المساعد الشخصي الرقمي

مشاهدة النسخة كاملة : ناوي لي على فروه


عصيقيل
16/12/2006, 07:09 PM
شباب نظرا للأجواء البارده والأيام القادمه يقولون أنه اشد بروده
ونظرا لما أملكه من جسم رشيق ابيكم ترشدوني على افضل فروه اشتريها تكون دافيه وسعرها مناسب
مواصفات جسمي عشان تضبطون لي المواصفات حقت الفروه
الطول 182سم
الوزن 58كجم
الون البشره حنطي مدري هو لازم اقول لون البشره او لا بس عن قولت ماقلت
مقاس الحذاء اللي البسه اعزكم الله 44
تكفون لا تبطون علي لأني باكر انشاء الله رايح للسوق اشتري


أخوكم ومحبكم عصيقيل :j :D :j
ابو هبايب
16/12/2006, 07:24 PM
الجسم رشيق +مواصفات الجسم+الطول والوزن+مقاس الحذاء.......والله مادري وش نرد وش نقول لكن الله يعين بس
خالد20
16/12/2006, 07:57 PM
عصيقيل ؟!!!!!
اللة يرجك يا شيخ هذا جسم؟ولا عامود خيمه؟
اقولك عندي لك جراب حق بندق مقمع((طويله المقمع )) مبطن اتوقع انه يصلح :confused:

يا خوي طالبك لا تشره :D
بس شف مصنع الريم عنده فرا
حلوه والسعر معقول
بس انتبه لا تكون فروته (( تهل خيوط )) تملا ثوبك من الخيوط اذا فصخته:no2:
اخونوره
16/12/2006, 10:55 PM
الله يرجك تبي تعرس ولا تبي فروه ؟

المهم كانك في الرياض اطمر لسوق الزل عندهم انواع واشكال الفروات
وفيه نوع اعجبني قماشه كنه قماش بشت وخفيفه ودافيه
نمر بن حثلين
17/12/2006, 05:50 AM
انا اقول ماله داعي الخساير
ما دامك طويل ووزنك بس 58 انصحك بقروش الفروة تشتري قطمة رز ابو كاس وتغذي روحك اصرف :p

الفروه شغل مصنع ريم ممتاز ولا يهل الا اول ما تشتريه بعدين تظبط
وتجي من برا تقل بشت وفيه انواع بدون زري تكون احلى
والسعر بحدود 120
ابوشجاع
18/12/2006, 01:51 PM
عليك بجراب بندق خالد بس لوووووووووووووووووووووووووووووووووول
:):):)
اطرف من كذا مافيش
السنع كله
18/12/2006, 04:55 PM
الاخ يلبس عقال ؟شماغ ام غتره؟ضروري حفظك الله حتى اصف لك فروة تناسبك تماما حماك الله من الزمهرير ومن السيل الهدير ومن اليوم القمطرير
ابورنودي
18/12/2006, 05:05 PM
مساء الخير أخوي عصيقيل فيه مكان يسوي فروات بالتفصيل وعندة جاهز وجميع أمور الملابس الشتوية وهو سوري ويجيب شي نظيف وغالي موجود موقعة في المربع الي يبيع فيه وهو يوزع على حقين الزل وغيرهم المهم مالك بطويله وصفة شوي حوسة أذا بغيت وصفة هذا رقم جوالي (0505464771) ابورنياد .
الكشاتي
18/12/2006, 07:28 PM
نرجع ونقول لك....

عليك بجراب بندق ...خالد

تحياتي يالعصيقيل.....
عصيقيل
18/12/2006, 11:23 PM
أشكر جميع الأخوه كلا بأسمه اليوم طمرت سوق الزل وسئلت عن فروه ريم ماحصلتها إلى في محل واحد وسعرها 250 عند شايب ويحلف انه كان يبيعها 300 وشريتها بسعر 250
اليوم أول مالبستها طبعتني هل صوفها صار ثوبي الأسود مرنقش سبتها
واجهتني مشكله جديد ثقيله علي إذا لبستها انحنى ظهري من ثقلها بس الشاهد الله انها دافيه وممتازه
ألف ألف شكر للجميع
الخادم
20/12/2006, 02:23 AM
ياليتك خويي بالرحلات علشان اوفر العيشة و اكلها بدالك بسبب انه يروح معي الان سمين كنة قطمة رز متحركة و اذا جا وقت العيشة ما يخلي لي لحم يقول هي الي تسمني ( ضمير مستتر تقديرة ابو خالد )


انت تكتب باليد اليمين او اليسار ( اشول ) علشان تفصيل الفروة
تراها تخلص بعد نهاية الشتاء بيوم واحد
و قيمتها ب 500 ريال
و الفع مقدماَ دبل
تكفون
20/12/2006, 10:15 AM
أهم شي خشمك :) .....طويل ولا قصير ....أفنس ولا أفطس :):):) ..


لازم علشان البارح شفت واحد مفصل فروه له سحاااااااااااااااااااااب ..

يارب استر ...العالم بدت تلعب خخخخخخ
كروكي
22/12/2006, 10:03 AM
الف مبروك
ملبوس العافية
وش علومها مع ها البرد ياكافي
لا تنسى لزقة ابوطير للظهر .
بن فيصل
22/12/2006, 08:30 PM
عصيقل الله يرجك رجه مابعدها رجه..... والله لموتني بالضحك
وبعض التعليقات بعد رهيبه مثل راعي عامود الخيمه
الله يوسع صدوركم بالعافيه
Mohammad
24/12/2006, 11:15 AM
عندى فروه غاليه لها ريحه عملت المستحيل ولم تذهب الريحه؟

الريحه من القماش البنى الفاتح والذى يسمى جوخ ؟
عاشق النوكيا
24/12/2006, 11:31 AM
أقول يالمعصقل عندي لك شور وتراهم يمدحون الهيلاهوب الولادي ياهو يدفي ومجربه واح من الربع ويقول إنه يموت حر منه. الله يرج عدوك ياشيخ. سوق الزل ةإلا مصتع ريم وإلا عليك بالأكل والزنجبيل.
Mohammad
24/12/2006, 11:33 AM
مابه فتوى بالريحه؟
الجبيلاوي2007
24/12/2006, 11:51 AM
عصيقيل :D

عليك بالبجامات الأصلية للأنه ما من جسم يرد البرد ,وأذا تبي فروة عليك بالطفال السوري الأصلي (سعر غالي )لكن مابعدها شي ..
الأخوان اللي طاحولك تعليق تلقي الواحد منهم تقول خيشة رز مليانه عندهم شحوم ترد البرد:D (ماشاء الله عليهم)
تروني قلت(ماشاء الله عليهم):D
دف روحك وأنا أخوك وحط ريالك بالشمس وأجلس بالظلال..
وبعدين لاتخلي روحك من الأكل الزين اللي يدفي (فلفل) حليب بالزنجبيل...
عصيقيل
24/12/2006, 03:38 PM
شباب اليوم قمت اطامر من الفرح تدرون ليش
سيرت على واحد من الربع ولقيت عنده ميزان ووزنت تدرون كم وزني 71كجم اللهم لك الحمد زاد وزني 12كجم دفعه وحده
لكن اكتشفت الحقيقه المره اثاري وازن نفسي بالفروه اللي توني شاريها مادريت لين نبهني رفيقي اني لابسها
يوم فصخت الفروه وقمزت فوق الميزان وشفت الحقيقه المره وزني 58كجم

:D :j :) :j ;) :j
S T A R
24/12/2006, 04:00 PM
اخوي عصيقيل ....



شفتك لك فروه مع واحد من العيال والله انها كيفه وممتازه وانا ناوي على وحده مثلها ...باذن الله



سعرها وشكلها مغري وممتاز ... السعر الظاهر (140-120)..



نوعها سورية الصنع تباع في هالمعارض اللى تصير في الرياض بين فتره وفتره ....

" معارض المنتجات الصينية والسوريه والمصرية ...وغيرها "



وسلامتك يالغالى ....:::
البيـرق
24/12/2006, 04:05 PM
سوووووووووووق الزل بالرياض
محب الرمنغتون
24/12/2006, 08:18 PM
البس هيلاهب
راعي ساموده
24/12/2006, 11:36 PM
السلام عليكم
.
ههههههههههههه اما كله كووووووووووووم ومقاس الجزمه كوم ثاني ؟؟؟؟؟؟؟؟؟؟؟؟؟؟؟؟
وش دخل الفروه بمقاس رجلك ؟؟
خيال نجد
25/12/2006, 03:42 AM
اخي الغالي والرشيق والمملوح

....عصيقيل.....

تحيه طيبه لك من

خيال نجد

وبعد

حبيت اعرف وش اللون المحدد

والله ياعنديلك فروه على كيفك

مواصفاتها....

الميزه الأولى والمهم هي:::

أنها تزيد وزنك عندما تكون فوق الميزان وبعد خلعها لا يتغير الوزن بشرط أن تكون ماسكها بيديك

فيها لنبات من جميع الأطراف .......تقل سفتي

فيها مسدس مويه تسع ميلي ........ وربع

فيها خاروف منسدح بالداخل حي مسوي فيها ميت .......يستهبل

فيها DVD تسعه سلندر توب ترونيك سوبر جارج ........ديزل

بيعها يتم عن طريق كتابة عدل الثانيه بالرياض .....طرق الملك فهد

وذلك بصك شرعي مصدق ....ولا تنسى تأخذ أحاله ..وتمر السجلات

لا يجوز ذبها بالعيد كأضحيه فهي لا توجزء :no2:

تجدها في ::: سوق الزل...... ولا .......باريس غالري بالعليا

عرض خاص يجي معها مجاناً ......عدد 2 كراعين خاروف نعيمي مقاس 44

العرض محدود والكميه حبه وحده

هههههههههههههههههه

ودمت سالم يالغالي .........وتري أتغشمر وياك

.
جلال
25/12/2006, 05:51 PM
عصيقيل ؟!!!!!
اللة يرجك يا شيخ هذا جسم؟ولا عامود خيمه؟
اقولك عندي لك جراب حق بندق مقمع((طويله المقمع )) مبطن اتوقع انه يصلح :confused:




الله يرجك والله انك منسم
شبيت على الرجال
كايد
28/12/2006, 02:16 AM
عزيزي

تبي فروة تلطم البرد لكم

رح لسوق حجاب (واترك عنك الزل ............)ودور في المحلات فروة بشت من مصنع المعراوي (مكتوب عليها شاميات ب150ريال)

بس عيبها .....ويا زينه منعيب
















دافيه ممممممممممممممممممممممممممممممممممممرررررررررررررر رررررررررررة

يعني لو نزلتها منك تلفحك الشمالية ................
عصيقيل
05/02/2007, 07:11 AM
إلى جميع من شارك في موضوع ناوي لي على فروه لكم مني فائق المحبه والشكر ودمتم في حفظ الله ورعايته
راعي جمس 450
05/02/2007, 05:28 PM
انصحك اذا كنت بالرياض عند القرية الشعبية (الجنادرية ) في حولها بدو من سوريا عندهم بشت على فروة وترى معهم باصات صغيرة وقديمة وسعرها 110 ريال
وتدفي كأنك بالصيف تعرق من الحرارة ما شاء الله
مجرررب