كن الوناسه بالخلا مستفرده حالي

[صويب البرق]

السلام عليكم ورحمة الله وبركاته
على شوفة الربيع يتهيض البال ويزين تركيب الابيات
واعذروني على سيولة القاف والكسور





كـنْ الـونـاسـه بالـخـلا مـستفرده حـالي
أشـبْ الـحطب واضـبط البرّاد من جمره

مبتعد عـن شوف البشر لاهمٍ ولااشغالي
عـزوتي الـجيب والبلجيك وعيشتي تـمره

يازين صوت القنبره والحجل مرتع قبالي
ونـجـيخ الوبر بالصفا والشّبط في وكـره

وربيع كـاسيها مـن الـشهر ديـم متوالي
وكـربـل الحمّـيض بالبـطـنان لــه حُـمـره

والقـطْـب فــارش والـقُـبه مـوج تـخـتالي
والـدّعـاع والـقـرّمـل وبـسـباس لـه عطْره

فـي ديــرةٍ مـاهي وخـيـمه نبـتها حـالي
فـيها الـبـشام وبـيلسـانـه عــجْ بالـزفـره

لــو أقـعد بـها للـصيف مـاينزعج بـالي
أخير مـن شوف نـاسٍ بـوجيـهها غـبْره

مجلاسها يجيب النكد والضيق طوّالي
هرج القفى وضحكة سنْ وقلوبها تكره

دنيا دنيّه تجيب الرخيص وتبعد الغالي
اللي غـلاه أتـعب القلب والقلب مايشره

أقــدار صـابت والــرجاء مـاسك آمـالي
سـكّر كسىَ سـكّر كسير انـتظر جـبره

لــو الــدواء بالمال لـه مـالي وهـو مـالي
لـكن عـلى الله عـجزْت ألـقى لــها دبـره

ثـلاث سـنين أحـتري شــوفتك ياهـلالي
يــأس ورجـاء والعـين عـمـيا مـن العبره

كــنْ الصـدر بلجــيك لــوْحيت غــربالي
يثــور الثمـيدي للعـزاء ويـلْـج بالحـسره

هذي الخوافي يـوم زاحت عـن ضلالي
زاحـت مـثل قـلـب الـولـيعي على قـبـره

وأكيد الوناسه بالـخلا مستفرده حالي
أشبْ الحطب وأضبط البرّاد من جمره








علي الذبياني