اهل الفكسار القديم 2007 ارجو المساعده

[حبل الوريد]

السلام عليكم ورحمة الله وبركاته
صبحكم الله بالخير جميعا

بغيت اطرح استفسار هنا مدري اذا المكان مناسب ولا لا !

الموضوع يطولي بعمركم تيسر لي فكسار 2007 قير تماتيك سافطه لي ابن حلال مسفط ولا رديته

الشاهد يا اخواني اني بلشت بامور واجده فيه ما عرفت له من هايلكسات وشواص وحلوت للفكسار فجأه:p نقضيبه تالي هالشتويه ... مالكم بالطويل

الموتر في زراراتن واجده وغرابيله واجده
اول شيء ياخواني الدبل ازريت اعرف له ناس تقول دق الزر يشبك خفيف وناس تقول شد بلده شابك معك الخفيف

طيب وعصا الدبل هذا وش علمه خبري بالحوض دقه ورى خفيف وانهزه فوق ثقيل
الحين بالفكسار الزرار حق الدبل وش لزومه والعصا وش الفرق بين الـ H و الـ L دامهم يقولون انغز الزر ويغدي شابك خفيف معك...

ثاني حاجه انا رجال دخولي النفود واجد واقاشر السيوف دايم دروبي عسره اخاف اعسر الموتر بين السيوف والقصوص وتظهر ارباقاته هل فيه زر اقدر افصل ارباقاته لا دخلت النفود

الثالثه والاخيره الموتر ما جاز لي نازل للارض ودي اشقل وجهه وقفاه وناوي اركب له هلل وشاهين لكن وش العلم بشقلته يايات استراليه مثلاً ؟



خاتمه : ابي نصيحتكم يا اخواني الموتر هذا عملي وصبور ؟؟ ولا لامنه اقفى اشتى ادور له زبون !










.

[s1s1]

الزر خفيف والعصا لثقيل والدبل شابك الخفيف ع طول الى سرعة 70 ويفصل هذا يسمونة دبل اوتو
واما بالنسبة لرفع الموتر هو من قدام مسامير ورا كعكات

[حبل الوريد]

عافاك ربي يا بعدي
طيب العصا الـ H و الـ L وش فرقهن
خبري الاوله خفيف والثاني ثقيل مدري عن ذالموتر

المشكله ان ابن الحلال الي ماخذه منه يقول مدري عنه من فكيته من وكالته ما قد اني همزت العصا امغز الزر وبس

[aso0oL]

السلام عليكم ورحمة الله وبركاته



صبحكم الله بالخير جميعا

وعليكم السلام صبحك الله بالنور والسرور


بغيت اطرح استفسار هنا مدري اذا المكان مناسب ولا لا !


الموضوع يطولي بعمركم تيسر لي فكسار 2007 قير تماتيك سافطه لي ابن حلال مسفط ولا رديته

الله يعطيك خيره ويكفيك شر وجعله مبروك


الشاهد يا اخواني اني بلشت بامور واجده فيه ما عرفت له من هايلكسات وشواص وحلوت للفكسار فجأه:p نقضيبه تالي هالشتويه ... مالكم بالطويل


الموتر في زراراتن واجده وغرابيله واجده
اول شيء ياخواني الدبل ازريت اعرف له ناس تقول دق الزر يشبك خفيف وناس تقول شد بلده شابك معك الخفيف

الدبل الخفيف يكون شابك لسرعة 80 وبعدها يفصل واذا ضغطت الزر يتم شابك حتى لو تمشي 120

طيب وعصا الدبل هذا وش علمه خبري بالحوض دقه ورى خفيف وانهزه فوق ثقيل
الحين بالفكسار الزرار حق الدبل وش لزومه والعصا وش الفرق بين الـ H و الـ L دامهم يقولون انغز الزر ويغدي شابك خفيف معك...
ال H خفيف واذا احتجت الثقيل تحط القير على N وتعشقه L مع ضغط الزر


ثاني حاجه انا رجال دخولي النفود واجد واقاشر السيوف دايم دروبي عسره اخاف اعسر الموتر بين السيوف والقصوص وتظهر ارباقاته هل فيه زر اقدر افصل ارباقاته لا دخلت النفود
الاربقاق عند اي كهربائي يحط لك فاصل ولا تنسى ال ABS يحط له فاصل بعد

الثالثه والاخيره الموتر ما جاز لي نازل للارض ودي اشقل وجهه وقفاه وناوي اركب له هلل وشاهين لكن وش العلم بشقلته يايات استراليه مثلاً ؟

قدام مسامير ومكانها تحت باب السواق ومساعد السواق
ورا يايات استراليه + جمبينات جبريل

خاتمه : ابي نصيحتكم يا اخواني الموتر هذا عملي وصبور ؟؟ ولا لامنه اقفى اشتى ادور له زبون !

الموتر كد ومد وعملي ولا عليه كلام لك وللعمر اهم شي تشيك عليه كل ماطلعت من البر









.


والله يوفقك لكل خير

[سقم المعادي 1]

الموتر دفع رباعي مستمر (Full time 4 wheel drive) الى الفصله غير صحيح انه الى 80

لكن توزيع القوة تقريباً 30% للامام - 70% خلفي
هذا الوضع اعلاه .. بدون تشغيل الدبل الخفيف .. يعني يمشي بالنفود عادي بدون ماتطق الخفيف الا في بعض الحالات اللي تحتاج فيها ان يكون توزيع الدفع 50% - 50% اضغط الزر اللي تحت الفليشر وانت تمشي بحدود 60كم وأقل عادي ماعندك مشكله

و الدبل الثقيل هو اللي بالعصا و طبعاً الثقيل مايشتغل الا بعد ماتطق الزر حق الخفيف و تحط القير N و انت في وضع الوقوف التام

و جعله مركوب العافيه أحسنت الاختيار اشهد ان الفكسار موتر

[إبو محمد]

الموتر دفع رباعي تفاضلي وهي تقنيه ممتازه جدا وهو نقل القوه للدفرنس الامامي حسب الحاجه يعني كل مازاد الثقل او الحمل على الدفرنس الخلفي يزيد نقل القوه للدفرنس الامامي

مثال لوترفع الدفرنس الخلفي بعفريته كأنك بتسوي ترصيص ارضي وتحط القير ب D وتدعس بنزين ماتتحرك الا الكفرات الخلفيه لان ماعليها حمل مرتفعه بالهوا ومافيه حاجه لتدخل الدفرنس الامامي لكن لما تكون تمشي في طلوع هنا ينتقل التفاضل بنسب معينه لجميع الكفرات ومثلها اثناء الانعطاف
لذلك انصحك اثنا دخول الرمال شغل الدبل الخفيف اللي هو الزر حتى لاتتعب هذا النظام وعشان ماتمر بهيار والا قص وهنا النظام يمكن يوهقك لانه مايميز بين الارض المعبده والرمل فممكن تتحول القوه كامله للدفرنس الخلفي ويغرز
وهذا ماصار معي بالضبط
كنت ناسي اشبك الدبل الخفيف وجيت بهيار ودق الموتر

[بواسامه]

خوش موتر
كد ومد

[حبل الوريد]

بيض والله وجيهكم ياهاللحوات الغانمه عز الله انكم ما تجيبون الا السمينه
طيب يا اخواني بينتو كلش وواضح تمام التمام الله يعافيكم
بس باقي حاجه اذا احتجت الثقيل وش الفرق بين الـ" H " و الـ" L " دام ان الخفيف صار هو الزر بس

[أبو شيري]

الله يعطيك خيره ويكفيك شره

انت رجال متعود للهايلوكسات والشاصات قبل حسب كلامك

لذلك ترفق بالنفود دام هذا تماتيك تراه ماهو مثل اللي متعود عليه قبل
اذا شفت ما شفت رديته نمره
الآن الوضع أختلف بالقير التماتيك يبي له مسايس وأحذر من مانع الانزلاق لانه نكبه مع النزول الحاد أحيان ما تمسك الموتر

بخصوص قير الدبل والحروف اللي عليه واضحه نمره فاضي ونمره الثقيل
والدبل اذا تبيه يعيش سليم لا تضغط الزر والموتر يمشي اللي هو الخفيف ولا تفصله الا واقف
قد يقول البعض عادي ويعشق طبيعي
نعم هذا صحيح لكن مع الأيام يبدأ يطق طقه قشرا عند التعشيق والفصل


اما الياي انصحك بـ ياي استرالي ازرق اسمه فيليز افضل من أولد مان طبعاً خلفي
ارتفاع 4 سم او 5 سم ولا تتعداه وبعد ذلك ارفع الوجهيه 3 سم
راح يكون من الخلف مرتفع اكثر بس يضبط مع الحمل

فيه معلومه الي هي ان الدبل يفصل مع السرعات وهذا غير صحيح
الدبل شغال على طول ولا يفصل نهائي أقصد الدفع الرباعي المستمر
ومن فوائده يعطي ثبات للسياره اثناء السرعات ومع المنعطفات

لو تلاحظ وان تمشي 140 او 160 تأخذ الملفات اللي بالخط بأتزان وثبات وبكل يسر
بعكس الجيوب اللي مافيها دفع رباعي مستمر تطلع على الخط الثاني مع السرعه


بأختصار
الجيوب التاليه سيارة مدينه ماهي سياره بر

[كم كيلو باقي]

بالمبارك ماشاء الله
ومثل ماقال الرجال اللي فوقي لا زم تراعي القير التماتيك
والله يبارك لك

[سقم المعادي 1]

بيض والله وجيهكم ياهاللحوات الغانمه عز الله انكم ما تجيبون الا السمينه
طيب يا اخواني بينتو كلش وواضح تمام التمام الله يعافيكم
بس باقي حاجه اذا احتجت الثقيل وش الفرق بين الـ" H " و الـ" L " دام ان الخفيف صار هو الزر بس



الدبل كذا رسمته عندك

- H <- الدبل الثقيل مفصول او مطفأ
- N <- معروفه
- L <- اذا بغيت الثقيل تسحب العصا للخانه هذي

[حبل الوريد]

بيض الله وجيهكم جميعاً ما قصرتو والله يوفقكم بدنياكم واخرتكم
الان كلش تمام التمام

[BoFlanQ]

قدام مسامير ومكانها تحت باب السواق ومساعد السواق
والله يوفقك لكل خير


هلا اخوي .. ممكن صوره لمكانها .. لاني مالقيتها .. الموتر عندي شوي مرفوع من قجام وحاب انزله

[أبو شيري]

هلا اخوي .. ممكن صوره لمكانها .. لاني مالقيتها .. الموتر عندي شوي مرفوع من قجام وحاب انزله

ادخل تحت السياره تجد مسمار كبير بالوسط
واحد يمين واخر يسار
مخصص لرفع وتنزيل مقدمة السياره

بداية خذ متر وقيس المسافه بين الكفر الامامي والرفرف
واحفظ القياس من اول الرفرف الى شفة الجنط

شد البلد المقدمه 27 او 28 لكن مع الاستخدام ينزل

افضل شي رفعه الى 28

احذر من استخدام مسدس الهواء بالرفع او التنزيل
الشغل اليدي بالمفتاح افضل للوزن

ارفع جنب الموتر بالعفريته وشد للرفع والعكس صحيح
أو اقرب ورشه بـ 10 ريال


لحظه ما نوع موترك
ممكن له ياي من الامام وليس مسمار

[BoFlanQ]

تسلم يالغالي ماقصرت

نوع الموتر vxr 99