لاندكروزر 2006 واستفسارات :)

[GXR-MUTEB]

السلام عليكم
مساء الخير :)

ما اطول عليكم
شريت لي gxr 2006 اوتماتيك وارد الفطيم بدون دفلك
المهم اني بعرف كيف اشغل الدبل الخفيف والثقيل
وتانكي البنزين الاثنين اشلون اعبيها :D
خويكم غشيم وطاح بجيب :)

وبالنسبة لتغير زيت القير والفلتر وين افضل ورشة
سمعت ان البازعي بالرياض ممتاز هل المقصود صيانة البازعي الوكالة اللي بطريق خريص ؟

المهم الموتر فيه بعض الاعطال وودي بشوركم

كرسي دفرنس + مسمارين التوازن + جلب مقصات خلفيه يمين ويسار + صوت في المكينة يقولي الفني الجنزير يحتاج تغيير
وراعي الموتر يقولي الجنزير حديد في هالموديل وتحت ولا يتغير

وش رايكم :) هالحاجات خطيرة او عادية

والف شكر لكم

[ابوراكان تبوك]

السلام عليكم
مساء الخير :)
مساء وصباح النور
ما اطول عليكم
شريت لي gxr 2006 اوتماتيك وارد الفطيم بدون دفلك
مبروك والله يعطيك خيره ويكفيك شره
المهم اني بعرف كيف اشغل الدبل الخفيف والثقيل
الدبل الخفيف زر عند زر الفلشر يسار مفاتيح المكيف مرسوم عليه علامه اشبه بالدفرنسين مشبوكه بخط
الدبل الثقيل ياطويل العمر عادي توقف وتحط القير بـ n او p وتفصل الخفيف اذا كان مشبوك وترجع عصى الدبل للخلف ع الاخير على علامه L4 واذا بتفصله نفس الشي توقف وترجع العصى مكانها الاول بعد تعشيق القير على n او p
اللاند عموما الجكسار والفكسار جنوط الكروم اذا حطيت هواء 20 ماتحتاج الدبل وجرب وشوف بنفسك
وتانكي البنزين الاثنين اشلون اعبيها :D
توانك البنزين
اذا فتحت غطى البنزين وفكيت الغطى البلاستيكي الدائري تلقى فتحتين اللي يسار ومايله هاذي للتانكي الكبير
والفتحه اللي ع اليمين هاذي للتانكي الصغير
طبعا الكبير يأخذ فل أحمر 45 ريال اذا مصفر
الصغير 30 ريال احمر ويمشو الاثنين حول 600كيلو مع المشي 140 واقل
التانكي الاحتياطي لتشغيله تجد زر sub عند مفتاح تحريك المرايات الجانبيه يشتغل بالضغط عليه حتى وانت ماشي تحول بين التوانك بدون مشاكل اذا كان شغال التانكي الصغير تولع لمبه صفراء في الطبلون مكتوب عليها sub
احيان يلخبط التانكي الكبير في الامبير حوله ع الصغير ورده ع التانكي الكبير تروح اللخبطه هذه المشكله تحدث بس قليل حبيت اذكرها لك

خويكم غشيم وطاح بجيب :)

وبالنسبة لتغير زيت القير والفلتر وين افضل ورشة
لاتدور افضل ورشه اي بنشري ممتاز يقوم بتغييره بسهوله لكن مهم بعد تغيير الزيت تقيسه ثاني يوم بعد 24 ساعه من تغييره دائما يطلع زائد وان طلع مضبوط تمام ويكلف حول 500ريال مع القطع
القطع مع الزيت حول 350 وشغل اليد 150 تزيد او تنقص لان فكه بسيط لايحتاج حتى 50 ريال كلها 12 مسمار طبعا طريقة قياس الزيت الصحيحه لازم تحمي السياره وتأخذ لفه بس لما يتدور الزيت وتوقف وتحط القير على p وتسحب عيار الزيت تلقى فيه عيارين واحد علوي هذا اذا السياره طافيه بيوصل له الزيت لكن السفلي اذا السياره شغاله بيوقف عليه الزيتو انا افضل قياسه اذا السياره شغاله ع العيار السفلي وللتأكيد بعد اطفاء السياره 10 دقائق اجد الزيت ع العلامه العلوية بالضبط المهم انه لايزيد ولا ينقص
سمعت ان البازعي بالرياض ممتاز هل المقصود صيانة البازعي الوكالة اللي بطريق خريص ؟

المهم الموتر فيه بعض الاعطال وودي بشوركم

كرسي دفرنس + مسمارين التوازن + جلب مقصات خلفيه يمين ويسار + صوت في المكينة يقولي الفني الجنزير يحتاج تغيير
ممكن صوت بكرات والجنزير حق اللاند 6 سرندل نادر جدا مايخرب اللي يطلع الصوت بالعاده ونادر ايضا شداد الجنزير اذا سمعت الصوت خذ لك هوز او لي اسطوان وضع طرفه على اذنك والطرف الاخر قربه من البكرات والدينمو وصدر المكينه رايح تسمع مكان الصوت وتحدد المشكله بنفسك
كراسي الدفرنس ركبها اصليات وانساها 10 سنوات قدام
مسامير التوازن غير مهمه تفحص جلدها اذا كانت مقطعوه تتغير الحالها وجلد اي سياره تركب عليها حتى جلد الددسن المهم يكون سمك الجلد مساوي للاصلي حق السياره

وراعي الموتر يقولي الجنزير حديد في هالموديل وتحت ولا يتغير

وش رايكم :) هالحاجات خطيرة او عادية

أشياء عاديه جدا لكني افضل أن تتأكد من مصدر الصوت وتشيك ع الموتر اذا بتستخدم غير زيت القير + فلتر البنزين + فلتر الهواء + بواجي ngk + تغيير ماء الاديتر بالماء الاحمر و4 قوارير مقطره وفحص البلف الافضل يكون درجته 76 حق الديزل وحق بلده حول 82 او 86 لكني غيرت حق بلده الى بلف الجيب الديزل 76درجه وممتاز جدا الحرار تكون اقل من الربع + فحص الجويزات والاذرعه وتشحيم اعمده الدبل والدوران وفحص زيت الدبل والكوارين بعد ذلك كبر المخده

والف شكر لكم

رديت عليك بالاقتباس باللون الاحمر واي استفسار لايردك الا الكيبورد


موووووووووووفق

[GXR-MUTEB]

رديت عليك بالاقتباس باللون الاحمر واي استفسار لايردك الا الكيبورد


موووووووووووفق

الله يبارك فيك يالغالي
ويا جعلك ووالديك بالجنة يارب
لا خلا ولا عدم
وبيض الله وجهك ماقصرت كفيت ووفيت

[ابوراكان تبوك]

وفيك يالغالي اشكرك على الدعوات الطيبه