عزبتي ناقصه وابيكم تكملوها

[Grh]

السلام عليكم ..

مسيتو / صبحتو بالخير 00
اخواني وجعلني م اخلا ، انا عندي شنطه عزبه السنيدي شاريها من بريده 00 المهم تعرفون مع الاشغال وكذا اتطريت اروح ل الرياض 00 وخليت اغراضي ب مكان سسكني ، ف الله يصلح الشايب ، ويخليه لي ويطول بعمره
شال الشنطه بلي فيها وودها ل المزرعه ، وتعرفون عند العمال م يقعد شي ..
ف العزبه هالحين مابها غير دلتن وحده الي هي #السيف :D

ابي منكم طلب الي هو تكتبون نواقص الشنطه لجل اكلمها ولا عليكم امر
وجعلني م اخلا

[دغيم1]

وعليكم السلام ورحمة الله وبركاته
حياك الله اخوي
كل شخص أدرى بما يحتاج من عزبة وذلك حسب حاجته للعدد والكمية
ولكن يمكنك المرور على محلات السنيدي او برق الحيا او الغرابي او أي محل لأدوات البر وتكمل عزبتك منه
على الا تخلو من الأساسيات
بريق تفويح ، دلة تفويح ، بريق شاي ، دلة قهوة ، فناجيل ، بيالات، ليفة ، بيز ، مركاب ، ملقاط ، شنطة للبيالات والفناجيل ، قز صغير ، او بريموس ، ذرآية .قدر ضغط صغير ، صحن ، ملاعق ، سكين ،
مع تمنياتي لك برحلات سعيدة وآمنة
تقبل تحياتي
اخوك / ابوفيصل

[خالد5566]

صباح الخير على الموجودين

بنسبة تكميله العزبة ادخل على المتجر اذا كان جوالك جا لكسي او ايفن

وحمل ملف او ايقونة ا لكشته فيها من الألف الى الياء و بتد عيلي

فيها من الاسعافات الولية وتا نضيم العزبة و ا لمتنز ة وكل ما يخطر على بالك ودعواتك يا لغالي .:

وتحياتي للشباب

[أبو شيري]

دام عندك عزبه مكتمله سابقاً أذاً لديك الخبره الكامله
كملها مثل ما كانت سابقاً
وتذكر الأغراض اللي ما كنت تستخدمها لا تعيد تشتريها
والغرض اللي كنت تبيه سابقاً ركز عليه

والا اقولك دام طلبت نكمل عزبه
طيب حاضر بشرط تطبق
رح لوكالة عبداللطيف جميل وطلع جيب شاص 2015
وتعال أحمل الأغراض لك وبشرط ما ينقص شي عليك

[سعودي ريال]

الله يحييك
مثل ماذكروا لك الاخوان + علب للسكر والشاهي والقهوة والهيل والابهارات

[ابوراكان تبوك]

عزبتك انت اللي بتستخدمها رتبها على مزاجك فمثلا بعض الناس يحط معه عزبه شاهي فقط والبعض عزبة شاهي وطبخ وو شغلات مايستخدمها الاقليل

العزب اللي عندي قاسمها قسمين شنطه حقت عزبه طبخ واواني تكفي 10اشخاص هاذي للكشتات الكبيره

وعزبه صغيره مختصره للشاهي والقهوة والطلعات الصغيره سفررررري

حتى ماهو كل مشوار تقعد تبلش بالعزب احيان ماتحتاج كل الاغراض

عزبتك الجديده لاترميها لافي منزل او غيره الافضل تبقى في السياره حتى ماتضيع وتبقى دائما مكمله

[تزبطي]

يابناخي تراها عزبه منت عارف تكملها ..؟

انت تعرف تطبخ عبها اغراض طبخك واﻻدوات اللي تحتاجها للطبخ عاده

سواء طبخ قهوه او اكل

و موفق ان شاء الله

[محمد بن سريع]

السباله وكمل عزبتك من هناك

[GMC4Ever]

والله يا ابن الحلال عزبة الرجال على هواه...

ومثل ما تفضلوا الاخوان، شف أنت وش احتياجاتك واشترها...

لكن حتى يكون الرد ذو فائدة للجميع، ونتشارك في الخبرات والأدوات

أنا بعلمك بشنط العزبة اللي عندي وهي كثيرة والحمد لله، مع إني بديت بشنطة عزبة جاهزة شريتها مع محتوياتها، لكن على مدى سنواااااااااات طويلة، كل شوي أزيد شي وكل فترة أضيف شئ إلين الحين ما شاء الله والحمد والشكر لله صار عندي عزبة كاملة والكامل وجه الله.

1: عزبة طبخ، فيها:

قدر كاتم
قدر وسط
قدر صغير
صاج صغير للخبز
فيها صاج كبير للمقلقل
أسياخ شوي
ملاس
عدد 2 شنكارين لحم كل شنكار مفصل من قطعتين
مغراف
ملاعق طبخ وغرف
معلاق ذبيحة مفصل من قطعتين
ذرايات عدد 2
سكاكين مختلفة الأحجام والمقاسات
مسن سكاكين
مجموعة من البيز والخرق
قصدير


2: شنطة صغيرة للبهارات وما في حكمها، وأشيل فيها:

بهارات شوي
بهارات كبسة
بهارات برياني
بهارات مخلوطة
ملح ناعم
ملح خشن
علبة زيت قلي
علبة سمن
علبة زبدة
ورق غار
عويدي + هيل
ليمون أسود + قرنفل
صنوبر + لوز
صلصة طماطم
مكرونة


3: عزبة الشاهي والقهوة، وفيها

بن
هيل
عويدي
زعفران
خلطة القهوة
شاهي تلقيمة
حليب علب
سكر
اقط (بسكوت البدو)
سمن ودخن
زنجبيل مطحون
مطباخ كبير
مطباخ وسط
دلة كبيرة
دلة وسط
مقداع تمر
ابريق تفويح ماء كبير
عدد 2 ابريق شاهي
ابريق حليب
ملاقط جمر
مجموعة من البيز والخرق
ذرايات عدد 2
فناجيل قهوة
بيالات شاهي
مركاب صغير ومركاب وسط
دبة غاز إيطالية وسط عليها راس بريموس


هذي شنط العزب الجاهزة عندي على طول، وفيه بطبيعة الحال أغراض ما هي دائمة الاستخدام، وأخذها معي عند الحاجة ومنها:

أ: شنطة صغيرة اضافية خاصة بالخفايف للفطور ويكون عادة فيها:

أجبان
مربى
قشطة
عسل
طحين
معلبات فول + فاصوليا + الخ...
صحون بلاستك
فتاحة علب
سكاكين
علب حليب
... الخ


ب: أدوات وأغراض ثانية أستخدمها للكشتات الطويلة اللي فيها مبيت أو متى ما احتجت شئ منها ومن ضمنها:

دبة غاز كبيرة
دبة غاز وسط ايطالية
قز عين كبير
قز عينين
قدر طبخ كبير
ذرايات
رواق طويل 12 متر
رواق وسط 8 متر
رواق صفير 6 متر
فرشات ومدات ومراكي
خيمة القاضي 5 × 5
خيمة مبيت
كيس نوم
مركاب كبير
مركاب وسط
منقل شوي تفصيل
حافظات طعام


طبعاً اللي تقريباً موجودة بشكل شبه دائم في الموتر عندي اللي هي عزبة القهوة والشاهي (رقم 3) أما (رقم 1 و 2 و أ) استخدمها في الكشتات القريبة اللي ما فيها مبيت وأغلبها تكون كشتات عائلية على مدى يوم كامل أو نص يوم، ويكون فيها طبخ ونفخ، أما (عزبة ب) فهذي مثل ما ذكرت سابقاً، للكشتات الطويلة اللي فيها مبيت وبعد عن المدينة.

طبعاً كثرة الأغراض تجبرك على ابتكار فنك الخاص في عملية التخزين والترتيب في كل شنطة، وأنا أبحث دائماً عن الشنط الكبيرة والعميقة واللي لها جيوب في كل جهة وغطاها كله عبارة عن جيب...

ومع الوقت بتعرف وشلون ترتب شنطتك وتخلي الأدوات اللي تستخدمها دائماً في متناول اليد والأغراض اللي أقل استخدام في الأسفل، وللعلم أفضل نصيحة ممكن أقدمها لك علشان تضبط عزبتك ولا تصير ناقصة، تسوي لك ورقة فيها محتويات كل شنطة، وتخليها في أحد الجيوب، ولا نقص شئ أو تلف عندك شئ أو ضاع، تحط قدامه علامة علشان تستكملة بعدين، بالإضافة لذلك، هالطريقة نفعت أخوياي وربعي اللي ياخذون عزبي لا كشتوا ولا كنت معهم، يعرفون بالضبط كل شنطة وش فيها بدال ما يقومون ينثرون الأغراض ويحوسون لك كل شنطة.

النصيحة الأخيرة، أنصح انك تشتري شنطة فاضية وانت تكملها باحتياجاتك، وابعد عن الشنط الجاهزة لأن من واقع تجربة، الأدوات والأغراض اللي في الشنط الجاهزة سيئة الصنع والجودة، ولا تكد ولا تمد، والفلوس اللي تندفع فيها خسارة وفي الأخير بتحذف كل اللي جا معها وتشتري جديد يكد ويمد، إلا إذا كانت طلعاتك خفيفة ولا هي كثيرة فيمكن تعمر وتطول معك.

أطلت عليك، ولكن أتمنى أن تكون المشاركة ذات فائدة لك، ولبقية الإخوان... وبالتوفيق للجميع...