم 12 تجد احد المشاركين كاتب عنوان ( حساس طرمبة زيت التاهو وين مكانه وكم سعره) فيه رد المهندس اصيل بالصور اذا فيه فرق بين اليوكن والتاهو بيكون فرق بسيط وبتحدد مكانه إن شاء الله

[م س س]

وعليكم السلام
في الصفحة رقم 12 يوجد احد الإخوان كاتب عنوان ( حساس طرمبة زيت التاهو وين مكانه وكم سعره ) فيه رد المهندس اصيل بالصور اذا فيه فرق بين اليوكن والتاهو بيكون فرق بسيط وبتحدد مكانه إن شاء الله

[craino]

ابشر بالسعد
هذا ملف مضغوط رفعته لك , فيه موقع الحساس وطريقة فكه لمكينة سيارتك
فيه ملفين ادوبي
واحد اسمه oillevel هذا حساس مستوى الزيت , فكه سهل لأنه في كارتير الزيت, اعتقد ان مشكلتك فيه.
وفيه ثاني oilpressure هذا حساس ضغط الزيت , فكه صعب لأنه تحت ثلاجة المكينه
وحياك
http://www.gulfup.com/?LQ25CY

[تنومه1]

http://m.youtube.com/watch?v=SmAkU80ShXg

[alatwe009]

بيض الله وجيهكم وحرمها الله على النار

بنغيير الحساس
ونعطيكم النتيجه

[alatwe009]

ابشركم زبط الموتر بسم الله ما شاء الله

غيرنا حساس الزيت قيمته 205 ريال شغل يد100 ريال كلها على بعض300
الشغله ما اخذت عشر دقائق مع الفني مفتاح وحبه وسقط على الحساس ورا الثلاجه وفكه وركب الجديد وسلامتكم
والموتر زي الحلاوه يارب لك الحمد لله

وشرينا زيت اسيدلكو 5-30 ابو عشر الاف كيلوا الحبه 23 مع سيفون ب18 ريال

اشكركم من اعماق قلبي كل عضو باسمه
على التوجيهات والنصائح
وجمل الله حالكم